قصص ملهمة لستات بدأت مشروعها في سن الخمسين

مفيش وقت معين ان الواحد يحقق فيه حلمه…ودي قصص لخمس نماذج ناجحة، لستات قررت تحقق حلمها وتبدأ مشروع خاص بيها في عمر الخمسين

أماني فكري

بارسم تصميمات لايشاربات وشيلان وأقمشه تكون قطعه واحده متميزة وده كان سبب جميل لتوصيل فني للناس والتواصل معاهم…طول عمري بحب الرسم ومن صغري لازم اكون ماسكه ورقه وقلم وبرسم، حتى لو بتفرج علي التلفزيون او بذاكر او في قعده مع اهلي واصحابي.  وزي معظمنا بننشغل بالمسؤوليات ونفوق نلاقي السنين عدت واخدتنا من هواياتنا والتفاصيل الصغيرة اللي بنحبها. بس دائما لما كنت امر بأزمه او هزه نفسيه كنت بلجأ لربنا والعبادة وكمان بفرغ شحنات قلقي وسعادتي او حزني مع الرسم.  دائما بقول الرسم بالنسبة لي الصديق المريح موجود دائما لما احتاج له ومهما بعدت او اهملته هو معايا ونصيحه لاي حد الموهبه اللي ربنا مديها لك دي نعمه كبيره من عنده سبحانه لك انت، و خاصه بيك انت، ولها درجاتها…موهبتك بتسعدك وانت ممكن تسعد بيها اللي حواليك. بالنسبه لي اول ما بدأت حياتي يكون فيها اوقات فراغ رجعت أرسم. بحب أجرب كل انواع الرسم والالوان والاسطح المختلفه ورق، كانفاز، بورسلين، زجاج، قماش… لكل نوع تحضيراته و الوانه و احساسه المختلف وكذلك تحدياته لما يتحول لانتاج و تسويق… لذلك حاولت بتصميمات علي الايشاربات والاقمشه ان تكون كل قطعه عمل فني متميز يجعل من ترتديه تكون “هي مختلفه، متميزه وجميله” و يضيف لها اي قدر ولو بسيط من السعاده

لمتابعة شغل أماني

https://www.instagram.com/bya.handmadedesigns/

 

عبير عزب

فى الحقيقة انا مش هاقول عندى كام سنة.. لانى مش بشعر انى كبرت خالص بالعكس جوايا روح وعمر بنوته وحاسة انى لسه ادامى كتير عاوزة احققه…  انا سعيدة ان جت الفرصة  والجرأة انى اتكلم عن نفسي وعن شغلى اللى فى الحقيقة بحبه جدا ولقيت نفسي فيه ومستمتعة جدا به لانى اصلا من الستات اللى مش بعرف اقعد من غير ما اعمل حاجة حتى من قبل وفاة زوجى كنت بعمل انشطة كتيرة …المهم من زمااااااان اوى وانا بحب الرسم والالوان واللبس …بس لسوء حظى لم تستغل مواهبي فى الدراسة وتبقي الموهبة مع الدراسة المهم التحول الغريب كان بعد وفاة زوجى من ست بيت ١٣ سنة الى فجأة محاسبة فى شركة بترول …بس فضلت جوايا رغبتى فى ممارسة اللعب بالفرش والالوان مستمرة وقررت انى ارسم  ورسمت والصدفة خلتنى اتعلم الميكب اب واشتغلت ميك اب ارتيست لحد دلوقتى…. والاهم بقي ان اهم هواية عندى  مكنتش حاسة بيها ولا فكرت انها ممكن تبقي حاجة جميلة اوى كده فى حياتى الا مع بداية الكورونا والحظر، لما قررت انى ابدا براند لَبْس مع بنتى الكبيرة

  وفعلا ربنا كرمنا وفى اسبوع كان الاكونت بتاعنا جاهز وبدأنا الرحلة سوا والحمد لله بدأنا فى شهر ٦ اللى فات وماشيين بخطى كويسة…بنحاول نوفق بين الموديلات انها تناسب كل الاعمار وخامات كويسة وسعر كمان معقول

لمتابعة شغل عبير

https://www.instagram.com/redae.eg/

https://www.facebook.com/Redaeeg-106469564442732/

 

عزة مختار سالم

اتجوزت وأنا صغيرة وماشتغلتش. كنت دايمًا شاطرة في الطبيخ، وأي حد محتاج حاجة حلوة او وصفة، يرجعلي. يوم عملت كيكة لصاحبتي وفضلت تشكر فيها وتقولي بهزار “ليه ماتبتديش مشروع وتبيعي الحلويات بتاعتك؟”. بعد شوية تفكير وتخطيط والكتير من الأحلام، سألت بنتي إذا كان ممكن تعملي صفحة على فيسبوك، عشان ابتدي ابيع عليها، وفعلا شجعتني وابتديت ودلوقتي المشروع كبر ومبقاش كيك وحلويات بس…بقيت كمان باتولى حفلات من اول الحادق للحلو… بنتي الكبيرة ندى هي اللي بتساعدنى في كل حاجة ومع بعض عرفت أحقق اللي كنت باحلم بيه طول عمري

لمتابعة شغل عزة

https://www.instagram.com/zuscake/

https://www.facebook.com/Zuscakehouse

 

هنا عبد الراشد

انا اتخرجت من الجامعه اشتغلت فتره صغيره اوى فى مدرسه بعد كدة اتجوزت وقعدت فى البيت وكنت مبسوطه انى معنديش غير مسؤليه البيت والاولاد واصحى براحتى مش مرتبطه بمواعيد شغل  بس لما الاولاد كبروا وكل واحد فيهم له اهتماماته ووقتهم بيكفى بالعافيه اللى وراهم،  فى الوقت دة حسيت ان كان قرار غلط انى مش باشتغل

وجت الفرصه ان فى الوقت دة بدأت بنات كتير يعملوا تورتات مختلفه عن التورتات اللى فى المحلات وبتكون بارتفاعات عاليه

المشكله كانت عندهم مفيش علب تكفى المنتج بتاعهم  وحاولت انى اعمل علبه وكانت مش صعبه خالص وعملت مقاسات بتعديل فى الكرتون كنت اول حد يعمل المقاسات دى…ودلوقتى كل اللى بيعملوا العلب خدوا اول فورمه للمقاسات دى من عندى الحمد لله

بدات اعمل العلب فى المطبعه وكنت باعمل 200 علبه وبعد كدة زاد العدد بالتدريج وحاليا اقل عدد من اى مقاس 3000 معظم شغلى جمله للمحلات باحب الربح القليل وبيع كتير وحاليا باعمل علب لمحلات حلوانيه

مبسوطه انى نجحت فى حاجه عملتها هى جت متأخر اوى بس الحمد لله انا مستمتعه بشغلى

فى النهايه مفيش حاجه اسمها اخر فرصه راحت منى… طول مااحنا عايشين فرص النجاح موجودة بس محتاجة كل واحد يشوف نفسه من جوة

مفيش حد بينجح حد…نجاحك سببه انت وارادتك، وكل دة مش مرتبط عمرك اد ايه

لمتابعة شغل هنا

https://www.facebook.com/Hanas-Boxes-340582836039077

 

هدى محمد

بعد ماتجوزت قعدت فى البيت مع اول بيبي … بناتي وهما صغيرين كنت احب اعمل لهم الاكل فى البيت وكنت بفكر ازاى اغير لهم فى الاصناف عشان نفسهم تتفتح على الاكل….وكمان جوزى مش بيحب ياكل الا من ايدى

 المهم بقت هوايتى والبنات فى المدرسة افنن فى اصناف الاكل وخصوصا المعجنات وبمرور الوقت البنات كبرت واشتغلوا وبقي فيه وقت زيادة لوحدى  وبقيت اغلب وقتى اتفرج على فيديوهات الطبخ وبرضو كل اهتمامى بالمعجنات ولقيت ان كل اللى حواليا بيحبوا الحاجات اللى بعملها وكلهم شجعوني انى ابيع حاجاتى… وبالفعل ابتديت على خفيف من فترة قريبة وبعدين قررت انى اوسع الموضوع ويبقي مشروع مفيد وطلبت من بنتى اللى شجعتنى اوى انها تعمل لى اكونت على الانستجرام والفيسبوك وقد كان وابتدينا نصور بمجهودنا الذاتى فى البيت صور للمنتجات بتاعتى

لمتابعة شغل هدى

https://www.facebook.com/Momthebaker.eg/

https://www.instagram.com/momthebaker.eg/