٥ طرق تستمتعي فيهم بأكل التمر في رمضان

التمر من الأكلات المفيدة جدا جدا في رمضان، دة غير إن أكل التمر ممتع و بيعوض طاقة اليوم في الصيام ، عشان كدة بينصح ديما إننا نفطر علي تمر .

في المقالة دي هنقولكم علي خمس طرق مختلفين ممكن تستمتعي بأكل التمر بيهم في رمضان  :

١-مشروب الشيكولاتة بالتمر و الموز 

دة مشروب مفيد جدا جدا علي الفطار ، دة غير إن كل الأطفال هيحبوه جدا ، وطريقته بسيطة جدا جدا ، كل اللي هتعمليه إنك هتجيبي كيس مشروب الشيكولاتة اللي ولادك بيحبوه و هتحطيه في الخلاط مع لبن و موز و تمر و تضربيهم كويس لحد ما يبقي قوامه زي العصير 

٢- تمر بالكراميل 

طريقته سهلة جدا ، و بيتحضر في ثواني ، كل اللي هتحتاجيه هو صوص الكراميل و يترش علي التمر و يتقدم في طبق علي الفطار 

٣- تمر باللبن ،

من أشهر الاشكال اللي ممكن نأكل بيها التمر هي نقع التمر في اللبن ، و ممكن يتاكل زي ما هو و يتشرب اللبن ، أو ممكن يتضرب التمر و اللبن مع قليل من العسل في الخلاط 

٤-كرات التمر 

دي وصفة سهلة أوي و لذيذة جدا ، بنجيب التمر و نطلع منه النوي و نحطه مع ربع كوباية بسكويت مطحون ، وربع كوباية جوز هند ، و معلقتين زبدة في نفس درجة حرارة الغرفة، و معلقتين لبن ، و نبدا نعجنهم مع بعض لحد ما يبقوا خليط واحد متماسك، و بعدها اعمل منهم شكل كور ، و ممكن ارش عليهم مكسرات مطحونة أو جوز هند مطحون أو بشر شيكولاتة   ، بيبقي طعمها لذيذ جدا و مفيدة للأطفال 

٥-تمر محشي ،

طريقته سهلة جدا ، بتطلعي النواه من التمرة ، و تحطي جواها الحشوة اللي بتحبيها ، ممكن تبقي مكسرات، ممكن تبقي زبدة الفول السوداني ، ممكن تبقي كريمة، أو كريزأو أي فاكهة بتحبيها 

مهم أوي جسمك يستفيد أنتي و أولادك بفوايد التمر في رمضان ، جربي طرق جديدة مع نفسك ومع أولادك عشان يبقي التمر جزء أساسي من يومك.

التمر بيدي طاقة ، كل سنة وكل يوم وأنتي مليانة طاقة!