جوزك مسافر…تقعدي في بيتك إنتي وأولادك ولا تقعدي مع أهلك؟

الأمومة مش شئ سهل خالص وسواء كنتي أم جديدة أو أم مخضرمة فالموضوع مرهق جدًا جدًا وإللي ممكن يزود الإرهاق ده أكتر وأكتر إنك تكوني في كل ده لوحدك.

فيه ستات كتير أجوازهم يا بيشتغلوا بره مصر أو بيشتغلوا حرفيًا طول الليل والنهار فا فيه أمهات بتفضل إنها تقعد في بيت أهلها لحد ما جوزها يرجع أجازة من السفر وترجع شقتها.

وبالرغم إن بيت العيلة ده بيكون فيه لمة وونس ليكي وللطفل بس الست إللي إتعودت إنها تكون ملكة متوجة في بيتها بيكون صعب ترجع تتأقلم مع حد تاني حتى لو أهلها، وإللي بيخلي الموضوع أصعب أكتر إن الأهالي – بحكم كبر سنهم طبعًا – مش بيبقوا قادرين يتحملوا عياط وزن الأطفال فالموضوع كله بيوصل إن الأم – شبه سينجل – مش قادره تقعد في بيت أهلها وحاسة إنها مش على راحتها و لا عارفة تعيش في بيتها لوحدها لإن جوزها مسافر .

طيب جربتي تقعدي في شقتك لوحدك؟ جربتي تمارسي الأمومة المنفردة؟

تعالي أقولك شوية خطوات تسهل عليكي إنك تعيشي في بيتك مع أولادك  لوحدك و كمان تعرفي تبسطي نفسك:

أول حاجة إعملي دايرة صحاب 

أنا واحدة من الماميز إللي الظروف حاليًا خلتني أنا وجوزي مش مقيمين في نفس البلد ونظرًا لأن بيت أهلي بعيد عني، فقررت إني أتعرف على الماميز إللي ساكنين حواليا، عملت بوست على الفيس بوك بمكان إقامتي وعزمت الماميز إننا نتعرف على بعض.

جه امهات كتير أوي وعملنا جروب على الواتس أب وعملنا أكتر من خروجه ،وإتعرفنا على بعض وبقينا بنروح بيوت بعض وننزل نعمل شوبينج ونتمشى حولين البيت، على الرغم من إن تكوين دايرة صحاب جديدة مش بتكون سهلة، خاصة في سن كبير، بس إنك تتعرفي على ناس شبه ظروفك ده بيهون عليكي كتير أوي وبيعدي أيامك بجد من غير ما تحسي بيها.

تاني حاجة الروتين لا غنى عنه

الروتين مهم أوي في حياة أي طفل ومريح ليكي إنتي كمان، وعشان طبيعة الأطفال متطورة فهتلاقي الروتين كل شويه بيتغير وده طبيعي بس أهم حاجه لازم تحاولي إنك تثبتيها هي: مواعيد النوم والصحيان والأكل. وبعد ما إبني دخل الحضانه، الروتين بقى ثابت أكتر، النوم بقى في ميعاده، ونرجع من الحضانة نلعب شوية أو ننزل مع الماميز الحلويين وأطفالهم وفي الويك إند عند جدو وتيتا.

كان مهم ليا وسط الروتين ده كله إني أخد مساحة ليا لوحدي أفصل فيها، فكنت أنيمه وأتفرج على فيلم أو أرقص أو أسمع مزيكا ولما نروح لجدو وتيتا أوقات بسيبه وأنزل ألف بالعربية ساعه مثلًا، اللحظات ديه فرقت نفسيًا معايا كتير وشحنت طاقتي وخلتنني قادره أزق اليوم.

تالت حاجة في أيام هتكون صعبه وده طبيعي

حتى السوبر هيرو بتجيله أوقات وبيضعف فيها، هتعدي عليكي أيام هتكون صعبة، إبنك مش هيخليكي تنامي بليل كويس وبنتك مش عايزة تبطل عياط، الأيام ديه هتخليكي حاسة إنك مش قادرة تتعاملي لوحدك ومحتاجة لجوزك يكون معاكي، الأيام ديه هتخليكي شويه حاسة إن جوزك  إتخلى عنك وإن المسئولية كبيره عليكي ومش مستحملة.

في الأيام ديه أنا كنت يإما بروح لمامتي كام يوم أو حماتي أو بنزل أودي إبني أى منطقة لعب للأطفال وأقعد أنا في أي كافيه أفكر في اللا شئ.

رابع حاجة الأهم من كده لازم تعرفي إنك جوزك كمان مش مرتاح

أه هو بينام في سريره لوحده ومحدش بيخبط فيه وهو نايم، أو يصحيه مفزوع عشان بيعيط أو جعان، أو عمل تواليت على نفسه، بس إتأكدي إن غيابه عن ولاده ،وإنه مش داخل في تفاصيل حياتهم ديه حاجه أكيد مضايقاه وممكن تكون مسبباله إكتئاب لأن أي أب طبيعي نفسه يكون متواجد في حياة ولاده يوم بيوم.

في الأيام دي بتكلم مع جوزي وأفضفضله وبستريح لما أعرف إن مجهودي متقدر وإن الأيام الصعبة ديه هتعدي والدنيا هتحلو تاني، مهم أوي أوي هنا إنك تتكلمي مع جوزك ويببقى في حوار بينكم مفتوح أو فضفضة عشان إنتي وهو تقدروا تكملوا وتعدوا المرحلة الصعبة ديه.

خامس حاجة إختاري تبقي سعيدة

الحياه كلها إختيارات ولو إخترتي تعيشي تجربة الأمومة المنفردة ديه بشكل سلبي هتلاقي نفسك مضغوطة ومكتئئبة ومش حابة أيامك ولا طايقة أطفالك.

أنا كان عندي إختيار أعيش في بيت أهلي إللي قريب أوي من بيوت أصحابي وبنات خالاتي، بس قررت أنفصل وأقعد لوحدي أنا وإبني لإني عارفة إني إتغيرت والتغيير ده مش هيناسب طابع الحياه إللي أهلي عايشينه وفي نفس الوقت حبيت أخلق أنا طابع حياه ليا أنا وإبني يكون مناسب ليا وماشي مع دماغي وتفكيري- إللي أكيد مش عاجب أهلي 🙂

للأسف الظروف ساعات بتحطنا في مواقف بنضطر إننا نجمد عشان نواجهها، إنتي تقدري تمارسي مبدأ الأمومة المنفردة بكل إحترافية بس الموضوع هيحتاج منك شوية مجهود وإصرار، أكتر من الست اللي وضعها الزوجي طبيعي، وعن تجربة شخصية أنا بقولك الموضوع يستاهل بجد لأنك مش بس بتحسي بإستقلال وإنك قادرة تعملي كل حاجه ومش عبئ على حد، لأ ده كمان بيقربك أوي من أولادك وبيخليكي مركزه مع كل تفاصيلهم أكتر.