in , , ,

تردي علي اولادك بايه لما يسألوا بنصوم رمضان ليه ؟

السؤال البديهي عند أي طفل اول ما تقولي له يبدا يصوم في رمضان ، هو احنا بنصوم رمضان ليه ؟

طبعا الإجابة اللي معظم اهالينا كانوا بيقولوها لنا هي اننا بنصوم عشان نحس بالفقرا ، كتير مننا ماكانش بنتناقش كتير و كنا بنسمع الكلام و خلاص ، 

بس الجيل  دة مختلف تماما ، و ما شاء الله مابيسيبوش حاجة من غير ما يسألوا عنها و عن أسبابها مرة و اتنين و تلاتة ، ولازم يقتنعوا بالاجابة، يعني جو” بص العصفورة اللي هناك” مابياكلش معاهم ، و لا جملة “لازم تسمع الكلام عشان ما تروحش النار و ربنا يحبك” ، هيسألوا في ستين تفصيلة ،  ويقولك يعني ربنا هيدخلني النار عشان كنت عطشان و شربت ؟  و هتدخلي في كم أسئلة وجودية ممكن ماتبقيش مستعدة ليها ،

انا هنا هقولكم بنقول لاولادنا ايه؟ مش من منظور أو خلفية دينية علي اد ما هي من منظور” أُم ” و خبرة حياتية، 

لما بنتي سألتني بنصوم رمضان ليه ؟ ورديت عليها عشان نحس بالفقرا، لقيتها بتقولي طب ما نديهم فلوس و خلاص ، 

لقيت نفسي بسأل جوايا ، و فكرت ، ورجعت لها برد ،

قولت لها احنا مش بس بنصوم رمضان عشان نحس بالفقرا ، لأ،

احنا بنصوم في رمضان مش بس عن الاكل و الشرب ، لا كمان بنصوم عن كل حاجة ليها علاقة بشهوات الانسان ، كل حاجة شايفين انها أساسية في حياتنا و منها الاكل و الشرب ،

 المفروض بنصوم كمان في تصرفاتنا ، بنصوم عن كل حاجة وحشة ممكن نكون بنعملها كل يوم و مش مركزين فيها، زي الكدب و النميمة و العصبية ،

 ربنا بيدينا شهر كامل نجتهد فيه اننا نبقي زاهدين في كل متع الدنيا، طب ليه يعني بنتكدر و خلاص ؟

لأ طبعا ،

 بس عشان نعرف نقرب لنفسنا الحقيقة و نقرب لربنا ، حاجة كدة زي الميديتيشين بس اعلي و اقوي و احلي كتيير،

 و عشان نعرف نعمل كدة لازم نصوم عن كل حاجة ممكن تشتتنا، كل حاجة ممكن تلهينا عن اننا نتواصل مع نفسنا و روحنا النقية و دة اللي هيخلينا نتواصل احسن واقوي مع ربنا ،

 لما قلت لها كدة بدأت تفكر في الكلام و تحس إنه “أه ، في وجهة نظر ” و قررت تصوم معايا ، 

 و الحقيقة ان و انا بقولها الكلام دة ، فكّرت نفسي انا كمان ب ” ليه احنا بنصوم رمضان “

رمضان ديما بيجي لما بنبقي خلصانين و تعبانين و قربنا نستسلم ، بيجي عشان بجد نقرب لنفسنا و لروحنا و لربنا ، عشان نشحن و نقدر نرجع نكمل ،

كل رمضان و انتوا لروحكم ولربنا اقرب، ومع ولادكم و نفسكم أصدق!

بقلم نسمة مدحت

Nesma Medhat ُEntaleqi Chief Editor/Writer/Marketer/ Vlogger /Storyteller and Author for published book “إاللي إسمه إيه”

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

يعني ايه السقوط المهبلي والرحمي؟

أماكن زينة رمضان و لينكاتها