٥ نصائح لتربية أطفال سوية

تربية أطفال سوية في الوقت الحالي موضوع صعب شويتين تلاتة، و ابدا مافيش ضمانات ، بس ديما في اجتهادات و محاولات لتربية أطفال سوية.

بمناسبة عيد الام ، اليكي ٥ نصائح لتربية أطفال سوية:

١-تصالحي مع ذاتك 

اول خطوة في انك تربي ولادك تربية صحية و سوية ، هي انك تتصالحي انتي شخصيا مع ذاتك ، و مع ماضيكي، و مع عقدك و كلاكيعك،

مهما حاولتي ولادك بيتاثروا بمشاكل طفولتك و عقدك اذا ماتصالحتيش معاهم ، بشكل او باخر اللعقد و المشاكل دي بتطلع عليهم و بتديهم قلق و توتر نفسي من حياتك و مشاكلك انتي ، مش مشاكلهم هما، فاول خطوة و اهم خطوة انك تتصالحي مع ذاتك ومع طفولتك و ماضيكي قبل ما تقرري تجيبي أطفال، او حتي بعدها ، المهم تحلي مشاكلك مع نفسك عشان ماتاثرش علي ولادك.

٢-قولي الحقيقة

من اهم الحاجات اللي ممكن تعمليها و انتي بتربي ولادك هي انك ديما تقولي الحقيقة، و لو بشكل مبسط علي حسب سنهم عشان يقدروا يفهموا و يستعبوا، 

بلاش تقللي من ذكائهم و تتعاملي معاهم بمنطق طنط الشريرة هتيجي تاخدك، ولا بصي العصفورة اللي هناك، الجيل دة ذكي جدا جدا ، و مابينساش، فبلاش تكدبي عليهم لانه أولا هتتقفسي، و ثانيا مش هيثقوا بعد كدة في كلامك، و ثالاثا هيقلدوكي و يكدبوا.

٣-خليكي اد كلمتك

كل مرة تتفقي مع ولادك علي حاجة لازم تنفذيها، و لو منفذتيهاش لازم تشرحيلهم مانفذتيهاش ليه؟ لانه ببساطة لما بيتاكدوا انك ديما بتنفذي اللي بتقوليه، بينقلهم فكرة الوضوح و المسئولية ، بتديهم ديما درس غير مباشر انك لو قلتي حاجة لازم تلتزمي بيها، و دة بيخليهم يعملوا زيك و مايقولوش حاجة مش ادها او مش هيلتزموا بيها.

٤-قللي المقارنات

مشكلة معظم الأمهات دلوقتي انهم أصلا اتربوا غلط علي فكرة المقارنات، و كتير بيطبقوها لسه مع ولادهم، يعني بصي اخواتك اشطر منك، اصحابك احلي منك، بنات خالاتك بيسمعوا الكلام عنك، طبعا أوقات كتير بتحصل لا ارادي ، بس علي اد ما نقدر نقلل المقارنات، و لازم ناكد في ولادنا، انه مش لازم خالص كلنا نبقي زي بعض ، كل واحد مختلف و حقيقي و نادر ومميز بنفسه، ومش لازم نبقي كلنا قطيع، المهم اننا نبقي بنخلي بالنا من نفسنا و صحتنا و نضافتنا و مستقبلنا عشان نفسنا، مش عشان ماما عايزة كدة، و لا عشان ابقي احسن من س ، ص ، ع .

٥-اسمعيهم كتير و خليهم شبعانين حب

طبعا مقدرة جدا من مجهود الحياة عموما علي الأمهات و خصوصا علي الأمهات اللي بتشتغل ، اد ايه بيبقي صعب يكون في طاقة تقعدي تسمعي كلام عشوائي من ولادك خصوصا لو في سن صغير ،

بس علي اد ما هي ممكن تبقي مرهقة ليكي علي اد ما هي مهمة، لما ولادك بيحسوا انك بتسمعيهم و بنركزي في كلامهم و تناقشيهم فيه حتي لو عن لون التيشيرت اللي لابسينها، بيحسوا باهميتهم و ان ليهم شخصية و كلامهم متقدر ، و ودة بيقوي ثقتهم في نفسهم و في فيكي.

و لازم تخليهم شبعانين من حبك، قولي لهم بحبك كتير، احضنيهم كتير ، لان لو الطفل طلع جعان حب و حنية من بيته عمره ما هيعرف يبقي طفل سوي، و لما يكبرهيفضل يدور علي أماكن يعوض منها الحب دة و اللي كتير بتبقي غلط و مؤذية ليه، خليكي ديما منبع الثقة و المان و الحنية لاولادك.

تربية الأولاد مش حاجة سهلة، و تربية أطفال اسوياء محتاجة مجهود كبير، بس لازم تفتكري ان الموضوع فعلا يستحق،

لازم تعرفي انك المسئولة عن وجود شخصية و كيان مستقل في الحياة، فحاولي و انا بحاول معاكي اننا خلي بالنا من ولادنا ، و نحاول نطلعهم شخصيات سوية، يعرفوا يخلوا بالهم من نفسهم و يعرفوا يفيدوا غيرهم في مشوار حياتهم.

تربيتك لطفل سوي اكبر نجاح في حياتك!

الامومة مش سهلة بس مستاهلة!