I can fix him!

كام مرة دخلتي علاقة وأنتي فاكرة أنك تقدري تغيري اللي قدامك 180 درجة؟ 

زي أنه عصبي وبيشتمني أو يضربني بس هيتغير مع الوقت لما الضغط يخلص!

هو اعترفلي أنه كان بيعرف بنات كتير بس حساه بيحبني بجد واتغير مبقاش كده!

هو مدمن بس قالي هيبطل علشان بيحبني! 

كام مرة كنتي فاكرة أنك تقدري تصلحي اللي حواليكي؟

بس في الحقيقة you can’t fix someone who doesn’t have the will to أيًا كان الشخص ده مين!

ليه بقى؟ 

لأنه مش مسئوليتك إصلاح وتغيير حد لو هو فعلًا معندوش الإرادة!، مش مسئوليتك تكوني منقذ في حياة اللي حواليكي إذا كان صداقة أو ارتباط. 

أنتي دورك في أي علاقة أنك تكوني مصدر دعم وقبول وتشجيع وأمان، والطرف التاني يكون بيبادلك نفس المسئولية، علشان ببساطة العلاقات خد وهات مينفعش طرف واحد يدي بس أو ياخد بس!، دي كده علاقة مش صحية. 

طيب إزاي تعرفي أنك في علاقة مؤذية ومش صحية؟

دول شوية علامات للعلاقة مؤذية  ذكرهم المشير النفسي أ. مدحت مراد في محاضرة عن الإساءات:

1. تقلب المزاج والمشاعر: أن يبقى فيه طرف دايمًا عصبي فتبقى أبسط المشاكل خناقة كبيرة. 

2. اللوم وتأنيب الضمير: وده طرف على طول بيحسس الطرف التاني بالذنب في أي حاجة وبيحمله مسئولية أي مشكلة.

3. التحكم في الآخر: أن يبقى في طرف بيحاول يتحكم في الطرف التاني ويقوله يعمل ايه ويتصرف إزاي زي “متشتغليش”، “متلبسيش ده”، “متعمليش كده”

4. إجبار الشخص على حاجة مش عايز يعملها: زي تنازل عن حاجة معينة، قطع علاقة مع الأصحاب أو الأهل.

5. التقليل من قيمة الشخص: عن طريق مقارنة الشخص بناس تانية، وأنه دايمًا مش كافي ومقبول.

6. التهديد والوعيد: يعني التهديد بالعقاب، زي “لو عملتي كده هاسيبك أو هاموت نفسي”.

7. إجبار طرف على تحمل مسئولية مشاعر الطرف الآخر: عن طريق ابتزاز مشاعر الطرف التاني وتحميله مسئولية التصرفات السيئة زي “أنتي اللي عصبتيني”، “أنتي اللي خلتيني أضربك”

8. الخوف من التعبير عن المشاعر والمطالبة بالاحتياجات: أن مفيش حرية في التعبير عن المشاعر والاحتياجات فبالتالي الشخص مش بيكون على طبيعته.

9. غياب الثقة: الشك في أي تصرف ويوصل أن طرف يراقب الطرف التاني في كل حاجة تخصه، زي أنه يبقى عايز يعرف الـ passwords لكل الapps، ومش واثق في قدرات وإمكانيات اللي معاه لحد ما يخليه هو كمان مش واثق في نفسه.

10. العنف: أن يتعرض أحد الطرفين للضرب والإهانة أو الاستغلال الجنسي أو التحقير من الإحتياجات والإساءة النفسية والجسدية.

وأنتي بتقرأي لو لقيتي أكتر من 4 علامات من اللي فوق دول تعرفي على طول أنك ضحية في علاقة مؤذية ومحتاجة تركزي في علاقاتك عشان تحافظي على صحتك النفسية والجسدية.

طيب لو أتاكدتي أنك في علاقة مؤذية ازاي تخرجي منها؟ 

الاعتراف: أول حاجة أن الضحية تفهم أنها ضحية وتقدر تفرق بين -العلاقة المؤذية والعلاقة الصحية، وبالتالي تبقى عارفة حقوقها وحدودها اللي محدش ينفع  يعديها.

المواجهة: بعد ما فمهتي أنك ضحية، هتحتاجي تواجهي الطرف التاني وتشوفي رد فعله، هل عنده استعداد يبذل مجهود علشان العلاقة تبقى أحسن ولا لأ!، ولو لقيتي عنف عند المواجهة يبقي هتحتاجي لتدخل شخص تاني ليه سلطة أكبرعليه.

الانسحاب: لو حصلت المواجهة والعلاقة لسه مؤذية والطرف التاني مش بيسعى أنها تبقى أحسن، ساعتها هتحتاجي أنك تنسحبي عشان تعرفي تخرجي من العلاقة وتتعافي من آثار الأذى، وفي الوقت دة مهم جدًا دعم الأهل والأصحاب والدعم النفسي. 

مرحلة التعافي مش مرحلة سهلة بس في خطوات ممكن تسهلها عليكي وهي :

 القبول: أننا نقبل الألم والتجربة علشان مينفعش نفضل مستنيين من اللي أذانا يجي يصالحنا ويبقى هو كمان سبب التعافي لأن ده مش هيحصل! التعافي كله مسئوليتك أنتي وأنتي تستاهلي تتعافي وتبقي أحسن. الحياة مش هتبقى وردي بمجرد ما تتخلصي من الأذى، بس القبول مهم كخطوة علشان نبدأ الرحلة اللي طبيعي تبقى فيها خطوات لقدام وساعات يبقى فيها انتكاسات.

حبي نفسك: حاجة مهمة جدًا أنك تحبي نفسك، تعرفيها وتكتشفيها أكتر، لأنه غالبًا بعد أي علاقة مؤذية  بتفقدي الثقة في نفسك.

 الصبر والتأني: التعافي ده طريق طويل، كل خطوة محتاجة تاخد وقتها من غير استعجال، الحزن والألم والغضب ياخدوا وقتهم لحد ما يخلصوا، ويبقى عندنا صبر على الجروح وآثار الأذى علشان الشفاء بياخد وقت. 

 الامتنان: أننا نقدّر أي إنجاز بنعمله مش لازم الإنجازات الكبيرة بس، نمتن لكل حاجة جميلة حوالينا في الحياة، زي أنك قادرة تصحي بدري وتعملي حاجة بتحبيها زي قراءة كتاب لذيذ. تمارسي شغفك زي الكتابة، الرسم أو الرياضة، قعدتك على البحر، اهتمامك بنفسك، قعدتك في البلكونة مع أغانيكي المفضلة، وحاجات غيرهم كتير بس أهمهم أنتي، امتني لنفسك كل يوم على وجودك وصبرك وقوتك!

في الأخر أحب أقولك أنه مهما حسيتي أنها مرحلة صعبة وأنك مش قادرة تكمليها،  المرحلة دي هتعدي وهتكمليها،والتجربة حصلت علشان تعلمك وتقويكي وتخليكي تعرفي قيمتك ونفسك أكتر وعلشان تساعدك تحبي نفسك أكتر.

reference https://nooun.net/%D8%AD%D9%84%D9%82%D8%A9-%D8%AF%D8%B9%D9%85/get-rid-of-harmful-relationships