مسلسلات و افلام مهم تتفرجي عليهم في الاجازة

المسلسلات و الافلام عالم جديد احنا بندخله، زيارة لقصص تانية وتجارب مختلفة. وعلى قد ما تعبتر دي حاجة للتسلية لكن هي ليها كمان اثر اكبر بكتير، الافلام و المسلسلات بتعيشنا حياة تانية لاشخاص تانية بس بنتأثر بيهم و بنلاقي بينا و بينهم نقاط تشابه سواء  صفات او مواقف او تصرفات او حتى مشاكل الابطال بيعيشوها بس ممكن نبقي احنا كما بنواجه نفس المشاكل. ممكن من فيلم او مسلسل وجهة نظرنا تتغير في حاجة او ممكن تجيلنا فكرة جديدة او ممكن يدينا بُعد جديد لموضوع معين مكناش شايفينه و اوقات ممكن كمان نلاقي فيه حلول ملهمة تساعدنا. عشان كده و بما ان دي فترة الاجازات الطويلة  احنا جمعنا شوية افلام ومسلسلات مهم تشوفيهم. 

-البحث عن علا: 

مسلسل البحث عن علا  لهند صبري موجود على  نتفليكس، المسلسل ميعتبرش جزء تاني لعايزة اتجوز لكن يعتبر بلورة جديدة لقصة المسلسل نفسها او تناول جديد مع التغيير طبعا اللي حصل في فرق الوقت ما بين عايزة اتجوز و البحث عن علا.  المسلسل مش بس بيتكلم عن المشاكل الزوجية و ازمة الطلاق بس بيتكلم  عن رحلة علا في اكتشاف نفسها بعد سن الاربعين و ازاي اسست حياة جديدة لنفسها.

-ذات اخرى Another Self: 

مسلسل تركي جديد على نتفليكس ومختلف عن نمط المسلسلات النركي المتعودين عليها. المسلسل  بيتناول فكرة العلاج النفسي عن طريق علم الجذور العائلية بس هو له معاني كتير، ناقش فكرة الاذى النفسي و ال unhealed traumas  ومدى تأثيرها على حياتنا. كمان بيتكلم ان اي اذى اتعرضنا له او مشاكل مرينا بيها لو محلناهاش هتخلق عندنا مشاكل نفسية وصحية وممكن تبوظلنا حياتنا وكمان هتتنقل لاجيال جاية لان الدايرة متكسرتش وهيفضل الاذى ده بيأثرعليك وعلى اللى حواليك.

-مسلسل ليه لأ 1و2: 

مسلسل كتابة مريم نعوم ومريم من احسن الكتب اللي بيكتبوا قصص اجتماعية تناقش قضايا كبيرة ومهمة بس بطريقة بسيطة. المسلسل بيناقش تابوهات موجودة في مجتمعنا زي التبني و الاستقلال، بيصحح مفاهيم ومعتقدات غلط المجتمع بيورثها من غير ما يفكر او يقيم هي هي فعلا صح او لمجرد ان كل الناس بتقول كده؟ 

–Eat Pray Love:

فيلم قديم بس من الافلام اللي كل فترة مهم نتفرج عليها، من الحاجات اللي بعد ما تتفرجي عليها تحسي انك مبسوطة .. اهدى .. بتفكري ازاي تحسني حياتك.  الفيلم مش بس بيناقش ازمة الطلاق للست لكن هو كمان بيناقش ازاي  السخص يقدر يكتشف نفسه و يعيش حايته، يقيم علاقاته و يحب نفسه عشان يعرف يتحب و يحب. 

–Firefly lane:

من احلي المسلسلات اللي بتتكلم عن الصداقة والمشاكل النفسية اللي بنواجها بسسب التربية الغلط او بسبب مشاكل الاهل. بس في وسط كل ده  المسلسل  بيركز علي ان ازاي البطلتين قدروا يكملوا حياتهم و يعدوا مشاكل كتير كبيرة بسبب صداقتهم  و ان حتي لو بيحصل مشاكل بينا و بين صحابنا بس قد ايه الصداقة دي  علاقة مهمو اوي في حايتنا بتخلينا نقدر نواجه حاجات كتيرز الجزء الاول نزل على نتفليكس و من المتوقع ينزل جزء تاني قريب. 

 الويك اند قرب او لوانت واخدة اجازة استغلي الوقت ده و اتفرجي عليهم و استمتعي!