إزاي تعرفي إنك في علاقة مع نرجسي؟

  !!!طبيعى إن الواحد يحب نفسه، و لما الحب دا يبقى زيادة عن اللزوم  بيقلب غرور

بس لما حب الواحد لنفسه يوصل لمرحلة إنه مش شايف فى الكون حد غيره وإنه عادى يإذي الناس عشان يرضي نفسه يبقى نسبة كبيرة الشخص دا مصاب باضطراب الشخصية النرجسية

 ٨ حاجات لو اجتمعت فى شخص واحد يبقى  نرجسى:ا 

“يا ارض اتهدي ما عليكي قدي”

هتلاقيه برنس كده فى نفسه… أناقة، لباقة، شياكة… فرحان بنفسه وبإنجازاته… الكون كله بيدور حواليه وثقته بنفسه عدت كل الحدود… حاجة كده فوق العظمة يا نجومية

“ايييييييييييه يا دين النبى… إيه الحلاوة دي”

دول بقى شلة المطبلاتية… مجموعة من الصحاب أو القرايب دايماً حواليه شايفينه حاجة محصلتش ودايماً واقفين فى صفه… ونافخينه على ٢٨ او ٣٠… على حسب الجِتّة

“سومة العاشق”

طبعاً هاتنبهري بيه فى الأول واللى هايبهرك اكتر انه أكتر واحد حساااااااااااااس فى الكون… بيحبك من قبل ما تتقابلوا… بيتنفس هواكي… وإنتى هاتصدقي إن أمك دعيالك وأخيراً هاتعيشى قصة حب زى الأفلام الأبيض والأسود

“أهو كيفي كده”

هاتتكروتى فى حلاوة البدايات… فجأة الدنيا تقلب خناقات وعند مش طبيعي… هو صح وعنده حق وهارس الدنيا أكتر منك… هايقنعك إنك غلطانة وكله بالدلائل والبراهين ويا حبة قلبي هاتصدقيه

“دا باينه مرار طافح”

مفيش مرة هايعتذر أو يعترف بغلطه ودا لأنه مابيغلطش أصلاً… وإنتى بقى غلطاتك كترت ومحتاجة تشتغلي على نفسك… قلقانة على طول… ماشية على قشر بيض في كلامك وتصرفاتك معاه

“عايزة ورد يا إبراهيم”

وهم حب عمرك اللى عيشتيه أول كام اسبوع بقى نكد عمرك… هاتشحتي الحب منه ومش هتلاقيه… نفسك بس في كلمتين حلوين… هاتعيشي على اللي فات وتغني أنا الحب اللي كان… اللي نسيه قوام

“يا صغيرة على الهم يا لوزة”

تمسكك بقصة الحب الخيالية هايخليكي على طول شايلة هم إنجاح العلاقة… مسئوليتك تدلعيه وتحبي فيه وتعملي كل حاجة هو عايزها – حتى لو مش مقتنعة – بس عشان يرضى عنك ويفتكرك بكلمتين حلوين

“كله رايح”

فجأة بقيتي كئيبة ومطفية ومهما عملتى مش عاجب… فتقرري تسبيه عشان كده كده مش نافع… أول ما يحس إنك ماشية بجد هايرجع سومة بتاع زمان… ولو أصريتي تمشي هايقلب عم ضياء ويحسسك إن حياته هاتنتهي وإحتمال يلفظ أنفاسه الأخيرة قدامك عشان تصدقى إن بُعدك عنه قال يعني موته… وإنتي غالباً هاترجعيله وهاتعيدي كل اللى فات من أول وجديد

طبعاً هاتختلف الطرق والمواقف من شخص لشخص بس لو لاقيتي نفسك فى نفس الدايرة دي اعرفي إنك فى علاقة مع شخص نرجسي … النوع دا من الإضطراب مالوش علاج… بلاش تقومي بدور المنقذ… لو فعلاً عايزة تنقذي حد، أنقذي نفسك…  ويبقى فعلاً ربنا نجدها نوسة 

By Aliaa Abd Elfattah

Visual artist and amateur comic writer inspired by real-life stories and situation