ازاي نتعامل مع اكتئاب الخريف؟

في نفس الوقت ده من كل سنة، معظمنا بيحس بموود غريب من الكآبة والحزن من غير مانعرف ايه السبب؟ يمكن عشان النهار بيقصر والليالي بتبقى أطول و بنصحى تقريباً والدنيا ضلمة .. يمكن عشان الجو بيبدأ يبرد وبنبدأ نفتقد الصيف والشمس والبحر.. ويمكن زي ما في حالتي إني طول عمري الوقت ده والجو ده وحتى ريحة الهوا بتفكرني بدخول الدراسة وحالياً بضغوط العمل الأكاديمي.

كل التغيرات دي بتخلق حالة من القلق والاضطراب العاطفي واللي بقت معروفة باسم اكتئاب الخريف Autumn Depression، وده نوع من الاكتئاب اللي بيجي ويختفي بشكل موسمي، يعني اضطراب مزاجي بيحصل كل سنة في نفس الوقت ويبدأ عادةً مع آخر فصل الصيف وبداية فصل الخريف.

اكتئاب الخريف يعتبر شكل من أشكال الاضطراب العاطفي الموسمي Seasonal Affective Disorder or SAD، اللي بيحصل مع تغير المواسم. في العادي يبدأ الاضطراب العاطفي الموسمي في الخريف أو الشتاء وبينتهي في الربيع أو أوائل الصيف، وفي نوع تاني نادر من الاكتئاب الموسمي اسمه “الكساد الصيفي” وده يبدأ في أواخر الربيع أو أوائل الصيف وينتهي في الخريف.

ومن الأسباب المشهورة لاكتئاب الخريف..

• تغير الساعة البيولوجية: الجسم بيستخدم اشاعة الشمس في تنظيم وظائف بيولوجية كتيرة، فبسبب ضوء الشمس القليل في فصل الخريف بيحصل اضطراب في الساعة البيولوجية.،وبما ان الساعة البيولوجية بتأثر على المزاج، والنوم، والهرمونات، فأي اضطراب فيها بيتسبب في ظهور أعراض اكتئاب الخريف.
• اضطراب التوازن الكيميائي للدماغ: من أهم المواد الكيميائية في المخ هي مادة السيروتونين المسؤلة عن الشعور بالسعادة، ضوء الشمس بيساعد في تنظيم مادة السيروتونين، فانخفاض أشعة الشمس في فصل الخريف بيأثر على مستويات السيروتونين في المخ وده هايؤدي إلى تغيرات في المزاج، وخاصةً بالنسبة للأشخاص اللي عندهم بالفعل نشاط أقل من السيروتونين.
• نقص فيتامين د: نسبة السيروتونين بتتأثر بنقص فيتامين د، ولأن ضوء الشمس هو اللي بيساعد على إنتاج فيتامين د، فنقص فيتامين د في فصل الخريف بيأثر على السيروتونين والحالة المزاجية.
• زيادة الميلاتونين: الميلاتونين هو مادة كيميائية بتأثر على النوم وبتسبب النعاس و الخمول، فقلة التعرض لضوء الشمس ها يسبب زيادة إنتاج هرمون الميلاتونين بشكل أكثر من المعتاد، وده ها يسبب الشعور بالخمول والنعاس.

اكتئاب الخريف مشهور ومنتشر بين الرجالة والستات في سن الرشد، بس طبعاً بما انه مرتبط بالهورمونات فهو منتشر أكثر بين الستات..! ☹

ومن أهم اعراض اكتئاب الخريف..

• قلق.
• حزن.
• الشعور بالتعب الشديد انعدام الطاقة.
• عدم القدرة على التركيز.
• الرغبة الشديدة في تناول الكربوهيدرات، واللي بيؤدي لزيادة الوزن.
• مشاعر اليأس أو انعدام القيمة.
• الرغبة في الوحدة والانعزال وفقدان الاهتمام بالأنشطة المعتادة والانسحاب من الأنشطة الاجتماعية.
• الشعور بثقل في الأطراف.
• كثرة النوم والصعوبة في الاستيقاظ.
• ممكن توصل لخواطر الموت أو الانتحار..!

ازاي ممكن نتغلب على اكتئاب الخريف..؟

أياً كانت أسباب الإصابة باكتئاب الخريف، فممكن نتغلب عليه بالحاجات دي:

• العلاج بالضوء: وده من خلال التعرض إلى كمية أكبر من ضوء الشمس، لتعويض النقص في فيتامين د ومادة السيروتونين -اللي هو السبب الرئيسي لحالة اكتئاب الخريف-. فممكن نجرب النوم بدري والصحيان بدري، عشان نستمتع بأشعة الشمس الصباحية.
• العلاج السلوكي المعرفي أو العلاج بالكلام: عن طريق طلب المساعدة من المهنيين المتخصصين، والاستعانة بتجارب الأقارب والأصدقاء. 
• ممارسة الرياضة: الرياضة دايماً هي الحل الأمثل في حالات الاضطرابات الصحية والنفسية، ومن أكتر الرياضات اللي بتحسن المزاج هي الجري أو المشي لمسافات طويلة، وركوب العجل.
• الأدوية المضادة للاكتئاب: ممكن ينصح الدكتور المتخصص ببعض الأدوية المعالجة للاكتئاب، وده طبعاً لو الحالة مستدعية.
• فيتامين د: ممكن نلجأ لمكمل فيتامين د كدواء معالج.
• ممارسة أنشطة جديدة: من اكتر الحاجات اللي ممكن تساعد هي ممارسة نشاط جديد أو تغيير في الروتين اليومي، ده ها يخفف كتير من حدة أعراض اكتئاب الخريف.

اكتئاب الخريف زيه زي أي نوع من الاكتئاب -الا انه موسمي ومؤقت-، فلازم نتعامل معاه بحكمة وباهتمام عشان نقدر نتغلب عليه ونعدي التغير الموسمي ده بسلام وبأقل الخسائر الصحية والنفسية.