لما تكون مسجون في علاقة أو فكرة

سجن الفكرة

 عارف لما تحس أنك شايف الحقيقة فين بس مش قادر تغيرها؟
عارف لما تكون عارف أصل المشكلة منين بس فاكر أنك مش عارف تصلحها؟؟
عارف لما يكون ربنا مديلك كل الأدلة والعلامات اللي تقول إن العلاقة دي متنفعش وأنت تصمم تمشي العكس؟؟
عارف لما يكون في سبب واضح للبشر كلهم بيبوظ علاقتك أو علاقاتك وتكون مصمم تكرره؟؟

“الحالة دي اسمها سلب الإرادة أوالسلبية الاختيارية أو ما يسمى “سجن الفكرة

لما بتسجن نفسك في فكرة بتديها الفرصة تسيطر على كيانك كله
نجاحك فكرة…إنجازاتك فكرة…هدفك فكرة…حبك فكرة…كرهك فكرة…عدم نجاحك فكرة…شجاعتك فكرة…خوفك فكرة…انسحابك فكرة…هروبك فكرة…صورتك عن نفسك فكرة

ناس كتير بشوفها بتحول مصير حياتها تماما علشان فكرة واحدة سيطرت عليهم

مش هقدر أتغير
مش هعرف أسيب الشخص اللي بيستغلني
مش هقدر أعيش لو سابني
لازم استحمل
وغيرها وغيرها من الجمل اللي بتأكد إني مش هتغير بإرادتي واني سلمت مخي كاملاً مكملاً للفكرة اللي سيطرت عليه ومش هعرف أغيرها أو أتخلص منها

اتلخبطوا ولا لسة؟ هاقولكم أمثلة أكيد شوفتوها أو يمكن عيشتوها

بنت واخدة فكرة عن نفسها إنها مش على قدر كافي من الجمال… بتكون انطباعات عن نفسها وتقلل من أي إنجاز بيحصل في حياتها وتقنع نفسها ب#القناعة_السلبية دي أنها مثلا مش هتعرف تتجوز أو أن ناقصها حاجة، ومش بس كدة بتلاقيها بتأكد الفكرة في كل موقف بيحصل معاها بتشوف كلام مش بيحصل
بتسمع وتحلل كلام مش بيتقال وتحاول تقنع نفسها ان مفيش حد هيحبها
بتركز بكل جوارحها إنها تشوف نفسها مش حلوة حتى لو الواقع عكس كدة

أو شاب يكون شايف نفسه لا يصلح أنه يشيل مسئولية بيت وأولاد فيتربي عنده ظاهرة مشهورة اسمها  الخوف من الارتباط والالتزام بعضهم بيخاف يتجوز أساساً والباقي لما بيتجوز بيهرب من المسئولية علشان هو مقتنع تماماً أنه مش هيعرف يشيل أو يتحمل وتيجي الزوجة تشتكي من أنه بيهرب وأنها متحملة كل المسئولية لحدها ومش لاقياه جنبها

 لما تدخل في علاقة مسيئة أو مستغلة بتسحب منك أكتر ما بتديلك مش بتلاقي فيها أي نوع من الأمان أو الاستقرار أو الحب الغير مشروط
وتسجن نفسك جوة فكرة أنك بتحب الشخص دة (وهو الوحيد في الكون اللي بيحبني) دى فكرة بتسيطر عليك وتخليك مش عارف تخرج من حصار الشخص دة ولا تتخلص من حبسه ليك ولا تطلع من تحت إيديه غير غالباً لما تعدي بمراحل صعبة وقاسية جدا تخليك تفوق على صدمة “إزاي صدقته” … “إزاي عملت في نفسي كدة” … ولما بنشوف حالة زي دي بيكون علاجها أشبه بعلاج الإدمان الفعلي علشان نطلعها من سجن الفكرة دي

الزوج أو الزوجة اللي بيسجنوا نفسهم في فكرة “دور الضحية” ” الأنانية” ” أنا بس اللي ببني” ” اللي قدامى مش مقدرني ” ” مقارنات بخيال أو حد تاني” …. وغيرها من الأفكار السلبية اللي بتسجن الإنسان وتحطه في دايرة ملهاش آخر

إيه الحل

حط كل فكرة في حجمها الصح بلاش تقلل من نفسك ولا تكبر الفكرة

ساعد نفسك أو شوف حد يساعدك بالإرشاد أو النصيحة الناضجة المدروسة

اخرج برة دايرة ذاتك وحاول تهرب من سيطرة الفكرة دي عليك

ثق في نفسك قوي وتأكد أنك هتقدر…ابعد نفسك عن الوسط اللي بيشجعك علي الغلط أو الأشخاص اللي بياخدوك لورا مش لقدام
و دايماً خلي بالك

خد الصورة الكاملة للحياة عامة وادرس سلسلة المواقف وخليك حقاني مع نفسك لغاية ماتكون رؤية صحيحة دقيقة للموضوع

آخر وأهم حاجة…حاول تدرس حياتك وطفولتك مع مرشد أو دكتور وتحاول تفهم أصل الفكرة دي جيه منين وايه اللي خلاك تؤمن بيها