أجمد ٦ ستات في ٢٠٢٠

بيقولوا إن ٢٠٢٠ كانت من أسوأ السنين في العالم، يعني كورونا و إقتصاد واقع و عزل و إحباط و حاجات كدة كتير ، إلا إنه في ٢٠٢٠ في ست ستات اثبتوا للعالم إن الست المصرية لا بيوقفها حجر صحي و لا حظر تجول و لا قفل مطارات و لا غيره .

ستات ملهمين بكل معني الكلمة و أكيد إلهامهم جاي من تجاربهم و حواديتهم و شغلهم علي نفسهم و إحساسهم بأهمية وجودهم في الحياة ، و إن البنت أو الست وجودها مش للتكملة! هي لوحدها أساس.

أولا: منة شلبي

منة من اكتر الممثلات الموهوبات في جيلها، و في ٢٠٢٠ شاركت بمسلسل ” في كل أسبوع يوم جمعة”، و المسلسل كان مختلف عن المسلسلات إللي متعودين نشوفها، من أول الحدوتة لحد كل تفصيلة في التمثيل و الإخراج و الإضاءة و كل عناصر المسلسل، و طبعا كان الإقبال عليه تاريخي خصوصا في فترة الحجر الصحي. الإنجاز إن منة إترشحت بأدائها في المسلسل دة لجايزة ” إيمي” التليفزيونية الدولية لجايزة أحسن ممثلة، المسلسل من إخراج محمد شاكر خضير والمسلسل متاخد من رواية بنفس الاسم ل “إبراهيم عبد المجيد “. الترشح دة يعتبر أكبر ترشح لمنة من أول دخولها التمثيل في ٢٠٠٢  ، و يعتبر الترشح الأول لإي ممثلة مصرية عن الجايزة دي و دة في حد ذاته إنجاز لفن و موهبة البنت و الست المصرية.

ثانيا: مني ذو الفقار 

مني ذو الفقار هي محامية وناشطة حقوقية، أتصنفت رقم ٢٤ من أقوي ١٠٠ سيدة أعمال في الشرق الأوسط لسنة ٢٠٢٠ في مجلة Forbes -وإللي معروف إنها من أشهر مجلات الأعمال في العالم-.

مني مدافعة نشطة جدا عن حقوق الإنسان عموما والمرأة خصوصا، مني بتشارك في صياغة القوانين المتعلقة بالتشريعات الإقتصادية وكمان بتساعد في تطوير القوانين الموجودة دلوقتي.

ثالثا: نادين أشرف 

نادين كانت ضمن أكتر ١٠٠ ست مؤثرين حول العالم في ٢٠٢٠ وفق لل BBC ، نادين هي مؤسسة اكاونت “Assault police ” علي إنستجرام و إللي خلي ستات و بنات كتير يبدؤا يحكوا عن أحداث التحرش الجنسي إللي اتعرضوا و بيتعرضوا ليها ، فخلقت مساحة أمنة إنهم يحكوا و كمان يلاقوا الدعم إللي محتاجينه عشان مايخافوش يطالبوا بحقهم من المتحرشين إللي أذوهم.

رابعا: ميار شريف 

ميار عندها ٢٥ سنة وقدرت تجيب أعلي معدل في تصنيف رابطة ألعاب التنس لمحترفات التنس الفردي بمجموع ١٧١ وفي الزوجي بمجموع ٢٦٨ ودة كان في البطولة إللي أتعملت في ١٦ مارس ٢٠٢٠.  ميار فازت ب ٨ القاب فردية و٦ القاب ذوجية في حلبة ITF  للسيدات.

خامسا: مي زايد 

مي هي كاتبة ومنتجة ومخرجة، وحققت انتصار كبير جدا في ٢٠٢٠ وهو إن فيلمها الوثائقي “عاش يا كابتن” كسب جوايز كتير في مجموعة من المهرجانات الدولية وكمان إترشح لاوسكار الأفلام الوثائقية، دة غير إنه مؤخرا بدأ يتعرض علي نتفلكس . الفيلم دة فضلت مي بتصور فيه علي مدار ٤ سنين و هي كانت المنتجة و الكاتبة للفيلم جنب إخراجها ليه، الإنتصار دة  بيعتبر خطوة مهمة جدا لسينما المرآة و بيبن مش بس موهبة البنات أو الستات في عالم التمثيل لكن بيقول أد إيه يقدروا ينفذوا  ويقودوا فريق عمل فني كامل و يطلعوا بنتيجة مشرفة مش بس محليا لا كمان عالميا .

سادسا: إلهام فضالي

في ٢٠٢٠ قدرت إلهام تحصل على جايزة أحسن بحث في الفيزياء التطبيقية، أهمية الموضوع إن الجايزة دي جت من مجلة عالم الفيزياء و إللي اختارت بحث إلهام علي إنه أفضل بحث في ٢٠٢٠ علي مستوي العالم كله. المجلة دي تابعة لواحد من أكبر مجامع الفيزياء في العالم ومقرها في إنجلترا.

الحقيقة إن كل دول بيعتبروا من أجمد ستات و بنات مصر في ٢٠٢٠  لإنهم حققوا إنجازات عالمية، إلا إنهم مش لوحدهم في غيرهم و زيهم كتير حققوا إنجازات مهمة في ٢٠٢٠ حتي لو كانت إنجازات بسيطة، اعتقد إن كل حد مننا حقق إنجاز مهم في السنة دي حتي لو ماكانش متصنف عالميا ،أديكوا مثل بسيط أوي ” كل أم عرفت تعدي بقعدة ولادها في البيت في سنة الحجر الصحي دي و ماتجننتش  تعتبر من اجمد الستات في ٢٠٢٠  حتي لو كانت دي الحاجة الوحيدة إللي عملتها في سنة الكوارنتين”

في أصعب سنة عدت على العالم كله في العصر الحديث أو علي جيلنا عموما، كل بنت و ست و كل واحد عدي من ٢٠٢٠، اكيد كان له إنجاز و أتعلم حاجات جديدة عن نفسه و مع نفسه، تخلينا نقول عليه من اجمد الناس في ٢٠٢٠. 

دمتم جامدين ومؤثرين