ايه اكتر حاجة مهمة في الجواز؟

السؤال اللولبي دة حياة بني آدمين كتير بتتوقف عليه ، حرفيا يا جماعة مش هزار ! هقولكم ليه ، الجواز كمنظومة و خصوصا في بلادنا العربية و خصيصا في مصر صعب شويتين تلاتة، مش بس ماديا ، لأ! نفسيا و معنويا كمان،

يعني تعالوا كدة نشوف رياكشنات البنات و الستات ، و في بعض الأوقات الرجالة، لما بيلاقوا علاقة جواز حلوة و مستقرة و طويلة،

 اييييييه ، انت بتقووووول اييييييه؟ 

حلوة،

ومستقرة،

وطويلة؟

دي بقت حاجة نادرة اليومين دوول اننا نلاقي جوازات بالشكل دة ، وخصوصا خصوصا بين أكثر الأجيال حظا، حبايبي، جيل التمانينات و التسعينات، 

يعني ممكن نلاقي المثال دة في الجوازات القديمة شويتين أو نتفرج عليها بقي في بوستات ، لما تختاري أختاري صح ، و اختاري اللي تعجّزي و انتي مبسوطة معاه، و هكذا.

طب بجد بجد بقي ، عارفين ايه اكتر حاجة مهمة في الجواز؟

الحواااار!

اهم حاجة في أي جوازة إنه الطرفين يعرفوا يخلوا في بينهم حوار ، ووالله في العلاقات الإنسانية عموما الحوار هو مفتاح التفاهم،

اد ايه علاقات و جوازات باظت و انتهت لانه كل طرف من الطرفين فاهم حاجة غير التاني، او بيفكر في حاجة و بيخليها جواه و الطرف التاني مايعرفش عنها حاجة أصلا، و هووب تلاقيه بيحاسبه علي اللي جواه و مش قايله و مش بيحاسبه بمعني انهم بيتناقشوا لا قدر الله و لا حاجة، لأ، بيتخانق معاه علطول ، او يعاقبه علي حاجة هو بس اللي شايفها او حاسسها من غير ما يعرف راي او إحساس الطرف التاني فيها، بتتنسي في المرحلة دي خالص انهم شريكين حياة، و انه لازم يتناقشوا و يتفاهموا و يقولوا اللي حاسينه لبعض عشان الاتنين يعرفوا يحلوا و يتفاهموا و يسامحوا و حبل المودة و الرحمة اللي بينهم مايتقطعش!

كام واحدة مننا بتسمع من اللي حواليها عن خناقاتهم الزوجية، او حتي من اللي عايزين ينفصلوا ، كل طرف بيحكي حاجة و حدوتة مختلفة ، دة شايف انها بطلت تحبه و مش بتقرب له، و دي شايفة انها بتهون عليه و مش شاريها!

مع ان الاتنين لو قعدوا و اتكلموا مع بعض من غير عند و لا تكبر ، و قالوا اللي فعلا حاسينه لشريك حياتهم ، الموضوع كله هيختلف،  اقولكم ازاي؟

أولا: هيبقي في مساحة انك كل طرف يقول اللي حاسه بجد للطرف التاني، و يخليه يحط نفسه مكانه، يعني مثلا، انت لما قلت لي كدة ان حسيت اني مش مهمة عندك ، حط نفسك مكاني!

ثانيا: أي افتراضات في دماغك عن تصرفات الطرف التاني هتبقي أوضح لما يشرحهالك، مثلا انت بطلت تحب تخرج معايا ، ممكن جدا يبقي السبب من وجهة نظره انه فاهم انه كده بيريحك اكتر بانكم تقضوا الاجازة في البيت لو انتي طول اليوم بره.

ثالثا: هتقللوا الصدامات اللي بينكم ، لان معظم المشاكل بتخلص اول بأول ، مش بتفضلوا تراكموها جواكم لحد ما تنفجروا في وش بعض علي اتفه سبب.

رابعا: كل حوار ما بينكم بتدوا لنفسكم و لعلاقتكم فرصة جديدة، بتدوا لنفسكم مساحة انكم تقربوا لبعض اكتر و تفهموا بعض اكتر ، خصوصا ان كل واحد فينا بيتغير مع الوقت ، و بينضج بشكل مختلف، فلو شريك حياتك فاهم التغيير و النضج دة ، و انتوا الاتنين بتساعدوا بعض في مرحلة التغيير و النضوج دة ، و بتعايشوه مع بعض، هيبقي مافيش ابدا جاب في تفكيركم و لا هتصحوا من النوم الصبح تقولوا مين اللي انا عايشة معاه دة؟ مش شبهي و مش فاهمني !

وجود حوار في أي علاقة هو سبب لاستمرار و نضج العلاقة دي، و خصوصا الجواز! 

الحياة عموما صعبة والجواز مش تجربة سهلة، بس اللي بيسهل حياتنا وبيطول في عمر جوازتنا بحب و ارتياح هو الحوار!

اتكلموا مع بعض، ماتتكسفوش و ماتعاندوش ، لحد ما تبقوا في يوم من الأيام من الأمثلة اللي بنشوفها بنفتح بوقنا ، لحد ما تبقوا من الجوازات الحلوة ، و المستقرة، و الطويلة!