هل المفروض الست لو بتشتغل تساعد/ تساهم في مصاريف البيت؟

سؤال أي إتنين متجوزين أو داخلين على جواز فكروا فيه أو بالفعل اتكلموا فيه، المشكلة إن الموضوع ده دايما ًبينتهي بخلاف ونبتدي نحلل ونشوف مرجعية دينية نستند عليها او حتى بالمنطق والورقة والقلم عشان نوصل لحل….ن
المشكلة إن إحنا مش عارفين الأسباب الحقيقية اللي ورا رفض معظم الستات انها تشارك الراجل في الأعباء المادية زي المصاريف المنزلية، المدارس….ألخ 

 يمكن لو فهمنا الأسباب الحقيقية ورا رفض الستات للمشاركة أو “خوفها من المشاركة”  نقدر نوصل لحل وسط…ومن أهم الأسباب :ن

   هو أنا لوحدي اللي هاضحي؟

لو إتكلمت مع أي ست هاتلاقي إنها مستعدة تضحي وتيجي على نفسها عشان خاطر بيتها  وأولادها، حتى لو كان ده بييجي على حساب الصورة اللي اتربيت عليها من وهي صغيرة، بانها شايفة الزوج اوالراجل في صورة باباها هواللي دايماَ بيكون القائم بكل الأعباء المادية

 وبتفكر إنها لازم تساعد جوزها في المصاريف بسبب إن الظروف اتغيرت وإن الزمن اتغير وإنها بتشتغل على عكس مامتها…. بس للأسف في التطبيق بتلاقي إن هي بس اللي جت على نفسها، هي بالفعل بتشتغل بس هي مازالت هي القائمة بكل ما يخص البيت والولاد؛ طبيخ، تنظيف، تمارين، مذاكرة، اعياد ميلاد، اونلاين….الخ
يعني حاليا بتلعب دورين؛ دور الأم والزوجة على أكمل وجه زائد دور المرأة العاملة المطحونة في شغل من ٩-٥ لو مش أكتر….ن

طيب فين دور الراجل؟!! هل بيساعد؟ هل هو كمان تنازل عن صورة الرجل الشرقي اللي كان شايفها في باباه ولا لسة متمسك بيها ورافض انه يقابل الست في النص؟

لو هنطلب من الست تساهم في المصاريف يبقى لازم نطلب من الراجل إنه يشيل بعض من مهام الست في البيت والأولاد، مش عشان عند أوعشان دي قصاد دي….لكن عشان الحياة الزوجية مشاركة بين اتنين قرروا يبنوا كيان جديد لازم كل طرف فيه يكون مرتاح ومش مضغوط او مش حاسس ان هو اللي شايل الليلة فوق دماغه

نفسي أحس إني مسئولة منه….ن

الحقيقة السبب ده نفسي بحت وله علاقة بطبيعة الست العاطفية زائد مخزون المعتقدات والتقاليد اللي بنتربى عليها ان الرابط المادي هو اللي بيحسس الست بالاحتواء والامان.  كتير من الستات بتقول إنها مفتقدة إحساس إنها مسئولة من جوزها وإن الراجل بطل يحسسها إنها جزء منه ولو وقع هايسنده
مش كل الستات بتحس كدة بس في نسبة مش قليلة عندها الأحاسيس دي وممكن يكون جزء كبير منها راجع للغة الحوار بين الراجل والست

خايفة من المستقبل…. ن

السبب الأهم هو إن معظم الستات خايفة من المستقبل، خايفة  يتغدر بيها في يوم وليلة وتلاقي نفسها بلا سند و زوج أو بيت بسبب الطلاق…ن
مش هاندفن راسنا في التراب زي النعامة ونقول ان دة مش بيحصل لأن للأسف نسبة الطلاق إرتفعت جداً في السنين الأخيرة، و قوانين الأحوال الشخصية مهما كانت في صالح الست للأسف وقت التفعيل لو الزوج غير أمين ممكن ماتاخدش اي حقوق ليها!!!ن
الست في يوم وليلة تلاقي نفسها من غيربيت ولا فلوس وساعات مسئولة مش بس عن نفسها لكن كمان عن مصاريف اولادها، من غير أي سند مادي، مجرد مرتبها اللي في أغلب الأوقات مش هايكفي حتى مصاريف السوبر ماركت…ن
الخوف من المستقبل بيخلي أي ست تفكر ١٠٠ مرة قبل كل قرار بتاخده، هل أحوش فلوسي أحسن؟
ولو صرفت فلوسي دلوقتي في البيت إيه اللي يضمنلي إني في يوم من الأيام مش هاندم؟

من الآخر الموضوع معقد في مخاوف وأحاسيس كتير بتخلى الست ترفض وتخاف تساهم في مصاريف البيت…وعلى عكس ما كتير من الرجالة – وبعض الاحيان الستات-  فاكرين إن الست اللي مش عايزة تساعد جوزها المطحون في مصاريف الحياة والأولاد ده عشان هي أنانية ومش حاسة بيه…ت

جيلنا يعتبر الجيل الغلبان اللي بنجرب فيه النموذج الجديد للزواج اللي نصه شرقي ونصه مودرن أمريكي/ أوروبي
هانفضل سنين بنعافر لحد مانوصل لوضع ثابت….من دلوقتي لحد مانوصل للمرحلة دي، مفيش حل غير إننا نحاول نفهم ونقدر ونقابل بعض في نقطة في النص عشان الحياة تكون أحلى