ليه الروتين مهم؟.. ليه صديقك المفضل؟

دايماٌ لما بيتقال كلمة روتين  بتترجم عندنا لملل .. زهق .. كسل، ومش بنفكر ابدا ليه يعني مهم إن يكون عندنا روتين في يومنا؟ أو  إزاي الروتين ده سبب أصلا من أسباب نجاحنا؟ أنزلي معانا الكام سطر دول و هنقولك علي حاجات الروتين بيقدمهالنا مش بناخد بالنا منها؛ 

عارفة الأيام اللي بتصحي فيها حاسة إنك مش عارفة تبتدي منين؟ في حاجات كتير أوي بس مش عارفة إيه اللي مفروض تعمليه؟

 هي دي بالضبط الأيام اللي بنعرف فيهم قيمة الروتين،  لما بتخلقي روتين ليومك صحي مناسب وعملي، ده بيخليكي قادرة تنظمي وقتك وتنتجي أكثر من غير مجهود كبير منك أو تضيع وقت.

وفي وسط  زحمة حياتنا طول الوقت، الروتين بيخلق لك نظام ،وده من اهم اسباب النجاح، يوم مش منظم = صفر أنجاز،

 هتلاقي بقي مشاوير مخلصتش، مواعيد راحت عليكي، فلوس أتصرفت في حاجات مش مهمة، فرص بتضيع، وبالتالي هتبقي مضغوطة طول الوقت،

 الروتين بيديكي مساحة تعرفي إزاي تحطي خطة وتمشي عليها، من أقل حاجة لأكبر حاجة، وإزاي تنظمي وقتك ومجهودك و كمان مصريفك، لان بيبقي عندك نظام ماشية عليه،

مش بس كده،لاأ،

في حاجة بسيطة أوي الروتين بيعملهالنا بس تاثيرها كبيرأوي عليكي، إنه بيديكي مساحة للتفيكر ووقت أكبر للابتكار والنشاط،

روتين و أبتكار ! إزاي ؟

هقولك، لما بتشيلي من دماغك كل يوم الصبح التفكير في الحاجات البسيطة والروتينية في اليوم ده اتوماتيك بيوفرلك طاقتك، يعني بتخلصي الأساسيات بسرعة فبيتبقي عندك وقت، الوقت دة بيخليكي تركزي في الحاجات الأهم بقي،  زي إنك تعملي حاجة جديدة في شغلك،

 تلاقي حل لمشكلة،

 تجربي حاجة جديدة،

 تخرجي،

 تقيمي نفسك أو تجربة مريتي بيها، و تخرجي منها بحاجات أتعلمتيها فعلا،  وده بيفرق جدا في إن نفسيتك تبقي أحسن ،

حاجة كمان مهمة أوي، الروتين بيخلكي تعرفي المشكلة فين ؟

 وهو اللي بيوريكي المكان الي محتاج تجديد في حياتك أو تصليح،

هقولكم إزاي،  لما يبقي عندك روتين ونظام ” يومي/ أسبوعي / شهري” في حاجات معينة،  ده بيخلكي تبقي عارفة أنتي عملتي إيه بالظبط؟ و أنجزتي إيه؟ وإيه حصل غلط؟ و ليه مثلا الشهر ده المرتب خلص بسرعة؟ وليه الأسبوع ده حاسة إنك مرهقة أوي؟ و إيه اللي جربيته و فرق معاكي أوي؟

 ببساطة لإن كل الحاجات النمطية اللي بتعمليها بتعرفك إيه اللي مش ماشي معاكي، أو مضايقك، و تبدأي تشتغلي عليه، ووقتها هيبقي سهل أوي أنك تعرفي تضيفي عادات جديدة أو تبدلي حاجة بتعمليها مش مناسبة ليكي بحاجة تانية جديدة و تزوديها علي روتينك. 

وزودي علي كل اللي فوق ده، إنك بتتعلمي من الروتين الألتزام والمواصلة، لإن لما بيبقي في نمط ماشيين عليه وعادات أتعودنا عليها،  بيبقي سهل نلتزم ونواصل،  بالذات في الأوقات اللي بيقي فيها ضغط أو معندناش طاقة،  لكن الروتين بيبقي عودك علي نمط معين ليومك فده بيخليكي تواصلي و تكملي .

  أخر حاجة بقي، الروتين بيتخلق بخطوات بسيطة، أولها إنك تعملي خطة لنفسك كل 3 شهور، وتحددي أهدافك، وأول كل اسبوع تحددي المهام اللي محتاجة تخلص فيه، وفي أخر كل يوم تحددي نشاطات اليوم اللي بعده وهكذا.

 هيساعدك في ده أنك تخلي دايما معاكي اجندة تكتبي فيها كل اللي محتاجة تعمليه، من أصغر حاجة زي أنك هتصحي امتي؟  وهتروحي فين؟ لحد السفر اللي بتخططي ليه وتقسيم ميزانيتك. 

وفي الأخرعايزة أقولك إن الروتين مش خنقة ومش معناه ابدا ملل، خصوصا لو أتعمل في حاجات معينة، لأن لما انتي بتخلقيه لنفسك وتختاري شكل الحياة المناسب ليكي، دة بيساعدك جدا أنك تجددي فيها، و لما بتشوفي نتيجة العادات اللي التزمتي بيها والحاجات اللي حققتيها عشان قدرتي تواصلي لفترة كبيرة  بتبقي فخورة ومبسوطة أوي بنفسك .