!ستات قرروا يحققوا حلمهم

كتير مننا بقوا يفكروا إنهم نفسهم يعملوا مشروع بتاعهم ، حاجة يبقوا بيحبوها  يستثمروا وقتهم فيها ، و بدل ما أدي مجهودي ووقتي لشغل ثابت ، أنا عايزة أقرر أعمل مشروع بتاعي للحاجة اللي بحبها ، أكبّرها و أكبر معاها ،في ناس بيقعدوا سنين يفكروا و ما يقرروش ، و ناس فكروا و قرروا و عملوا وحققوا.

في المقالة دي نماذج قرروا يعملوا المشروع بتاعهم و نفذوه فعلا علي أرض الواقع :

١- مريم

مريم و جوزها و شريكها هاني ، قرروا يعملوا مشروع مختلف شويتين ، عملوا “جرين هاوس” ، و جرين هاوس مشروع فكرته معتمدة علي إنهم يسهلوا علي كل الناس إنهم يأكلوا سلطة و خضار كتير ، 

إزاي؟ 

قرروا في ٢٠١٧ يسيبوا شغلهم ، و يبدوا مشروعهم بعمل سلطات جاهزة و متقطعة و جاهزة للأكل علطول ، و غلفوها و بقت جاهزة ، بدل ما بتضيعي وقت كتير في غسل الخضار و تقطيعه للسلطة ، هما سهلوها عليكي جدا ، و بعدها كبروا المشروع بإنهم دخلوا أنواع الخضار المختلفة ، و في ٢٠١٩ زودوا درسينج للسلطات و للوجبات الخفيفة ، 

أحلي حاجة في جرين هاوس إن كل حاجتهم فريش ، و منتجاتهم موجودة في معظم السوبر ماركت، و أونلاين،و علي الويب سايت بتاعهم . 

https://www.instagram.com/greenhouse.egy/

٢- هادية

في ٢٠١١ ، هادية بدأت حلمها من أودتها الصغيرة بإن يبقي ليها مشروعها ، هادية مصممة جرافيك ، و بدأت “كريزي آرت” الأونلاين ، و بعدها المشروع كبر لما أتعرفت علي محمود اللي كبر الفكرة و أشتغل أكتر علي التسويق ، 

كريزي آرت أساسه الديزاينز المطرقعة و اللي عليها كوميكس من أكتر الحاجات اللي بنحبها ، هدفهم الأساسي كان إن كل قطعة في كريزي آرت تبقي بتعبر عن اللي بيشتريها و بتضحكه لما يبصلها ، 

المشروع كبر و دلوقتي بقت شركة بتنتج حاجات كتير مختلفة من مجات و شنط لاب توب و نوت بوك و غيرها ، و تقدروا تطلبوا منتجاتهم أونلاين من علي إنستجرام أو من علي الويب سايت بتاعهم. 

 

ccrazyart.com

https://www.facebook.com/CCrazyArt

https://www.instagram.com/ccrazyart/

٣-نرمين

نرمين    طول عمرها بتشتغل في ال corporates و من ٢٠١١ قررت تاخد بريك و تخلي بالها من صحتها و صحة عيلتها ، وقررت تحول شغلها و تبقي Health Coach ، و فعلا درست و بقي عندها عملاء كتير بتساعدهم يعيشوا بشكل صحي، 

بس في مشكلة قابلتها ، إنها ماكنتش بتلاقي بدايل صحية للمنتجات اللي المفروض ياكلوها ،

و من هنا جت الفكرة ، ليه هي ماتعملش البدايل دي ؟

و بدأت فكرة  Honey & Dough ، و فعلا بدات تعمل مخبوزات صحية بدقيق الحبة الكاملة ، و كبّرت المشروع و عملت بدايل كتير صحية للأكل ، و دلوقتي بتعمل مخبوزات و سندوتشات و جاتوهات و بيتزا بمكونات كلها صحية،

هما دلوقتي موجودين في كل السوبر ماركت الكبيرة في القاهرة و الساحل و السخنة، و عندهم فرع في الشيخ زايد اللي بيبع كل مخبوزاتهم فريش . 

https://www.instagram.com/honeyanddougheg/

٤- منة

منة درست تصميم أزياء ، و كانت بتحلم تعمل علامتها التجارية الخاصة بيها ، و اللي حققتها فعلا باسم “منة بودي”  و اللي بتعمل فيه تصميمات لأكسسورات مختلفة ، منة بتحب جدا العمارة و الفن في العصور المختلفة و دة اللي بتطلعه في تصميماتها ، 

منة بتبيع شغلها أونلاين ، و كمان عندها الفرع بتاعها في الزمالك ، و كتير من المشاهير بيلبسوا من تصميماتها.

 

https://www.instagram.com/mennaboudy/?hl=en

٥-ياسمين 

ياسمين خريجة إدارة أعمال و أم لأربع أولاد ، و قررت بعد ١٦ سنة قاعدة في البيت إنها تحقق شغفها و بدأت مشروعها “جلوس هاوس” ، بعد ما اخدت كورساتها في الرسم الزيتي و صب الأكريليك وصلت إنها تتعرف علي الأيبوكسي رزين ، وبدأت مشروعها بيه ،

مشروعها عبارة عن إكسسورات للبيت كلها معمولةيدويا من الرزين ، الذ حاجة في الموضوع إن الايبوكسي رزين إنه عمره ما هيطلع منتجين شبه بعض ، فكل قطعة هتبقي هي قطعة واحدة بس و دة بسبب أختلاف الوانه و التقنيات اللي بتستخدمها ياسمين ، 

من أحلي الحاجات في ياسمين إنها بدأت مشروعها في سن الأربعين بحاجة مختلفة و جميلة زي جلوس هاوس.

.https://www.instagram.com/gloss_house/?hl=en

كل المشاريع دي بدأت بفكرة و حلم ووصلت لقرار فحققت نجاح ، لو عندك حلم أو فكرة ماتردديش إنك تشتغلي عليها و تعمليها ، مافيش أحلي من إنك تأمني بفكرة و تنفذيها و تشوفيها بكتبر قدامك ، و تحسي بنجاحك في اللي بتحبيه .

شجعوا بعض و شجعوا المشاريع اللي أصحابها بجد مأمنين و مصدقين ، لإنهم بيطلعوا لكم الشغل بحب حقيقي و مجهود من القلب.