in , ,

ازاي نشارك ولادنا في ظروفنا الاقتصادية من غير مانشيلهم الهم

طبعا مع الظروف الاقتصادية اللي حاصلة حاليا في مصر و في العالم كله، بقي مهم جدا نشرك ولادنا في الظروف دي عشان كذا سبب منهم:

١-نعلمهم قيمة اللي عندهم 

٢-يعرفوا يحسنوا استخدام الموجود

٣-يبقوا كائنات منتجة اكتر منهم مستهلكين

٤-يراعوا الضغوط الاقتصادية و يفهموا ان ظروف العالم كله حاليا بتتغير و بالتالي لازم نتجه للتوفير

٥-هيساعدهم يطوروا شخصياتهم و يتحملوا المسئولية احسن 

طيب هنعمل دة ازاي ؟

أولا: لازم احنا نفسنا نحاول نسيطر علي استهلاكنا قدامهم و نحاول نكون قدوة ليهم، فالبداية ديما من عندنا احنا الكبار اننا نطور نفسنا عشان نقدر نعلمهم

ثانيا: من و هما صغيرين مهم اوي يبقوا عارفين المتاح مننا ليهم، يعني حتي في سن صغير جدا و احنا واخدينهم نشتري لهم لعبة لازم يعرفوا او نكون متفقين معاهم من الأول هنشتري حاجات اد ايه؟ يعني مثلا احنا انهاردة هنشتري لعبة واحدة، فلازم نلتزم بكلامنا و لو عيطوا او زنوا علي حاجة تانية ، لازم مانقبلش و نوضح لهم اننا متفقين علي حاجة فلازم ننفذها ، مرة في مرة هتلاقوهم بقوا فاهمين و مدركين، و ممكن يبقي الاتفاق اننا هنشتري حاجات بفلوس اد كذا، يعني ماينفعش نعدي البدجيت المحطوطة و نفس الكلام في التطبيق عشان يتعودوا

ثالثا: مهم جدا من وقت للتاني نحاول نشركهم في اعمال خيرية ، و نخليهم يزوروا أماكن الناس فيها امكانياتهم محدودة، او يزوروا أطفال مرضي و يساعدوهم، او ينزلوا معانا في توزيع اكل و غيره، لان الحاجات دي بتعلمهم بشكل غير مباشر يقدروا النعمة و يحمدوا ربنا علي اللي عندهم ، و كمان بيطور عندهم فكرة العطاء

رابع حاجة: المناقشة، و دي حاجة مهمة اوي في الأيام اللي احنا فيها، يعني مهم نشرح لهم لو وضعنا الاقتصادي اتير ، او هنكون مزنوقين لوقت معين ، او اننا محتاجين نقلل مصاريفنا ، و نحاول نديهم مساحة يفكروا معانا ممكن نقلل مصاريفنا ازاي، لان دة بيديهم مسئولية و كمان بيطور شخصيتهم للاحسن و بيحسوا انهم جزء من المسئولية العامة للبيت

خامس حاجة: نبدأ نفكر معاهم في إعادة تدوير الحاجات ، ودي حاجة بتكون لذيذة جدا لما بنقع دمعاهم نتفرج علي فيديوهات و نطبقها ، و ممكن منها نجدد لبس قديم و بالتالي مانشتريش جديد، نجدد حاجة في البيت ، نعرف استخدامات اكتر لحاجات موجودة عندنا ، و كمان وصفات اكل جديدة من باقي الاكلات اللي عندنا 

طبعا مع الضغوط الاقتصادية اللي بقي الكل فيها ، بقي ترشيد استهلاكنا حاجة ضرورية مافيش فيها كلام، ولان ولادنا جزء كبير من حياتنا و من مسوليتنا فلازم نعلمهم و نشركهم و نخليهم يعرفوا يقدروا المتاح و يبتكروا منه كمان حاجات جديدة تنفعنا كلنا ، دمتم مدبرين و مُربين و منُتجين !

بقلم نسمة مدحت

Nesma Medhat ُEntaleqi Chief Editor/Writer/Marketer/ Vlogger /Storyteller and Author for published books “إاللي إسمه إيه”& “أصل المثل

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

دليل سفريات الويك اند

حل لازمة المدرسين و صعوبة المناهج اللي بتزيد