How to deal with PMSing period?

في يوم صحيت من النوم و نزلت رحت الشغل ، و أنا في الطريق،  زعقت و اتخانقت مع كل العربيات، وواحد كسر عليا فنزلت كسرت له فانوس عربيته و مشيت،

 وصلت الشغل و دخلت لمديري، لقيته قالب وشه، و مش عاجبه الشغل اللي بقالي أسبوع مابنمش و بشتغل عليه، قمت ملبساه اللاب توب في وشه،

خرجت قعدت في المكتب موبايلي مرديش يفتح ببصمة أيدي، قعدت أعيط ٣ ساعات بعدها! شششششششش ومات الجمهور جميعا !

طبعا كل دة ماحصلش يا جماعة ماتقلقوش ،

 بس دة اللي بيبقي نفسي أعمله في فترة البي ام اس ، – فترة قبل البيريود-  و فترة البيريود نفسها،

 بالنسبة لمعظم البنات و الستات الهرمونات بتبقي في مراجيح مولد النبي في فقرة :

-البي ام اس و البيريود

في الفترة دي بالذات ، بتبقي حساسة جدا جدا ، و في بعض الآحيان بتبقي عندك طاقة الغضب إيه؟ الله اكبر، تخليكي عادي جدا تصحي من النوم الصبح تقدمي أستقالتك، تطلبي الطلاق، تقعدي تتخانقي مع دبان وشك عاااااادي!

عندي واحدة صاحبتي عندها فقرة طلقني كل شهر تقريبا، في مرحلة البي ام اس و البيريود ، بس الحمدلله جوزها بقي عارف إن دي خناقة البيريود بتاعة كل شهر، فقرر إنه يلتزم الصمت و يحتوي الموضوع لما تطلع الطلعة دي  .

مواقف و طرائف كتير بتحصل في الفقرة دي ،

أعرف واحدة في فقرة البي ام اس ، طلبت آكل من برة ، جت البطاطس مش سخنة ، قعدت ساعتين حرفيا بتعيط، وحاسة إن العالم كله متآمر ضدها ، لدرجة إن البطاطس تيجي باردة ليها هي بالـذات.

واحدة تانية اتفرجت علي إعلان موني، الشيكولاتة بتاعة زمان و قعدت تعييييط ، عشان الشيكولاتة دي وحشتها و مبقتش موجودة .

اما عن طلعة  النكد و الغضب لا تخلو من إنك تبدأي تفكري في القديم و الجديد، ممكن تفتكري حاجات قديمة جدا، و تزودي في طاقة الغضب و العصبية و العياط ، يعني ممكن تفتكري إنه إزاي وأنتي في ثانوي مثلا صاحبتك كلمتيها و كنتي عايزاها وهي ماردتش ، وفجأة تبدئي تفكري إنه إزاي عملت كدة؟ و تفكري جديا إنك تقطعي علاقتك معاها حاليا و للأبد عااادي !

الحقيقة إنه اللي بيحصل دة، مبيبقاش بمزاجنا ، بالعكس ، التغييرات اللي بتحصل في جمسنا في الفترة دي بتأثر علي حالتنا النفسية بشكل لا أرادي ، أه هي بتبقي  بداية ،  بداية تبويض ، يعني  جسمك بيبقي بيتمهد لإنفجار شهري داخلي ونزيف دموي !  حاجة بسيطة خالص مش كدة؟

فطاقة  ومشاعر التعب، و الغضب، و الرفض، و النكد، و الأوفر، مابتبقاش إختيارية في الوقت دة ، و كل واحدة و المشاعر اللي بتزيد عندها وقتها ،علي حسب طبيعة جسمها و مدي قدرتها علي التحمل !

بس في شوية نصايح ممكن تعمليها تخفف عنك في الفقرة دي زي :

١-الحمام السخن ديما بيساعد علي بسط عضلات البطن و عضلات الجسم عموما .

٢-المشي ٣٠ دقيقة يوميا خصوصا قبل البيريود بيساعد علي تقليل الوجع،  آو ممكن تلعبي أي نوع من أنواع الرياضة ، غير إنه بيقلل الوجع، و بيغير المود و بيديكي نشاط.

٣-أكل اللوز و الشيكولاتة قبل البيريود بيساعدوا في تحسين المزاج .

٤- شرب مياه وسوائل كتير ،لأنها بتساعد في تقليل أنتفاخ البطن.

٥- كلي أي حاجة بتزود هرمون “السيروتونين” لأنه بيحسسك بالسعادة و بيقلل التوتر.

٦- ابعدي عن الكافيين و الكحول، لإنهم بيزودوا التوتر و الآرق. 

٧-كلي وجبات صغيرة طول اليوم.

٨-خدي كالسيوم ، ودة وفق لدراسة اتعملت ، لقوا إن الستات اللي بتاخد كالسيوم بيبقوا أقل في التعب و الكسل و الإرهاق و الاكتئاب، في فترة البي ام اس.

٩-حاولي تعمل حاجات بتقلل التوتر ، زي اليوجا أو التآمل .

١٠- أسمعي مزيكا بتحبيها ، أتفرجي علي فيلم بتحبيه ، من الأخر دلعي نفسك.

في النهاية بقي، ورداً علي اللي هيقول ، أهو شفتوا الستات نكديين إزاي ؟ شايفاك ياللي هناك !

الحقيقة إنه بالرغم من كل دة ، الا إننا بعد الوقت دة ما بيعدي، بنفضل نضحك علي اللي عملناه ، و نقعد نحكيه في فقرة مواقف و طرائف بينا و بين بعض، أو حتي علي جروبات البنات و الستات كفقرة للترفيه و الضحك ، و كل واحدة تقول لنفسها “لا بس بصراحة كنت اوفر، بس يالا حصل خير، بتحصل في أحسن العائلات “. 

اه هرموناتنا أوقات كتير بتنكد علينا ، بس لإننا بنستحمل حاجات و تغييرات في جمسنا محدش يستحملها ، فنصيحتي إن كلنا نحاول نستحمل بعض في الأوقات دي ، وندعم بعض و نطبطب علي بعض ،

 و لكل الرجالة اللي بتقرأ ، حاول تبقي متفهم أد إيه البنات و الستات بيعدوا بحاجات صعبة، فسواء أمك أو أختك أو حبيبتك أو مراتك ، حاول لما تلاقي هرموناتها منكدة عليها ، وتحس إنها حساسة زيادة شويتين ، أو غضبانة حبتين،  أنك تطمنها و تستوعبها و تهديها ، بدل ما تستفزها زيادة و تقف لها علي الواحدة ، و لو فعلا قدّرت و فهمت، هي كمان هتشيلهالك و هتحطك في عينيها.

هرموناتي يا نااااس ممكن تبقي نكد و ممكن تبقي نكتة،

 بس الأكيد إنها مش بايدنا ،

فمتضغطيش علي نفسك، وحاولي تخففيها علي نفسك وأعرفي إنها وقت و بيعدي ، وفي أوقات بتسيب لك مواقف بتضحك تقعدي تفتكريها و تضحكي علي اللي عملته فيكي هرموناتك.

كل شهر و هرموناتنا مركبانا مراجيح مولد النبي 🙂