!ماتكرريش الغلطة

من وإحنا صغيرين و في كتير مننا اُمهاتهم بشكل غير مقصود ، ربوا عندهم عقد و كلاكيع صغيرة و حلوة  كدة، وكبروا و ما شاء الله عقدهم كبرت معاهم  ، اللي اخدوا بالهم من الكلاكيع دي ، بقوا بيحاولوا ديما مايبقوش زي اُمهاتهم ، أعرف كتير من صحباتي كان أكبر رُعب عندهم إنهم يتحولوا لصورة من اُمهاتهم لما يكبروا ،  فقرروا في حياتهم يختاروا إختيارات مختلفة عن اُمهاتهم ، يعيشوا بشكل مختلف عنهم ، ودة مش كره في اُمهاتهم،  بس كره للواقع اللي اتربوا عليه، و عدم قبول الأمهات للاختلاف مع بناتهم ، وإن الأمهات في أوقات كتير ماكانوش بيدوا مساحة لبنتاهم ،و كانوا عايزينهم نسخة من الصورة اللي في دماغهم و اللي من وجهة نظرهم أحسن .

الحقيقة اللي كتير من الأمهات مش فاهميناها إن مافيش أحسن و أوحش ، لإن كل حد مننا مختلف عن اللي باقيين ، وببساطة ولادنا مش فأر تجارب و لا وسيلة لتحقيق أحلامنا اللي معرفناش نحققها لنفسنا ، فلازم نزقهم يحققوها حتي لو مش حابينها ، ولا إن ولادنا المفروض نطلعهم صورة طبق الآصل مننا

يعني أنا أعرف واحدة صديقتي و في زيها كتير ، أهلها حصروها في أختياراتهم ، و اللي كان أبرزها الكلية اللي دخلتها عشان كل العيلة خريجة الكلية دي ، يعني هتكفري؟ أكيد لازم تدخليها عشان بابا و ماما مايزعلوش ! طيب هي أصلا كانت عايزة إيه أو بتحب إيه؟ مش مهم .

يمكن ماكنش إختيارنا أهالينا ربونا ازاي؟  بس دلوقتي إختيارنا إننا نعبر عن نفسنا بجد ، و إختيارنا إننا بنربي و هنربي أولادنا إزاي ؟

التربية مش حاجة سهلة ، و لا الأمومة حاجة سهلة ، يمكن كتير من اُمهاتنا ماكانش عندهم الوعي اللي عندنا دلوقتي ،  بس دلوقتي بإيدك تربي ولادك بشكل أحسن من اللي أتربينا بيه ، و بشكل يناسب الوقت اللي إحنا فيه و الإمكانيات المتاحة لأولادك ، لازم تعرفي إمكانياتهم و تساعديهم يطوروها .

من خلال تجربتي الشخصية لقيت إن في شوية خطوات ممكن تساعدنا في تربية ولادنا :

أول حاجة :

حاولي تتكلمي معاهم كتير، وتفهمي هما بيفكروا في إيه ؟ وديما أقراي اللي بين السطور ، هي ممكن تحكي لك فيلم بس هي في حاجة تانية عايزة توصلهالك، ركزي معاها كويس .

تاني حاجة :

إبعدي خالص عن جو أهالينا بتاع بصي العصفورة، أو إنك تسرحي بيهم ،أو تقولي كلام مش منطقي ، ما شاء الله الجيل دة ذكي جدا و هيفقسك و يخلي شكلك وحش ، فمتحاوليش تسرحي بيهم.

تالت حاجة :

علميهم إن اللي بتقوليه بتنفذيه ، يعني برده بلاش جو نامي عشان بكرة نروح باااي ، وبكرة يجي فتعملي من بنها و تتوهي ، لإنهم ببساطة  مش بينسوا و بالعكس بتخليهم بعد كدة مايصدقوكيش و لا يثقوا في كلامك.

رابع حاجة :

لما يسألوكي الأسئلة الوجودية أو حاجات صعبة تشرحيها ، بلاش كلمة لما تكبري ، حاولي تشرحيلهم بشكل مبسط الحقيقة ، حتي لو حاجة صعبة ، لإن دة هيعودهم علي إنك مصدر المعلومات الصح ، ولو مش عارفة قولي إنك هتسألي و تعرفي الأجابة و تردي عليهم عشان يبقي في ثقة و تفضلي المصدر المضمون للمعلومات .

خامس حاجة :

بلاش جو المعسكر في البيت للمذاكرة و شيتات طالعة و شيتات نازلة ، ذاكري لأولادك آه،  و عرفيهم إن الدراسة دي ليهم في الآخر ، لو نجحوا لنفسهم ولو فشلوا لنفسهم ، و إنتي اللي عليكي إنك تساعدي ، بلاش تخلي حياتهم جحيم من المذاكرة و تخسروا علاقتكم ببعض عشان الدراسة ، حسسيهم بالمسئولية تجاه نفسهم في المذاكرة ، و بلاش فقرة مين جايب اعلي منك ليه ؟ إحنا مش في سبق ! خلي ولادك يهتموا بنفسهم و يخافوا علي مستقبلهم عشانهم ، مش عشان يبقوا أحسن من حد تاني .

سادس حاجة :

هوب تمارين تمارين ، حلو إنك تخلي ولادك بيلعبوا رياضة ، بس لازم تعرفي هما بيحبوا إيه ؟ ودة معناه إنك هتجربي معاهم أكتر من حاجة ، لحد ما توصلي هما بيحبوا إيه ؟ و عايزين يكملوا فيه ؟  بلاش تاني جو تحقيق أحلامك فيهم ، يعني كان نفسك تبقي باليرينا فهي لازم تلعب بالية ، أو كان نفسك تبقي سبّاحة فهي لازم تبقي بطلة . الرياضة عشان تشغل وقتهم و يحافظوا علي جسمهم ويستمتعوا مش عشان تحققي أحلامك و لا تضغطي ولادك و تعسفيهم.

سابع حاجة :

طبعا مامتك و حماتك حياتك و اخواتك و العيلة و عم أحمد بتاع الكشك ، كله هيحاول يصلح لك طريقة تربية ولادك ، أنا من موقعي هذا بقولك ماتسمعيش كلام حد ، محدش عايش مع ولادك غيرك ، ولا حد يعرف كل حاجة عنهم أدك ، فأنتي بس اللي تقدري تحددي تربيهم ازاي ؟ و ماتكرريش تربية ماتنفعش لا للجيل دة ولا للزمن دة.

تامن حاجة :

ربي ولادك و ناقشيهم في كل حاجة وبعدها سيبيهم ياخدوا قرارتهم لوحدهم ، أحنا بنحط الأساس لكن مش هتقدري تقرري لهم كل حاجة في حياتهم لازم تعوديهم علي إنهم يعتمدوا علي نفسهم و يختاروا لنفسهم و يتحملوا نتيجة اختياراتهم .

الخوف لكتير مننا إننا نبقي نسخة من امهاتنا اللي تعبونا ، و يمكن في لسه منهم بيتعبونا بتربيتهم خليه حافز إنك متعمليش كدة في أولادك.

تربية أولاد أسوياء صعب جدا و إحنا أصلا لسه بنكتشف نفسنا و بنتصالح معاها ، ماتسمعيش اللي بيحبطك و لا اللي عايزك صورة منه ، خليكي نفسك و أدي لأولادك مساحة يبقوا نفسهم .