مش بشتغل بس عندي كارير

لما سألت ناس “يعني إيه كارير بالنسبة لك؟” معظم الإجابات كانت يعني “الشغل” أو بالبلدي كدة “أكل العيش”، أو الوظيفة المناسبة جوة شركة أو مؤسسة أحقق ذاتي من خلالها وتضمن لي دخل كويس، أو مسمى وظيفي، أو الترقية وطلوع السلم وظيفي درجة درجة بهدف الوصول لمنصب إداري عالي، أو إني ابقى صاحب شركة ناجح ومستقل بذاتي…الخ

كل الإجابات مقتصرة بفكرة ان الهدف من الكارير هو تحقيق النجاح المهني فقط! لكن في الحقيقة إن ده جزء صغير جداً من هدف الـكارير، لأن فيه فرق كبير بين الشغل والكارير
أنت ممكن تكون مش موظف وعندك كارير، والعكس صحيح، فيه ناس كتير بتشتغل بس مش محققة أهداف ومتطلبات الكارير. لأن عشان يبقى ليك كارير لازم تكون بتتحرك وبتتقدم في كل الجوانب اللي بتشكل حياتك مش الشغل بس

لازم تكون عينك على هدف أو رسالة نفسك تحققها في حياتك وبتمشي خطوات تقربك من تحقيق الهدف ده، ساعتها الخطوات اللي اخذتها والخبرات اللي اكتسبتها في طريق تحقيق هدفك هيبقى هو ده الـكارير

:الكارير بيختلف عن الشغل في 3 حاجات، في الأدوار، والمرونة، ومعايير النجاح

أول حاجة الأدوار… لو بصينا على الشغل فهو مقتصر على دور واحد بس، الدور الوظيفي اللي بتؤديه في شركة أو مؤسسة اللي بتشتغل فيها… طيب بقيت الأدوار؟ دورك في بيتك وأسرتك، دورك في دائرة تعاملاتك وعلاقاتك الشخصية، دورك تجاه مجتمعك، الهواية أو الرياضة اللي بتمارسها بشغف. طب دورك تجاه نفسك؟ تطوير ذاتك ومهاراتك، مش بس انك تنمي المهارات اللي بتحسن أدائك في شغلك، لازم تكتسب مهارات حياتية عشان تعرف تعيش وتتعامل مع كل الظروف والتحديات اللي بتقابلك في الحياة، وترفع من مستوى وعيك بنفسك وتتطور على المستوى النفسي والروحاني. يعني في أي وقت لو قررت مؤقتاً لأي سبب تستغنى عن الشغل، لسة بقيت الأدوار شغالة ومستمرة، المهم انك تكون بتتحرك لقدام في أي جانب من جوانب الحياة، عارف اتجاهك فين وعايز تحقق ايه، وتكون عارف تدير الأدوار ديه كلها مع بعضها بنجاح، ساعتها تقدر بكل ثقة تقول أنا عندي كارير

 تاني حاجة المرونة… كل إنسان بيمر بمراحل تطور خلال حياته، وفي كل مرحلة بتختلف احتياجاته وقيمه ورغباته، وعلى اساسها بتختلف قراراته واختياراته في الحياة. عشان كدة لازم أولاً يبقى عندك وعي بالاختلافات والتغيرات ديه وتقدر تصمم الـكارير المناسب للمرحلة اللي بتمر بيها ومتطلباتها وتشكله على كيفك عشان تعيش راضي ومرتاح من غير ما تحس انك عايم ضد التيار، تخطط وترتب وتختار الأدوار المناسبة لكل مرحلة حسب أولوياتك ورغباتك. لكن أي وظيفة متطلباتها معروفة، خبرة وكفاءات، صعب تلاقي وظيفة مرنة تتشكل حسب احتياجاتك ورغباتك أو تراعي التغيرات اللي بتحصل في حياتك

ثالث حاجة معايير النجاح… معيار النجاح في أي وظيفة هي انك تنجز المهام وتحقق الأهداف اللي مطلوبة منك، أو تحصل على درجة كويسة في تقييم الأداء السنوي، أو مرتبك يزيد وتترقى لمنصب أعلى. وناس كتير رابطة تحقيق الذات بالإنجاز المهني وبرضو مش حاسيين انهم محققين ذاتهم. ده عشان تحقيق الذات مش مرتبط بنجاحك المهني بس، تحقيق الذات ليه علاقة وثيقة بتحقيق قيمك في الحياة، يعني ممكن تكون ناجح في شغلك بس بتحقق ذاتك لما تعمل عمل خيري، أو تلعب آلة موسيقية بتحبها، أو لما تقرأ وتتعلم حاجة جديدة، أو لما ولادك يبقوا ناجحين ومبسوطين. كل ما كانت اختياراتك في الحياة مرتبطة بقيمك، كل ما تشعر بالرضا وتحقيق الذات

الخلاصة إن الـكارير مش بتحقيق الإنجازات، الـكارير في الرحلة والقصة اللي ورا النجاح، بالتجربة والخبرة، متظلمش نفسك وتحدد نفسك بمسمى وظيفي، كاريرك اكبر واوسع كتير من مجرد شغل، الكارير اسلوب حياة