حظك إيه في أكتوبر ؟

معظمنا بنحب آوي فكرة الأبراج و خصوصا الجانب العاطفشي ، عشان كدة هنقول لكل برج المتوقع يحصله في حياته العاطفية في أكتوبر وفقا لكلام الفلك والله أعلم بس  مش باي طريقة نوووو بطريقة إنطلقي… ماتيجوا نشوف .

برج الحمل 

مبدئيا كدة برج الحمل برج ناري و بينسجم جدا مع الأسد و الميزان و القوس و مابيندمجش خالص مع الجوزاء و الحوت و العذراء 

طيب ماذا سيحدث في أكتوبر عاطفيا ؟ مفأجاة هيحصل حاجات متناقضة 

 – مبدئا كدة للسينجلز بيقولولكم في فرص جديدة ، يعني نركز كدة شوية عشان في حاجة جاية في الطريق 

 – اما المتجوزين ففي حالة من الشغف و الإستقرار الزوجي و حبة  نهم جسدي كدة علي الماشي 

– لو كنتي سينجل احتمال تدخلي علاقة حب جديدة في أول أسبوعين من الشهر و لو متجوزة يبقي في حل لمشاكل ما بينك إنتي و جوزك متكررة 

– المفاجاة إنك ممكن تميلي لشخصين في نفس الوقت اوبااااا

– هيكون في مشادات حادة في علاقاتك العاطفية و في ناس منكم  هيبقي عندهم خيبات أمل لحد آخر يوم في الشهر 

يعني من الآخر حبة هيتبسطوا و يستقروا و حبة هيتحط عليهم فنركز بقي في الحالتين 

برج الثور 

البرج دة أنا شخصيا علاقتي بيه كلها مشاحنات بس مش مشكلة ، الثور برج ترابي و بيندمج جدا مع العذراء ، الحوت، الجدي  و السرطان . و مش بيندمج مع الحمل ، الجوزاء و القوس 

ماذا سيحدث عاطفيا ؟ سيحدث مصاعب ! ياريتني ما قلت .

من أول كدة ٦ أكتوبر نركز مع بعض عشان في حاجات هتوضح عاطفيا و في استرجاع لعلاقة كنت مهددة إنها تخلص،

شهر أكتوبر لبرج الثور هيبقي مستبعد فيه الجواز و هتبقي العلاقات العابرة أكتر كتير ، هيبقي في تراجع في علاقة كمان موجودة بالفعل ، دة غير سوء تفاهم هيحصل بين المتجوزين أو المرتبطين ، إحنا قولنا شهر صعب علي الثور .

ممكن تفرضي عل شريكك شروط تضايقه و تثير غضبه فحاولي تخلي بالك من إن المواضيع توسع منك خصوصا في الأسابيع الاولي من الشهر. 

ممكن تتضايقي من شريكك إنه مش مهتم بيكي ، في حد هتقابليه بشكل غير متوقع في مكان غير متوقع في آخر أسبوع من الشهر فخليكي مستعدة و ربنا يستر !

برج الجوزاء

أبو شخصتين القمر ، برج هوائي جميل ، بيندمج مع الميزان ، الأسد و الدلو و مابيندمجش مع سرطان، ثور وحوت .

شهر أكتوبر خِطواتك فيه بطيئة حبتين مع شوية لغبطة ، يعني لو  إنتي في علاقة ، العلاقة دي هتثير شوية مشاكل ، دة غير إن في علاقات غير شرعية أو غير جدية يا إنتي بتلعبي بحد يا حد بيلعب بيكي ، أنا رأيي بلاش لعب عشان بيجيب وجع مش عايزينه !

معلش في اللي هقوله بس بيقولك إحتمال تقفلي من العلاقات كلها بسبب حاجة هتحصلك .

مهم أوي للمرتبطين إنك تكوني صريحة مع شريكك و تحلوا المشاكل قبل ما تكبر.

ملخص الجوزاء لأكتوبر لا تخافوا و لكن احذرواااا.

السرطان 

برج مائي جميل بيندمج مع العقرب و الحوت و الجدي و مابيندمجش مع القوس و الحمل و الجوزاء.

إيه حالتك العاطفية في أكتوبر ؟  شهر المشاكل … صدمتك ؟ إني آسف 

أول أسبوعين هتتفتحلك شوية طرق و علاقات عاطفية جديدة ووعود بس بعد شوية هتفقدي حماسك أصلا لموضوع العلاقات ، لو كنتي بتدوري علي حب حياتك إن شاء الله هتلاقيه بس الحقيقة إنك هتقرري تأجلي  المقابلة أو هتاخري آخد القرار .

هيبقي في شوية مغامرات خصوصا لو مرتبطة و شريكك حاول يلاقي حلول لمشاكل عندكم . علي آخر الشهر هتبدأي تتقبلي آكتر ظروف شريكك. في أشارات بسيطة للمشاكل إللي هتواجهيها في أكتوبر عندك فلوس ماكنتيش عاملة حسابها هتظهر و لازم تتدفع ، في وعكة صحية و بعدها هتعديها و تقومي أحسن .

الأسد

برج ناري شعنون و مجنون ، بيندمج مع الحمل و القوس و مابيندمجش مع الحوت و الجوزاء و الجدي .

الأسد من المحظوظين عاطفيا في أكتوبر لإنه  هيبدأ علاقات عاطفية عذبة جدا و هيعمل مقابلات اجتماعية مهمة و مريحة ، و كطبع الأسد الجميل هيثير غيرة شريكه و هيحتاج يبرر له موقفه و أفعاله .

ولإن الأسد مش وديع فللمرتبطين هيعملوا شوية مشاكل مع شريكهم لإنهم هينشغلوا عنه بسفر أو شغل 

عنوان الأسد في أكتوبر أرجوك أوعي تغير أنا حواليا كتير !

العذراء

برج ترابي مُتعب ! العذراء بيندمج مع السرطان و العقرب و الحوت و مابيندمجش مع الحمل و الميزان و الدلو .

شهر الفرص للعذراء !

في أول أسبوع هيحصل لقاء مهم جدا و في احتمالات لحاجات حلوة ، هتتعرفي علي شخص في غداء أو سفر أو احتفال عائلي و الكلام مع الشخص دة هياخدك لميعاد معاه و هتبقي متحمسة له آوي آوي . في ريحة استقرار و أخبار سعيدة جاية!

أبشري يا عذراء!

الميزان 

يعني أحسن ناس آوي بقي -عشان أنا ميزان عادشي- برج هوائي فضفاض بيندمج مع الجوزاء و الحمل و الدلو و مابيندمجش مع العذراء و العقرب .

فقرة أكتوبر العاطفية تتمثل في عنوان “مارس سحرك يا قمر ” ، من الآخر كدة بيقولك هتمارسي الآغواء في أقصي صوره و هتباني كاكتر واحدة عذبة و ساحرة ، لو إنتي مرتبطة هتبقي فخورة آوي بعلاقتك، دة غير إنك هتتشيهصي باهتمام شريكك ليكي  ، لو كنتي لوحدك فأحب آطمنك إن الحب هيفضل وراكي مهما هربتي منه . دة غير إن للسينجلز بيقولك  الفلك جايب لك حب علي فجأة فاستعدي للأحداث السعيدة.

ملخص الميزان لأكتوبر “آشي خيال يا ناس “

العقرب 

معرفش عقارب كتير بس هو برج مائي و بيندمج مع السرطان و العذراء و الحوت و مش بيندمج مع الجوزاء و القوس و الحمل . من الأبراج المحظوظة في أكتوبر كمان . بيقولك إنك هتستمتعي بالحب المتبادل ، كمان الفلك بيقولك إنك هتقابلي حب صادق و رومانسية كبيرة لو عديتي شوية تفاصيل صغيرة. 

أكتر علاقاتك العاطفية مرتبطة بناس أغنياء ، و للي مش في علاقة بيقولك هتقابلي الحب و أنت بتجري ورا الفلوس في صفقة شغل أو معاملة مصرفية أو شغل في عقارات .

يعني يا عقرب أكتوبر بيقولك مليونير مليونير بكره هبقي مليونير .

القوس   

برج ناري بيندمج مع الجوزاء و الحمل و مش بيندمج مع الثور و العذراء و السرطان و العقرب و الجدي – ما شاء الله واضح إنه مابيتفقش مع حد-

أكتوبر للقوس بيعتبر برده شهر حلو للاستقرار و الحب ، في وعود عاطفية ممتازة هتظهر مع يوم ١٨ أكتوبر ، سواء مرتبطة او لأ، شهر أكتوبر كله هتبقي فيه محبوبة جدا و بتتعاملي باهتمام كبير  و متقدرة جدا من كل اللي حواليكي و إللي بيحبوكي . لو كنتي سينجل أحتمال تاخدي قرار إنك تدخلي في علاقة في أكتوبر .

عنوان القوس في أكتوبر “دلع عيني دلع ، دلع روحي دلع…اهاا”

الجدي 

برج ترابي غامض و قامط ، بيندمج مع العذراء و الثور و العقرب و الحوت و مابيندمجش مع الأسد و الميزان و الجوزاء و الحمل .

وضعك العاطفي بيقول إنك هتحني لذكريات الماضي و هتبقي عايزة تلاقي حبيب يفهمك و يحبك ، أحتمال تحققي شوية إنجازات عاطفية في النص التاني من الشهر . كل شوية هتظهر لك فرص مفاجاة لعلاقات ادريسها كويس . لو كنتي مرتبطة هتحاولي تعملي أي حاجة عشان ترضي حبيبك خصوصا لو كان مخلص ليكي . للسينجلز في منكم هتقابل شخص و تقع في حبه و هي بتعمل عمل انساني .

ملخص الجدي الفرص جاية أهو ركزي و ماتضيعهاش 

الدلو 

برج هوائي فرفوش ، بيندمج مع الجوزاء و القوس و الميزان و مابيندمجش مع السرطان و العذراء و الثور .

 أكتوبر للدلو في وضوح جامد بقي ، يعني هتقولي إللي في نفسك بوضوح . في احتمالية تبقي معجبة باتنين في نفس الوقت و إحتمال يبقي في أكتر من حد معجب بيكي في نفس الوقت وعيلتك هتساعدك علي الاختيار. ممكن جدا تقابلي شخص فيه كل اللي إنتي عايزاه فركزي و ماتضيعهوش من إيدك .

 يا دلو “الفرصة بنت جميلة راكبة عجلة ببدال” ماتضيعهاش

الحوت 

برج مائي بيندمج مع السرطان و العقرب و العذراء و مابيندمجش مع الأسد و الحمل و الجوزاء .

بصي يا ستي إحتمال تقابلي شوية مشاكل في علاقاتك العاطفية ، إحتمال في الأسبوع الأول تقابلي حد تعجبي بيه من أول نظرة، من الأسبوع التاني هتبدأ معاكي شوية مشاكل و لغبطة في إنك تشرحي مواقف معينة ، في ناس كنتي بتحبييهم و نظرتك ليهم هتتغير أو هتحسي إنك مش مبسوطة من تصرفاتهم .

هتعدي مرحلة كدة من التردد و هتبقي مش عارفة إنتي عايزة إيه بالظبط . في ناس منكم علاقاتهم هتبقي جدية أكتر علي نص الشهر ، و في ناس كان عندهم مشاكل مع ناس قريبين و هيرجعوا يتفاهموا معاهم و يحلوا المشاكل دي .

ملخص الحوت  في أكتوبر ” أنا مش عارفني أنا تهت مني “

و بكدة نبقي ضربنا كل الأبراج في الخلاط لشهر أكتوبر ما بين مشاكل مشاكل و لولولييي أالف  أالف مبروك 

و في الاخر الله اعلم، أدينا كلنا هنشوف مع بعض 

إنجوي ..