in , , , ,

ماتسكتيش شهر التوعية عن العنف الأسري

مفهوم العنف الأسري في ناس كتير حاصراه  في إنه عنف الراجل لمراته ، بس الحقيقة إن العنف الأسري أو العنف المنزلي بياخد أشكال كتير :

-العنف داخل الاسرة الواحدة سواء من الأب او الأخ

-العنف من أي فرد من افراد العيلة للبنت او الست بشكل أو باخر زي الآقارب “عم، خال،…”

-العنف ضد المراة من الزوج السابق او الشريك السابق

-العنف من الزوج الحالي للزوجة

-عنف الأب لإبناءه

في دراسة عملتها منظمة الأمم المتحدة علي مستوي العالم وضحت ان تقريبا ٣٥٪ من سيدات و بنات العالم إتعرضوا لعنف منزلي أو عنف أسري في إحدي مراحل حياتهم ، يعني تلت ستات العالم إتعرضوا للنوع دة من العنف، تخيلوا بقي علي أختلاف تعريف العنف الأسري و المنزلي من بلد للتانية إلا إن تلت ستات العالم اتعرضوا له بشكل أو باخر في مرحلة ما في حياتهم، نسبة تخض صح؟ .

منظمة الصحة العالمية عرّفت العنف الأسري أو المنزلي بان له أشكال مختلفة منها :

-العنف الجسدي و اللي ممكن يبقي ضرب ، عض، حدف بالحاجات ، و غيره من أي عنف متمثل في الضرر بالجسم

-عنف لفظي و دة اللي بيقي بالشتيمة أو الاهانة أو التهديد

-العنف العاطفي و المتمثل في الأستبداد و السيطرة و التخويف

-العنف السلبي زي الإهمال أو الحرمان الاقتصادي من الفلوس مثلا

هتقولوا لي ماشي عارفين،  بس برده ستات كتير بيسألوا ، ايوة يعني نعمل ايه لما نتعرض للعنف ؟ عايزين خطوات  نعملها :

أول حاجة

مهم آوي إن كل البنات و الستات يفهموا حقوقهم ، و يفهموا إن مافيش و لا مبرر واحد إنهم يتعرضوا للأهانة من أي حد حتي لو الحد دة من العيلة ، لأن الغريب إننا بنسمع مبررات من الستات و البنات نفسهم عن العنف ، و بيقولوا إنها كانت خلاف مثلا و خرج عن السيطرة ، لا ثم لا ثم لا ، مافيش حاجة و لا مبرر يخليكي تقبلي العنف، أو تتعاملي معاه علي إنه حاجة وارد تحصل ، و لا من أب  لا من أخ و من زوج، و لا حتي من زوج قديم أو علاقة قديمة، و لا علاقة حالية، يبقي أول حاجة الادراك النفسي

تاني حاجة

الادراك القانوني

في مواد في القانون المفروض إنها تحميكي ، و احنا بنطالب أنهاردة و كل يوم بتفعيل المواد و القوانين دي ،عشان نقدر نقول إن في حماية فعلية من العنف المنزلي ، وعشان اي بنت أو ست ماتخافش و ماتسكتش.

من مشروع القانون الموحد لمكافحة العنف ضد المرأة ،  قوانين جرائم العنف الأسري ضد النساء و الفتيات واللي بتقترح الأتي  :

تعديل المادة 242 مكرر من قانون العقوبات والخاصة بالتجریم وتستبدل بالمواد الجدیدة وهي:

مادة 37

كل من أكره امرأة على الزواج، یعاقب بالحبس مدة لا تقل عن سنة، وبغرامة لا تقل عن عشرین ألف جنیه، أو بإحدى هاتین العقوبتین

مادة 38

أي قبل بلوغها السن القانونیة للزواج، أو اشترك في ذلك، أو كان ذلك الزواج فیه استغلال للأنثى أو شبهة الاتجار بالبشر، ُیعاقب بعقوبة السجن. وتكون العقوبة السجن المشدد، إن تم ذلك الزواج بموجب طرٍق احتیالیٍة، أو بناًء على مستنداِت مزورة. ومن حق من وقع علیها الإكراه تطلیق نفسها، بموجب الحكم الصادر علي المكره

مادة 39

كل شخص ارتكب فعلا، أو سلوكا عنیفا مع الإناث من أفراد أسرته، ُیعاقب بعقوبة الحبس مدة لا تقل عن ستة أشهر أو بغرامة لا تقل عن عشرة آلاف جنیه ولا تزید على عشرین ألف جنیه، أو إحداهما. ما لم ینص في قانون العقوبات أو أي قانون آخر على عقوبة أشد علي الفعل.

مادة 40

یعد مرتكًبا لجریمة الاغتصاب الزوجي كل من مارس العنف الممارس من قبل الشریك، وهو سلوك ضمن العلاقة الجنسیة بین الزوجین یتسبب في ضرر جسدي أو جنسي أو نفسي، بما في ذلك الاعتداء الجسدي والعلاقات الجنسیة القسریة والإیذاء النفسي وسلوكیات السیطرة، یعاقب بعقوبة السجن.

مادة 41

دون الإخلال بأي عقوبة أشد ینص علیها قانون آخر، یعاقب بالسجن مدة لا تقل عن خمس سنوات كل من قام بختان لأنثى بأن أزال أیا من الأعضاء التناسلیة الخارجیة بشكل جزئي أو تام أو ألحق إصابات بتلك الأعضاء دون مبرر طبي. وتكون العقوبة السجن المشدد إذا نشأ عن هذا الفعل عاهة مستدیمة، أوإذا أفضي ذلك الفعل إلي الموت

مادة 42

یعاقب بالحبس مدة لا تقل عن سنة أو بغرامة لا تقل عن عشرة آلاف جنیه مدیر المستشفى أو المؤسسة الطبیة أو المسئول الفعلي عنها متى ثبت علمه بارتكاب جریمة ختان أنثى، في المستشفى أو المؤسسة الطبیة التي تخضع لإدارته أو تحت مسئولیته، ولم یبادر إلى منع الجریمة أو الإبلاغ عنها للسلطات المختصة.” یعاقب بالحبس مدة لا تقل عن سنة، كل من طلب ختان أنثى وتم ختانها بناء على طلبه. یعفى من العقوبات المقررة كل من بادر من المذكورین بالفقرتین السابقتین بإبلاغ السلطات المختصة أو أدلى بمعلومات مفیدة في الكشف عن الجریمة وفاعلها الأصلي وشركائه

مشروع القانون كامل :

https://drive.google.com/file/d/19Z9nu9yBd0CmxzW9R8cyOhzDu4VND2BX/view?usp=sharing

كل دة لو تم تطبيقه و تفعيله هتقل جرائم العنف الأسري ، دة غير إن كل بنت و ست هتبقي عارفة حقوقها و متاكدة إن في قانون مفعل في ضهرها .

تالت حاجة  

في أماكن ممكن تلجأي لها لما تتعرضي للعنف الأسري أو لما تشوفي حد بيتعرض للعنف دة ، زي:

-المجلس القومي للأمومة و الطفولة و دة في حالة رؤية طفل بيتعرض لعنف من أسرته علي الخط الساخن ١٦٠٠٠  و كمان رقم الشكاوي علي ٠١١٠٢١٢١٦٠٠

 -وزارة الداخلية قسم حقوق الانسان تقدر تقدم المساعدة خصصت وزارة الداخلية أرقام للتواصل المباشر معها، ولتلقي شكاوى المرأة عبر أرقام الهاتف 01126977444 – 01125977333 – 01126977222

– المجلس القومى للمراة يقدم الدعم و المساندة القانونية للسيدات و يستقبل الشكاوى عبر الخط المختصر ١٥١١٥ و من خلال المقابلات الشخصية مع محامين متطوعين فى الفروع رسايل الواتس اب علي رقم ٠١٠٠٧٥٢٥٦٠٠

رابع حاجة و أهم حاجة مراكز الأستضافة

 كتير بنسمع عن حالات بيتعرضوا للعنف الأسري و بيضطروا يسكتوا و يستسلموا لإن معندهمش مكان يروحوا فيه ، بس الحقيقة إن وزارة التضامن الأجتماعي موفرة  8 اماكن لاستضافة المعرضات للعنف في محافظات في مصر ، كل اللي بتقدمه مراكز أستضافة و توجيه المرأة المعنفة، و شروط القبول، و اماكن تواجد المراكز دي هتلاقيها في اللينك دة

https://entaleqi.com/uncategorized/مراكز-استضافة-وتوجيه-للمرأة-المعنفة/

خامس حاجة

الوعي ، أهم حاجة في حالات العنف الاسري باشكاله هو الوعي ، مهم أوي انك تبقي فاهمة حقوقك، و تعرفي تدافعي عن نفسك و عن أولادك ، الموضوع مش سهل ، بس برده مش سهل إنك تتهاني، و لا سهل إنك تشوفي بنت أو ست او طفلة بيتعرضوا للعنف و نسكت ، اللي هيقولك هتثبتي إيه و ازاي؟ لا في طرق كتير ممكن نثبت بيها لو فعلا عارفين حقوقنا ، مهم أوي كمان إنك تطلبي المساعدة من المتخصصين ، لإنهم هيقولولك تعملي ايه عشان تحافظي علي نفسك و عشان تاخدي حقك،

لازم تعرفى و تتاكدى انك لو سكتى علي العنف مرة ، الموضوع هيتكرر، فلازم تاخدى قرار إنك تعملى كشف طبى و محضر،بالذات إذا كان العنف جسدي  .

الست اللى بتتعرض للعنف محتاجة دعم نفسى كبير ، عشان كدة بنقول نعرف حقوقنا و نعرف الأماكن اللي ممكن تساعدنا ، و نقّدر نفسنا، لإن الاذي النفسي اللي بيحصل نتيجة للعنف دة ممكن مش بس ممكن يدمرك لوحدك، لا كمان ممكن يدمر أولادك ، بنتك تفتكر الإهانة و العنف حاجة طبيعي إنها تتعرض لها ، و أبنك يفتكر إنه هو كمان حقه يعمل كدة في المستقبل .

في شهر التوعية بالعنف المنزلي ، أعرفي حقوقك كبني آدم أولا و كمراة ثانيا ، ماتسمحيش إنك تتعرضي للعنف و لا تقبليه ليكي أو للمحيطين بيكي ، لو شفتي أي حالة عنف اسري ماتردديش انك تبلغي ، يمكن تنقذي حد، و لو إنتي اللي بتتعرضي للعنف دة ماتتكسفيش تطلبي المساعدة من الجهات المتخصصة، أولا عشان تتخلصي من العنف و تحمي نفسك، و ثانيا عشان تقدري تتعافي نفسيا . 

Nesma Medhat

ُEntaleqi Chief Editor/Writer/Marketer/ Vlogger /Storyteller and Author for published book “إاللي إسمه إيه”

 

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

ازاي تزودي دخلك؟

الحقي خلفي….جملة ملهاش معنى مع تجميد البويضات