الي كل فتاة تواعد رجلا منفصل و ليس مطلق

لما قررت اكتب في الموضوع دة أول حاجة جت علي دماغي جملة من فيلم عربي قديم و هي ” الي احمد إبراهيم القاطن بدير النحاس لا تشرب الدواء الدواء فيه سم قاتل ” ، و بالتالي قررت إن اول جملة اقولها لاي بنت بدات تنجذب او تدخل في علاقة مع راجل “بيقول” انه منفصل بس لسه ماتطلقوش ؛

الي كل فتاة تواعد رجلا منفصل و ليس مطلق … العلاقة فيها سم قاتل !

في الفترة الأخيرة اتكرر قدامي نفس السيناريو اكتر من ٣ او ٤ مرات لبنات في منتهي الذكاء و الجمال و من عائلات كويسة جدا ، السيناريو بيحصل كالاتي :

-بتقابل راجل سواء بقي في جيم ، في مناسبة، او حتي أصدقاء ، و من بداية الانجذاب الطبيعي ان البنت بتسأل عن حالته الاجتماعية

-الراجل بيقول انه منفصل بس لسه ماخدش خطوة الطلاق

-مش بيعيب في مراته بس بيقول انها آذته نفسيا/ مابقاش حاسس حاجة/ استحملها كتيرلحد ما بقي مش قادر يكمل 

-غالبا بيكون في ولاد

-غالبا برده بيقولها ان الولاد مايعرفوش انهم منفصلين عشان نفسيتهم

-قرار الطلاق اللي موقفه فيه هو بس الولاد! و هو مش واثق انها مش هتضايقه بالولاد لو قرر الطلاق ، و ممكن تحرمه يشوفهم ، بس هو متمسك بيكي جدا و عمره ما حس بالمشاعر و الراحة دي مع حد

-انه قراره نهائي و مافيهوش رجعة هي بس مسألة وقت عشان عايز ينفصلوا بتحضُر و بهدوء،  و بيأكد انه متمسك بيكي جدا و عمره ما حس بالمشاعر و الراحة دي مع حد

-غالبا بتبقي سايبة البيت و هو اللي في البيت -سيناريو متكرر- و طبعا كان بيكلمك فيديو كول و دة اكبر دليل انه مابيكذبش و انها مش في البيت و فعلا منفصلين!

-هوووب يقولك ” انا اتفاجت انها رجعت البيت و مش عارف اعمل ايه ، بس انا هكلمها اني مش عايز اكمل ، و انا متمسك بيكي برضه”!

-هووووب هي متمسكة بيا و مقطعة شرايينها عليا و بتنهار لما بكلمها في الطلاق

-هوووب انا مش عارف اعمل ايه و مش عايز اوعدك بحاجة و انا لسه مصيري مجهول

-هووووب انتي قلبك يتوجع و تحسي بخيبة الامل 

قصة قصيرة حزينة!

عشان كدة بقول لكل واحدة بدأت تتشد لراجل بيقول انه منفصل بس لسه ماطلقش : بلاااااش ، ماتوجعيش قلبك بايدك!

هقولك ليه:

اول حاجة : المنفصل دة لو كان كلامه صح أصلا ، بيبقي عايز يحس بنفسه و برجولته و بانه لسه مرغوب، و بالتالي بروح لاي ست او بنت بتديله بربع جنيه اهتمام 

تاني حاجة، الراجل في الحالة دي بتبقي قرارته كلها مذبذبة و مش عارف أصلا هو عايز ايه و لا مستعد لعلاقة جدية جديدة، فانتي هتبقي بالنسبة له ريباوند واضح و صريح !

تالت حاجة ، مهما قلتي لنفسك مافيش توقعات الا انه بيبقي في جواكي توقعات و لما مابتحصلش بتتوجعي و بتزعلي علي نفسك

آخر حاجة بقي ، اللي عايز يطلق بيطلق ، سيبك من جو الولاد و الكلام دة، كل دة بيبقي أي كلام بيقنع بيه نفسه لانه مش قادر او مش جاهز ياخد القرار ، فمتحطيش نفسك في موقف انه يبقي كانك مستنية بواقي راجل لسه مربوط في علاقة!

مش عيب خالص انك ترتبطي او تتجوزي راجل كان متجوز و مطلق، لان الحياة تجارب و اختيارات، لكن لما تختاري تقربي لراجل اختاري تقربي لراجل كامل الإرادة انه عايزك ، راجل حر ، قادر ياخد قرارته بشكل جدي و حاسم تجاه حياته و تجاهك!

ماتبقيش اوبشن لحد، خليكي ديما الاختيار الأول و  الحقيقي بمجهود و رغبة صادقة من الراجل اللي هيبقي شريك حياتك!