Editor
ما بين الحضانه والمدرسه بيجي علينا الويك إند وبنبقى عايزين نخرج نفسح العيال وفي نفس الوقت نفصل شويه من الزن والعياط، وعلشان أكيد كل أم مهتمه إن وقت اللعب يكون وقت مفيد للأولاد مش بس ترفيهي، جمعناك هنا 7 أماكن بتجمع بين الترفيه والتعليم بشكل ممتع ومشجع للطفل إنه يكتشف كتير أوي عن نفسه وشخصيته.
مكان ترفيهي شامل للعيله كلها وليه فروع كتير في التجمع وأكتوبر وطنطا!
بيلي بيز فيه كل اللعب الترفيهيه والتعليميه المناسبة لجميع الأعمار من الأطفال الرضع لحد أهالي الأطفال، من أكتر مميزات بيلي بيز هي إنك تقدري تسيبي فيه أولادك وتروحي تعملي شوبينج أو تخرجي مع صحباتك شويه وإنتي مطمنه إنك سايباهم في مكان أمن تماما مع الرعاية والملاحظه من طاقم عمل المكان المتخصص، وتقدري كمان تعملي أعياد ميلاد هناك وتأكدي إن كل الحضور هيتبسطوا من أصغر واحد لأكبرهم!
الملاذ المثالي لسكان أكتوبر والشيخ زايد! توكيز أيلاند هي منطقة مغامرات مليانه لعب كتير لكل الأعمار وفيها كمان كافيه صغيره في الدور التاني تقدري تقعدي مع نفسك شويه وتشوفي الأولاد وهما بيلعبوا ومبسوطين في بيت الكور أو الزحاليق أو العربيات الصغيره، المكان جوه فلاجز مول اللي في دريم لاند فا تقدري تسيبي الأولاد وتشربي قهوتك وتاكلي أكله حلوه في هدوء في أي من المطاعم والكافيهات وكمان في فرع كبير لسعودي ماركت هناك عشان تعملي شوبينج للبيت براحتك وإنتي مطمنه إنهم مبسوطين وبيلعبوا وبياكلوا.
مكان تاني لسكان جمهورية أكتوبر وزايد، واحد من الأمكان الترفيهية اللي مهتمة بتعليم الأطفال مهارات جديده وتنمية عقولهم وأجسامهم كمان.
كل اللعب هناك بيتم إختيارها بعنايه عشان تسمح للأطفال إنها تشارك كامل حواسهم في اللعب عشان يستمتعوا بتجربة لعب مختلفه.
المكان بردو فيه منطقه مخصصه للأب والأم عشان يفصلوا من دوشة العيال وياكلوا ويتكلموا مع بعض وهما متأكدين إن الأولاد مش بس بيلعبوا، لأ، دول كمان بيتعلموا حاجات مفيده.
كيدزانيا هي مركز ترفيهي تعليمي للأسرة كلها، مدينة ألعاب بتحاكي الواقع مع أكتر من ٨٠ نشاط و ١٠٠ وظيفة بتشجع الأطفال يدخلوا تجربة ممتعة لعالمنا الواقعي بإنهم يشتغلوا بجد وكمان بياخدوا مرتب رمزي مقابل شغلهم كعامل فى مصنع، أو دكتور، أو مهندس، أو صحفي، أو صاحب محل، أو رجل إطفاء، أو غيرها كتير من الوظايف اللي بتركز على تنمية المهارات اللغوية والحركية والجسدية والموسيقية للأطفال.
سكان المعادي والمقطم يجمعوا هنا عشان بلاي بارك هي أول منطقة ألعاب مفتوحة في المقطم ومناسبة للأطفال من سن سنتين.
قضي اليوم كله في بلاي بارك اللي مليانه لعب مختلفة من ترامبولين وزحاليق والعاب تسلق إللى بتساعد طفلك إنو يحسن التوازن والمرونه.
اللذيذ في المكان ده إنه مفتوح على عكس أغلب الأماكن التانيه فا تقدري تستمتعي بالشمس الجميله وشوية الهوا الحلوين في منطقة الكافيهات وإنتي شايفه أولادك قدامك وهما بيلعبوا مع أصحابهم ومبسوطين.
من سن سنه تقدري تروحي لا لا لاند وتستمتعي بيوم مختلف وأجواء ترفيهيه أمنه تماما وبتشجع الأولاد إنهم يستكشفوا كل جديد.
المكان في توين تاورز اللي في الشيخ زايد وهناك هتلاقي جميع أنواع الأنشطة الترفيهية من لعب وفصول الفنون والحرف اليدوية والعاب الفيديو والألعاب الحركية الي بتركز بشكل كامل على تنمية وتطوير المهارات الحركية بالشكل إللى يخلي الأولاد قادرين يتحكموا في حركاتهم وتوازنهم وسرعتهم.
مع فروع في الرحاب والتجمع والمعادي والمنصورة والشيخ زايد، كيدز ستيشن مناسبة جدا من سنه ونص ل عشر سنين ولو أبنك أو بنتك فوق الأربع سنين تقدري تسيبهم لوحدهم.
المكان مليان العاب لكل الأعمار زي الترومبلين ولعبة التسلق والعاب الذكاء والتفكير اللي بتساعد الأطفال إنهم يطوروا من خيالهم ويثقوا في نفسهم ويكتشفوا مهارات جديده عندهم وكل ده في أجواء ترفيهية وأمنه ومشجعه للطفل إنه يعرف نفسه أكتر ويتحداها بكل الطرق.
الأماكن ديه كلها هتقدري تتبسطي فيها أنتي وأولادك وفيها أماكن تقدري تسيبيهم وتنطلقي مع نفسك في اللا شئ.
لو حابه تقضي ويك إند مختلف ومسلي ليكي وللأولاد جربي الأماكن ديه وقوليلينا رأيك.
Comments
0 comments