in , , ,

I’m A Sex Addict

قالك : أنا مش بإيدي أنا sex addict

قالك: أنا عندي احتياجات و إنتي مش بتديهالي 

قالك :  it was only a one night stand 

مبررات غريبة جدا للخيانة رجالة كتير بقوا بيقولوها طول الوقت للمرتبطين بيهم ، و الأغرب إنهم بيضغطوا عليكي او بيبتزوكي عاطفيا عشان تكملي معاهم بعدها عاااادي .

اللي يقولك: دة مرض مش بإيدي، و إنتي مش راضية تديني اللي أنا عايزه.

تقولي له : طيب نتجوز 

يقولك : I am sorry, I have commitment issues 

و اللي يقولك : أنا من البداية قلت لك إني مش عايز أخد خطوة جد ، بس تعالي نجرب و نشوف إيه اللي هيحصل، و إنتي وافقتي ، أنا مضربتكيش علي إيدك!

و لما تسيبه ، يرجع يعيط و يتشحتف و يقولك مقدرش أعيش من غيرك ، و علي حسب تاريخ العلاقة يبدأ مرحلة الابتزاز العاطفي و يحط عليكي مسئولية إنك لازم تقبليه ،و إن إنتي بس اللي ممكن تغيريه، فلازم تستحملي و تكملي ، و ميعديش كتير و تلاقي الخازوق اللي بعده بينور حياتك منه، و خيانة تانية، و ممكن جدا تكون مع صاحبتك أو أقرب حد ليكي عااااادي ، و برده يبقي إنتي السبب ! لإنك مش مكفياني !

الحقيقة إن الموضوع دة بقي منتشر كالنار في الهشيم ، الجميل في الموضوع هو ردود  بعض الرجالة  لما بيتكّشفوا ، و بجاحة البعض الآخر اللي بيجي آصلا يقولك ، يعني تلاقيه بيقولك انا خنتك انهاردة او أنا نمت مع صاحبتك، أو أنا كنت في سهرة و قضت الليلة مع واحدة، و بكل برود يقولك لما تنهاري قدامه و تسألي ازاي تعمل كدة؟  إيه المشكلة مادام من غير فيلنجز سو وااااات ؟ أنا مبحبش غيرك ، لكن دي نيدز يا بيبي .

سيبك بقي من كمية جلد الذات اللي بتعيش فيها البنات مع وجود تجربة زي دي في حياتها ، لأ كمان بيبقي في إحساسك طول الوقت بالمسئولية تجاهه ، و التعلق  بيه من كمية الابتزاز العاطفي اللي بيعملها فيكي ، و بيبقي صعب إنك تخرجي من علاقة مع شخص زي دة في وقت قليل، فديما نسمع عن علاقات مع أشخاص زي دول عدت التلات سنين مرتاااح ، تلات سنين عدّوا من حياتك في علاقة بتهدك أكتر من آي حاجة تانية.

في بنات بعد وجود النوع دة من الرجالة في حياتهم بتقرر  :

١-إنها تقفل باب الارتباط خالص وتتعقد، و تقعد تبكي أطلال الماضي، و تضيع حياتها في اون و اوف مع الشخص دة لصعوبة إنها تخرج من التعلق المريض بيه.

٢- تخرج من العلاقة لأقرب علاقة تانية من غير تركيز فتلبس خازوق آخر من نوع قد يكون مختلف. 

٣-تحاول تتعافي و تركز مع نفسها لفترة من غير ما تتعقد و لا ترمي نفسها في أول علاقة تيجي بعده ، تاخد وقتها إنها تزعل و تغضب و تقع ،عشان توصل للتسامح و النسيان و التوازن في علاقاتها اللي جاية .

لو  لسه خارجة من علاقة  مع شخص من النوعية اللي عندها شره جسدي بالشكل دة، و بيستغلك عاطفيا ،بننصحك إنك تاخدي وقتك في إنك تعدي نفسيا اللي حصلك معاه ، مابنقولش إنها حاجة سهلة و لا إنك هتدوسي زرار فتنسي كل ذكرياتك معاه ، بس حاولي كل ما تفتكري ذكري حلوة معاه و يوحشك، إنك تفتكري قهرة قلبك لما عرفتي بخيانته، أفتكري إنه وصّلك في أوقات كتير إنك مش كفاية بالنسبة له، و هز ثقتك في نفسك ، خدي وقتك إنك تتعافي من الإدمان اللي حطك فيه .

 بعد ما تعدي مرحلة التعافي من العلاقة دي ، في شوية حاجات لازم تفكري فيها في علاقتك اللي جاية : 

١-مافيش حد بيتغير فبلاش تلعبي دور الدكتور النفسي، لو من البداية واضح إنه مريض بشكل جسدي او عنده فوبيا من الارتباط، ماتحاوليش آصلا معاه ، دة هيبقي تضييع وقت. 

٢- أنتي قيمتك كبيرة واللي هيكون معاكي لو مش بيحسسك بده وديما بيبين عيوبك، أبعدي عنه، لإنه في الغالب هيبقي عنده عقّد نقص و هيطلعها عليكي.

٣-العلاقات أصلا صعبة ومرهقة وفيها تفاصيل كتير، فأختاري البيكدج اللي تريحك عشان تقدري تكملي فيها، مش اللي تزود ارهاق العلاقات عليكي .

٤-حطي نفسك أولوية، يعني ماتدخليش علاقة من باب الزهق ولا عشان تنسي، أدخلي علاقة عشان تحسي فيها بالحب و الآمان، وإنك متقدرة ،و اللي معاكي شايفك من أهم أولوياته مش ضيفة علي حياته.

ماتختاريش مدمن العلاقات الجسدية ولا اللي خايف من الارتباط ولا الفخور بكل ال one night stands  

أختاري اللي يحب يكمل معاكي بقية حياته، و يشاركك الحلو و الوحش، أختاري اللي يشوف علاقتكم الجنسية وسيلة لسعادتكم و بتعبر عن حبكم و التزاماكم تجاه بعض، مش هدف في حد ذاته منك، أختاري اللي يحترمك في وجودك وفي غيابك .

وفي الأول والآخر أختاري نفسك… وأختاري اللي يقدرك

Useful articles about sex addiction : https://www.healthline.com/health/addiction/sex https://americanaddictioncenters.org/sex-addiction https://www.webmd.com/mental-health/signs-sex-addict

Nesma Medhat Writer/Marketer/ Vlogger /Storyteller and Author for published book “إاللي إسمه إيه”

 

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

الحقي خلفي….جملة ملهاش معنى مع تجميد البويضات

Yes, We can do both!