Is Yoga helpful for kids?

السؤال دة مهم جدا ، ليه بقي ؟ لان الحقيقة اننا كناس كبيرة كتير مننا بدأ يفكر في اليوجا بعد ما كبرنا ، وفكرنا فيها لاسباب معينة زي :

الضغوط النفسية اللي بنقابلها في حياتنا

التعب و الإرهاق الجسدي من ساعات السواقة الطويلة

ضغط الشغل او المذاكرة

صعوبة التحكم في ردود الفعل نتيجة للضغوط

بندور علي رياضة تساعدنا نلاقي سلامنا النفسي

طيب دة بالنسبة لنا و مفهوم، بس بالنسبة للأطفال هل دي حاجة مهمة كمان؟ 

الإجابة اه عارفين ليه؟

السوشال ميديا خلت معظم الأطفال هايبر زيادة

العنف اللي الأطفال بقوا بيشوفوه بشكل كبير سواء في الكرتون او الألعاب

مع ضغوط التنمر اللي بتزيد بقي صعب ان الأطفال يعرفوا يعبروا عن نفسهم

الحالات المرضية المختلفة للأطفال سواء كانت فرط حركة او تشتت انتباه او غيره

من احلي الحاجات اللي شفناها هو الشغل اللي عملاه نهي فرج في يوجا الأطفال ، نهي قصتها ملهمة جدا ، نهي بدأت اهتمامها باليوجا بسبب بنتها اللي عندها داون سيندروم و الهمتها انها تحاول تتعامل معاها بطرق مختلفة، في رحلة نهي مع بنتها بدأت شغفها باليوجا و قررت تعمل يوجا مخصوص للأطفال .

نهي عملت يوجا مخصوص للأطفال و دمجت فيها أطفال الداون سيندروم مع باقي الأطفال و عملت الموضوع بشكل مسلي جدا :

-اعتمدت علي دمج حركات اليوجا مع الموسيقي المعروفة عند الأطفال

-دمجت شخصيات الكرتون المحبوبة عند الأطفال باليوجا في مواقف درامية يلعبها الأطفال

نهي قدرت تحقق معادلة صعبة بشكل مسلي للأطفال ، لان اليوجا بقت مهمة للأطفال حاليا زي الكبار بالظبط ، وعشان كدة نهي بتهتم جدا ان اليوجا للأطفال اللي معاها تحقق اكتر من هدف :

-الالتزام

-الابداع

-التعبير عن النفس

-احترام الآخر واحترام الاختلاف

-زيادة الثقة في النفس

-تقدير الطفل  لجسمه وامكانياته

-تعلم التمرين وسط مجموعة واللعب جوة مجموعة

-ازاي  الطفل يتحكم في  غضبه وفي انفعالاته

-التغلب علي الكسوف

-توسيع الأفق للخيال

-التعبير عن نفسهم وعن مشاعرهم 

الحقيقة اننا بنشجع كل الأمهات انها تقرب من ولادها و تحاول تساعدهم يتعرفوا علي نفسهم و يحبوها و يقبلوها، و كمان يتغلبوا علي المشاكل اللي ممكن تقابلهم في حياتهم.

 و عشان كدة قصة نهي مهمة لاكتر من سبب ، يعني  غير انها ملهمة لانها بدأت كل دة عشان تلاقي طريقة مناسبة تتعامل بيها مع بنتها ، الا انها  كمان قررت تساعد باقي الأمهات و الأطفال عن طريق كلاسات اليوجا للأطفال و اللي المداومة عليها بتحسن جدا من شخصية الأطفال وبتعزز ثقتهم في نفسهم و بتهدي طباعهم مع دوشة الحياة اللي بقت حواليهم!

اليوجا زي ما هي مهمة لينا هي كمان مهمة جدا جدا لاولادنا ، وزي ما بنهتم بلبس و اكل و شرب ولادنا كمان لازم نهتم بصحتهم النفسية و نحاول نخليهم يتعلموا حاجات تأثر في شخصياتهم و تفيدهم ، دمتم أمهات واعيين !