Have you watched Sex, Love & Goop?

مسلسل نتفلكس الواقعي الجديد و اللي بيتم اذاعته علي نتفلكس حاليا ، مسلسل في اعتقادي الشخصي مهم للمتجوزين عموما سواْ متجوزين بقالهم سنين أو لسه متجوزين جداد.

المسلسل بتقدمه غوينيث بالترو الممثلة الامريكية وسيدة الاعمال الناجحة، وكانت بتشارك بالترو في تقديم الحلقات و تحليل تجارب الكابلز، المعالجة و الصديقة ليها “ميكايلا بوم”.

  فكرة المسلسل ببساطة قايمة علي مجموعة من الأزواج الحقيقين اللي بيدخلوا في رحلة تعليمية مع خبراء  مختلفين عن حياتهم العاطفية و الجنسية، المسلسل بيبدأ مع مجموعة من الكابلز ، كل كابل فيهم معاه خبير عن الحميمية و العلافات الجنسية و الجسدية ،و بيبدوا بعمل اختبار لكل كابل في البداية عشان كل خبير يحدد طريقة التعامل مع الكابل دول ، و ايه اللي هيحتاجوا عشان يبقوا أقرب في علاقتهم و يبقوا مبسوطين مع بعض في العلاقة الجنسية.

مش إحنا كتير بنسمع و بنشوف ستات ورجالة متجوزين بقالهم كتير أو حتي لسه متجوزين، و مش مبسوطين في حياتهم الجنسية ؟  و كتيييير ربطنا دة بأننا مش فاهمين، أو مش عارفين إزاي نتبسط، و ربطناها أكتر بتربيتنا و مجتمعنا، صح ؟ أبشر يا تيمور ، المشكلة طلعت موجودة حتي في أوربا و الدول المتقدمة!اي والله زي مابقولكم كدة،  

المسلسل في نماذج حية لأزواج بقالهم 6 سنين متجوزين و مش مبسوطين جنسيا مع بعض، لإن ولا واحد فيهم عارف أصلا اهتمامته الحقيقة، و بالتالي مش بيتبسط و لا بيبسط شريكه.

المسلسل مكون من 6 حلقات و بيتكلم عن خمسة كابلز و الذ أتنين من وجهة نظري اللي فوق الستين سنة ، مع كل كابل في خبيرة بتبدأ معاهم تعرفهم اهتمامتهم الأول ،و بعدها بياخدوا الموضوع خطوة خطوة ، من أول ما بتشرح لهم التكوين الجسدي لينا و اماكن الأستمتاع المختلفة، لحد ما بيوصلوا إن تقريبا كل حتة في جسمنا ليها متعة مختلفة ، و بالتالي لما كل طرف بيتعرف علي جسمه و جسم شريكه و إيه اللي بيبسطه ، العلاقة الجنسية و بالتالي العاطفية بتتحسن جدا .

. المسلسل مش بس بيتكلم عن المتعة الجنسية بين الزوجين، لا ! بيتكلم كمان عن الحميمية و عن كيفية التواصل بين الزوجين ، و كمان عن نظرتنا لجسمنا و احتياجتنا كستات،  واللي المجتمع حصرهالنا في قوالب معينة .

في العموم المسلسل فيه حاجات مهمة لإي أتنين متجوزين و حاسيين إنهم بيتكلموا بلغة مختلفة حتي في السرير، في معلومات مهمة فعلا عن تكوين جسمنا و المناطق الحساسة فيه ، و كمان بيبن إن العلاقة الجنسية مش زي اللي إحنا فاهمينه خالص ، دة طلع في منها أنواع زي الحسية و الحيوية و الغريبة، وممكن جدا تبقي فاهمة إنك محافظة في العموم و تطلعي بتحبي العلاقة الجنسية الغريبة مع جوزك!

 أحب أقول إن مش كل حاجة في المسلسل لازم تبقي مقبولة ، بس إنتي تقدري تاخدي و تتعلمي اللي فعلا ممكن يفيدك، سواء في نظرتك لجسمك أو في اللي يسعدك في علاقتك الجنسية مع جوزك .

نيجي للناحية التقنية عزيزتي القارئة ، المسلسل معظمه متصور داخلي،  و التصوير الخارجي كان محدود ، و مع ذلك في غالبية المشاهد الإضاءة القوية و الحية كانت مسيطرة علي المسلسل،و بتدي احساس بالأمل و الاشراق لإنهم بيكتشفوا حاجات جديدة و ممتعة في نفس الوقت ، كل واحد عن نفسه وعن شريكه ،  اما الأضاءة الناعمة و الهادية فكان استخدامها اكتر في المشاهد الاكتر حميمية مرحبا المؤثرة، 

الديكوربقي كان بسيط جدا، و مرتبط بفكرة الواقعية اللي المسلسل بيعكسها ، وكان التركيز الاساسي في الديكور علي الحاجات المحدودة  اللي بيستخدموها في اكتشافاتهم زي المرايا و الألعاب الجنسية،  و التركيز الأكبر في المطلق كان عن الشخصيات و تكنيك فك طلاسم بعضهم الجسدية و الجنسية،  اكتر من التركيز علي ديكور مبهرممكن يشتت العين .

 تنوع الاحجام في التصوير علي حسب الهدف الاساسي من المشهد ، ما بين كادرات ضيقة للتفاصيل، وكادارت متوسطة لمجمل حركات معينة  أو تكنيك أو حتي حوار ، لكادرات واسعة في المشاهد الخارجية للاستشفاء ا، زي اللي حصل  مع واحد من الكابلز.

وأخيرا، ينصح بإنك تتفرجي علي المسلسل دة مع جوزك لان أنتوا الأتنين هتستفيدوا و أحتمال علاقتكم الجنسية تتحسن كتير، زي ما بنقول الستات من فينوس و الرجالة من المريخ ، ممكن المسلسل دة يبقي وسيلة لفك طلاسم اللغة ما بين الكوكبين . أتمني لكم فرجة سعيدة و حياة زوجية أسعد!