دليل سفريات الويك اند

مع ظروف الشغل و الدراسة و التمارين ، بقت فكرة السفر لوقت طويل مش متاحة معظم الوقت ، عشان كدة قررنا نجمع لكم سفريات تنفع جدا في الويك اند ، تغيروا جو و تتبسطوا و كمان ميزانياتها مناسبة جدا :

١-الصحراء البيضا و الصحرا السودا 

من الأماكن اللي ماكانوش منتشرين بشكل كبير علي الرغم من حلاوتهم و ال vibes   المريحة جدا بتاعتهم ، هناك ممكن تعملوا  camping  في الصحرا البيضا و تستمتعوا باحلي view  للمكان سواء في ال full moon  او في في ال star gazing   و كمان الcamping  في الصحرا السودا مختلف جدا ، كل دة دة جنب الليالي البدوية و الاكل البدوي و السهر بالليل في الصحرا بيديك  energy. حلوة جدا و تجربتها مختلفة 

٢-رأس سدر

من الأماكن اللي بتفصل فيها و مش بعيدة عن القاهرة، و دي للناس اللي بتحب البحر لان البحر هناك يجنن، و كمان الناس اللي بتحب  الهدوء و اللي بيحبوا ال kite surfing  هيتبسطوا اوي هناك 

٣-الفيوم 

من اقرب الأماكن اللي ممكن تسافروها في الويك اند و بتبعد عن القاهرة ساعة و فيها حاجات كتيرة جدا ممكن تعملوها: من  sand boarding  ل sand dunes  لزيارة وادي الحيتان ووادي الريان و الشلالات و الmagic lake  و كمان بتروحوا قرية تونس تستمتعوا بالطبيعة و تعملوا حاجات فخار و كمان تشتروا حاجات فخار حلوة من هناك

٤-اسكندرية

ديما بنقول مقولة اسكندرية ماريا ، من احلي الأماكن اللي ممكن تطلعوها في الويك اند و خصوصا في الشتا، متعة مش طبيعية، واللي سافروا اوربا عارفيين ان اسكندرية احلي من اوربا و هناك طبعا احلي قعدة علي البحر و احلي أماكن اكل و تمشية في شوارع محطة الرمل و شوارع اسكندرية اللي تجنن 

ودي كانت جولة سريعة لاماكن قريبة من القاهرة تنفع سفريات الويك اند، و كلهم هتستمتعوا فيهم بطبيعة خطيرة و أجواء تجنن و هتفصلوا من زحمة القاهرة و المشاكل اليومية هناك و ترجعوا شاحنين طاقة حلوة تساعدكم تكملوا.