من برة أسترونج إندبندنت ومن جوة أسند الولية

الفترة طويلة  كانت ومازالت جملة أسترونج إندبدنت مسيطرة علي الهاشتاجات و الميمز علي السوشيال ميديا ، الأسترونج إندبندنت وومن مش محمد صبحي في  مسرحية تخاريف علي فكرة بجملته الشهيرة ” إحنا يا ستات فلتا خلاص “.

  الأسترونج إندبندنت وومن عادة بيقولوها علي الستات و البنات اللي بيشتغلوا و معتمدين علي نفسهم بشكل أو آخر ، بس الحقيقة إن الأسترونج إندبندنت دي مش بس اللي بتشتغل ، الأسترونج إندبندنت دي هي اللي بتعتمد علي نفسها في العموم ، ودي ممكن تكون بقي :

١-البنت أو الست اللي بتشتغل و بتصرف علي نفسها 

٢-الأُم اللي بتودي عيالها مدارس و تمارين و دكاترة لوحدها 

٣-اللي بتقرر تبدأ مشروعها الخاص و تعتمد كليا علي مجهودها

٤-اللي بتستقل في حياتها ببيت منفصل عن أهلها 

كل دول نقدر نقول عليهم بكل ثقة أسترونج إندبندنت وومن .

 كنت مرة زمان عملت فيديو كان إسمه ” استرونج اندبندنت زفت علي دماغي ” و دة مش قلة آدب مني والله بس لأن الهاشتاج دة كان مغرق الدنيا وقتها ، وإتكلمت مع أكتر من بنت و ست في الموضوع دة،  وليه بقوا بيقولوا عليه لمؤاخذة “زفت “؟  لقيت إنه علي أد ما هي حاجة حلوة الاستقلال سواء الشخصي أو المادي للبنات و الستات ، و أد إيه هما فخورين بنفسهم ،  بس معظم البنات والستات  كبني آدمين طبيعين جدا ، أوقات بيتعبوا من الاستقلال دة و بيبقوا عايزين  حتة: 

“أسند الولية ” و اللي مقصود بيها تشجيع  لمجهودهم و اللي بيعملوه لوحدهم عشان يعرفوا يكملوا. 

-يعني كام استرونج اندبدنت دخلت عيطت في الحمام من ضغط الشغل،  أو من مديرها اللي  بيضغط عليها ، أو ممكن ياكل حقها في الشغل عادي أو مايقدرش مجهودها  ؟

-كام استرونج اندبندنت أُم قعدت بالليل تعيط من إنها إتهلكت من بيت لأكل لمدارس لتمرين لدكاترة لوحدها ، و بيتقالها في الاخر ما انتي قاعدة في البيت مابتشتغليش ، بتعملي ايه يعني ؟ دي إنتي حتي فاضية طول اليوم !

-كام واحدة مستقلة بحياتها عيطت من إنها مش عارفة تدفع إيجار الشهر، و مش عايزة تطلب مساعدة من حد ، أو عيطت من نظرة و كلام الناس اللي أوقات بيضغط عليها لمجرد إنها فكرت تستقل !

أه  كتير من البنات و الستات جامدين و بيستحملوا و بيشيلوا مسئولية نفسهم و كمان مسئولية غيرهم، بس هما مش جماد يعني في الاخر هما بني ادمين، و بيحتاجوا يشحنوا طاقتهم بشوية دعم لامكانياتهم و انتصاراتهم و تقدير لمجهودهم عادي جدا .

لو كنتي استرونج اندبندنت  وومن فنصيحتي ليكي تخلي بالك من نفسك و تدلعيها ، و تطلبي الدعم من اللي بيحبوكي،  والأهم تطلبي أهتمام من نفسك ، يعني مثلا دي شوية اقتراحات تقدري تعمليها للتحقيق الذاتي لمبدأ أسند الولية :

١- خرّجي نفسك عادي ، خدي نفسك ورحي كُلي، إعملي شوبينج ، أقعدي أشربي قهوة مع نفسك و قولي لنفسك والله برافو بتعملي كل دة لوحدك ، أنا فخورة بيكي

٢-العبي يوجا او إعملي جلسات تأمل،  و لو معندكيش وقت و مسحولة زي حالاتي، فاليوتيوب ماخلاش في نفسنا حاجة ،أعملي اليوجا في البيت عادي، في هوم فيديوز كتير ممكن تعمليها  مش هتاخد اكتر من ١٠ دقايق تستجمي فيهم ، أو إعملي الميديتايشن بالطريقة اللي تحبيها ، زي مثلا نيللي في مسلسل “نيللي و شريهان ” لما قررت تقعد تضحك قبل ما تنام عشان تطلع الطاقة السلبية ، إعمليها عادي متتكسفيش و أقعدي أضحكي بصوت عالي لو دة هيريحك نيهاهاهاهاها 

٣-إملي البانيو و شغلي مزيكا و حاولي تفضي دماغك و تفكي الاسترس،  و لو حطيتي ملح البحر  بيقولوا بيشيل الطاقة السلبية و بيساعدك علي الاسترخاء ، لو عندك ولاد و بتجري وراهم طول اليوم زي حالاتي برده ، ياما تفهيمهم إن في ديما في اليوم وقتك الخاص ولازم يحترموه، أو لو صغيرين تستني لما ربنا يوفقهم ويناموا ،و ماتيأسيش وتنامي،  وإدي لنفسك نص ساعة تسترخي فيها .

٤-خلي ديما في اليوم في “الماي تايم ” ، ودة ليكي حرية إك تعملي فيه اللي بتحبيه سواء تتفرجي علي فيلم أو مسلسل ، تاخدي شاور سخن ، ترغي مع صحباتك في التليفون، تبصي في السقف من غير ولا كلمة ، المهم إنه وقتك إعملي فيه اللي يفصّلك و يريحك

و في النهاية أحب أقولك إن من حقك تبقي استرونج اندبدنت وومن ومن حقك تحتاجي  أسند الوليه ، أقول قولي هذا و السلام عليكم ورحمة الله و بركاته !