in ,

و بعدين بقي في قلة النوم ؟

بقالي شوية بسمع السؤال دة و بعدين بقي في قلة النوم ؟ الأول كنت فاهمة اني لوحدي اللي مش بنام كويس او مش بيجي ليا نوم لاسباب مختلفة منها التفكير الكتير و الضغوط و غيرها بس فجأة لقيتها حالة عامة مافيش حد بقابله او بتكلم معاه علي اختلاف كل حاجة بقي يعني سن و شغل ورجالة و ستات و من كل شكل و لون بيشتكوا من نفس الشكوي ، و دة خلاني اقف عند الموضوع شوية هو ايه بالظبط اللي بيحصل ؟ و ليه كل الناس دي بتعاني من قلة النوم لدرجة انه في عدد كبير منهم بقوا عايشين علي المنومات او المهدئات و بعضهم بقي عصبي لدرجة غير منطقية بسبب قلة  النوم .

الحدوتة بتبدأ من اول ما بناخد قرار اننا ندخل ننام هنا بتبدا رحلة التفكير ، تفكير بقي في أي حاجة و كل حاجة يعني ممكن يبقي تفكير في الشغل و الحاجات اللي لسه المفروض تعملها و هتعملها ازاي و ايه ناقص و هتعمله امتي او تفكير في مسئوليات و مصاريف و ازاي هتقدر توفق بين كل اللي عليك و اللي معاك و ممكن شوية أفكار عن ياااه لو الفرصة دي جت او الدييل دة اتقفل و جت فلوس زيادة ساعتها هعمل واحد اتنين تلاتة ، او نبدأ بقي في التفكير في الولاحاجة يعني مرحلة كدة اللي هو انتي علي السرير و المفروض تنامي بس انت او انتي باصيين للسقف و في مجموعة من الفلاشات شغالة في دماغك لحاجات مالهاش أي علاقة ببعضها و كلها حاجات مفتوحة او قرارات مش متاخدة او حاجات قديمة محدش فاهم هي جاية في دماغك دلوقتي ليه ؟ و لما ربنا بيوفقنا و نتعب و ندوخ من كتر التفكير بعد ساعة او اتنين او اكتر او مفعول المنوم يشتغل و الحمد لله بنروح في النوم ، كبيرنا اوي ساعتين و بنصحي فجأة كدة زي الأفلام تلاقيك بتفتح عينيك و بتفكر في حاجات غريبة و مش عارف تنام تاني ، في إحساس كدة انك مستني حاجة تحصل او مستني قرار تاخده او مستني حد يكلمك او يبعت لك حاجة فتبدا تمسك موبايلك و تبص فيه  مستني ! مستني مكالمة او مسدج او قرار او فكرة بتمسك الموبايل تبص هل حد كلمك او بعت لك ؟ و لو لا تبدا تفتحه تسكرول من غير أي هدف و لا أي تركيز ، و نرجع تاني للبصة في السقف و محاولات انك تقنع عقلك  انه ينام و يرتاح و مايفكرش . ممكن جدا في الوقت دة تفتح شات قديم و تقعد تقرا فيه او تفتكر حوار كنت عايز ترد فيه رد مختلف او كلام كنت عايز تقوله و ماقولتوش او فكرة خايف تهرب منك فتقوم تكتبها . ممكن اوي السيناريو دة يتكرر في الليلة الوحدة اكتر من مرة و عشان كدة بنصحي الصبح مصدعين و تعبانين و كاننا مضروبين علقة ، دة غير العصبية اللي ملهاش مبرر غير انك مجهد و جسمك مش واخد راحته في النوم و عقلك مش واخد أي إجازة من التفكير، كل دة في حين ان اللي حواليك ممكن يبقوا شايفين انك بتنام كتير، مش فاهمين ان كلها محاولات للنوم معظمها بيفشل  .

احنا من اكتر الأجيال اللي عايشة علي المسكنات و المنومات و المهدئات و كل دة من التفكير الزيادة و الجري ورا الكمال ، حتي محاولات جلد الذات و اللي بتخلينا منعرفش ننام جاية من فكرة لو ؟ لو كنت قلت ،لو كنت عملت، لو كنت ذاكرت، لو كنت وافقت ،لو كنت رفضت ، لو ،لو ،لو …

زي زيكم بالظبط و بعد ما فكرت كتير وصلت لنتيجة واحدة اننا لازم ندي لنفسنا مساحة و راحة و فرصة للفصلان ! طبعا عارفة و فاهمة انه مش زرار هندوس عليه فهنبطل تفكير ! عارفة و حاسة اد ايه صعبة و اد ايه مرهقة بس محتاجين نحاول لانه اول عن اخر التجربة اثبتت انه المكتوب بس هو اللي هيحصل واحنا كل اللي بنعمله اجتهادات و محاولات ، مافيش حاجة بتحصل بالصدفة و كل حاجة بتحصل بتكون سبب للي بعدها . احنا محتاجين نهدي من رتم الجري في حياتنا و من شيل الهم الزيادة لأننا في الاخر مش هناخد جايزة اكتر حد شايل  طاجن سته ! فبالراحة علي نفسنا و علي صحتنا و علي عقلنا و قلبنا . الحياة معقدة و مرهقة لوحدها فمش محتاجين نصعبها علي نفسنا زيادة ، احنا بس محتاجين نعمل اللي علينا و نستمتع بالنتايج اللي بنحققها حتي و لو كانت انتصارات بسيطة ، كل ما هنحاول اكتر اننا نستمتع بحياتنا كل ما هننجح اكتر و هنعرف ننام اريح . 

في اقتراحات بتقول اعملوا روتين يومي قبل النوم أين كان هو ايه ! يعني ممكن تتفرجوا علي حاجة بتضحك و خلاص ، ممكن تاخدوا حمام سخن ، ممكن تعملوا جلسات تآمل او يوجا . كلها أفكار لذيذة و ممكن تساعد بس لازم نفتكر ان اللي بينفع مع حد وارد جدا ماينفعش معاك ، جربوا حاجات مختلفة لحد ماتلاقوا اللي هيساعدكم علي الفصلان و النوم . اما عن نصيحتي انا الشخصية لكل اللي مش بيعرفوا يناموا و انا منهم هي اننا بس نقدر مجهودنا و نحب نفسنا و نتكلم مع نفسنا كل يوم في اننا فعلا بنبذل مجهود و بنحاول ،  و دي لوحدها حاجة كبيرة لازم نكافئ نفسنا عليها ، يعني تقول لنفسك كل يوم انك عامل مجهود في حياتك حلو اوي  لازم تقدره و انه بكره يوم جديد بفرص احسن انك تحقق حاجات احلي و لازم تكافئ نفسك علي كل اللي عملته في يومك بانك تحاول تستمع و تتبسط و ترتاح عشان تقدر تكمل و تنااااااام بعمق و تدي لعقلك و جسمك إجازة قصيرة ، فرصة تانية تخليهم يرتاحوا فيها عشان تعرف تكمل و تحقق كل اللي نفسك فيه. 

Nesma Medhat

Writer, Marketer, Story Teller and author for published book      “إاللي إسمه إيه”

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

إزاي تعرفي إنك في علاقة مع نرجسي؟

إزاي تطلبي لنفسك فرصة تانية؟