How to spice up your sexual life after a long marriage?

بعد سنين كتير من الجواز أو في حالات تانية بعد وقت قليل من الجواز ، بتدخل حالة من الرتابة و الملل و الروتين في الحياة عموما، وفي ال sexual life خصوصا ، و بيقلب الموضوع ان الست شايفه جوزها الراجل أبو فانلة بحمالات اللي ماشي يطفي نور الشقة، و الراجل شايف مراته ثور هايج في عنبر سبعة و هي بتذاكر للعيال ، فواحدة واحدة حتي بيفقدوا احساسهم او انجذابهم لبعض جنسيا، و الموضوع بيقلب واجب أو حاجة طبيعية و جسدية لازم تتقضي وخلاص ، 

عشان كدة في شوية حاجات هنقولها ممكن تساعدكم ترجعوا ال passion أو تساعدكم to spice up your sexual relationship :

  أولا: أعرفي جسمك و أنتي بتحبي إيه؟

دي أول حاجة و أهم حاجة ، سواء بقي متجوزة من كتير و لا من قليل ، عشان تستمعي في أي علاقة جنسية مهم أصلا تتعرفي علي جسمك و إيه الحاجات اللي بتبسطك؟ عشان دي أول خطوة لأي حاجة بعد كدة، وكتير مننا كستات ماتربوش و لا أتعلموا يعرفوا عن جسمهم أو يفهموا طبيعة جسمهم ويعني إيه أصلا نشوي و الوصول ليها بيحصل إزاي ؟ فالأول كدة  it’s never too late  ابدئي تعرفي احتياجاتك و جسمك متأخر أحسن من إنك تضيعي حياتك و إنتي مش فاهمة و لا مستمتعة و لا مبسوطة في العلاقة ! و ممكن جدا اللي كان بيبسطك زمان مابقاش بيبسطك دلوقتي لإن احتياجات جسمك ممكن جدا تتغير عشان كدة مهم تفهميه و تكتشفي تغيراته.

ثاني حاجة: إتكلمي مع جوزك و أعرفي هو كمان بيحب إيه ؟ 

زي ما مهم إنك تعرفي عن جسمك مهم كمان تعرفي عن جسم جوزك، و إيه بيبسطه و إيه لا ؟ عشان كدة مهم أوي لما تخش مرحلة الرتابة و الملل يبقي في بينكم حوار ، يعني حاولي تسأليه في قعدة صفا كدة ، و أفتحي معاه الموضوع تدريجي ، يعني جسي النبض، وواحدة واحدة خلي في حوار ديما مفتوح بينكم عن اللي أنتوا الاتنين بتحبوه.

ثالث حاجة: ال Sex toys

علي فكرة الحاجات دي موجودة و من زمان جدا ، بس ماكوناش نعرفها غير بعد الأنفتاح اللي عملته السوشيال ميديا، وطبعا نتفلكس حدث و لا حرج، عرفتنا علي حاجات كتير مننا ماكنوش يسمعوا عنها أصلا ، 

الألعاب دي في منها حاجات كتير مش extreme وحاجات فعلا لذيذة جدا و ممكن ترفع من عليكي أو عليه كسوف إن الحوار يقلب interview  شغل ، في مثلا كوتشينة للكابلز بتلعبوها مع بعض  و بتجربوا حاجات مختلفة مع بعض ، طبعا ممكن في الأول تقلب فقرة ضحك ، بس أكيد التجارب الجديدة مسلية و هتفصل فقرة أننا جايين نعمل واجب و ننام.

رابع حاجة : لعبة تمثيل الأدوار 

أمنعوا الضحك بصوت محمد صبحي ، هي أسمها sexy costumes    ودي بقي الحاجات اللي بنشوفها و نفتح بوقنا كدة اللي هو اناااه ايه دة ؟ هقولكم لازمتها إيه ؟ طبعا كل واحد أو واحدة مننا حياته مع الوقت والسن و المسئوليات، بنقلب موظفين في نفسنا حبتين ، و الروتين بيبقي أساسي في حياتنا ، فكرة ال costumes بقي إنك بتلبسي شخصية مش إنتي خالص، و أدائها بيبقي سيكسي جدا ، معروف إن الشخص لما ما بيكونش نفسه أو بيبقي متقمص دور بيبقي في اريحية إنه يبقي أجرأ ، و يعمل أو تعمل اللي مش متعودة تعمله في حياتها العادية ، يعني مثلا لما تلبسي costume naughty teacher or naughty nurse   أنتي أصلا بتقلبي شخصية تانية و بتبقي أجرأ ميت مرة من شخصيتك الطبيعية، هتقولوا لي لأ اتكسف ، هقولك ما هو لو طبقنا الكام حاجة اللي قولناهم قبل كدة مش هتتكسفي ، لإن أصلا في ما بينكم حوار مفتوح و أستعداد تجربوا حاجات جديدة مع بعض .

خامس حاجة ال fantasies

 لما بيتفتح بينكم حوار عن اللي بتحبوه و بتبدؤا تجربوا حاجات جديدة ، بتبقي العلاقة ألذ كتير، و بتستمتعوا بكل تفاصيلها، و لما أنتوا الاتنين بتفهموا و تقرروا إنكم عايزين ترجّعوا شغف السكس بينكم و إنه يبقي متعة أكتر من واجب، هيبقي سهل أوي إن أنتوا الأتنين تشاركوا بعض تخيلاتكم، و إيه اللي نفسكم تجربوه مع بعض؟ و بيبقي الحوار دة أسهل كتير لما بتكونوا مقربين من بعض فكريا و جنسيا ، لإن ببساطة كل واحد مننا يمكن من وهو صغير نفسه يجرب حاجات معينة مع شريكه، بس بسبب التربية أو الكسوف أو إنعدام الحوار في الحاجات دي ، بيبقي صعب أوي إنك تقولي أو تقول تخيلاتك دي و اللي نفسك تجربيها عشان مكسوفة ، مشاركتك مع جوزك الحاجات اللي نفسه يجربها معاكي و الحاجات اللي نفسك تجربيها معاه مهمة جدا، و بتدي مساحة من التفاهم واأحساس بالأمان و التقبل في المطلق ما بينكم .

 سادس حاجة: خلي بالك من ردة الفعل 

أهم حاجة و أنتوا الأتنين بتحاولوا ترجعوا الشغف لحياتكم الجنسية ، لازم تاخدوا بالكم من ردود فعلكم في بداية الحوار و لما تجربوا حاجة جديدة ، لإن إي رد فعل عنيف أو إستهزاء من أي طرف من الطرفين ، ممكن يقفل الموضوع من بابه ، فلازم ناخد بالنا من دة كويس جدا ، و بلاش نقول لو في رأي سلبي و أنتوا أصلا بتجربوا أو في العلاقة، خليها بعدها في قعدة صفا ممكن نقول ، لما جربنا كذا ماتبسطش أوي ، خلينا نجرب حاجة تانية ، بس في وقتها ممكن جدا تعملكوا أنتوا الأتنين إحباط و تخافوا تجربوا حاجات جديدة .

آخر حاجة بقي ، مهم أوي آكد إن فكرة إننا نرجع الشغف في السكس بين المتجوزين لازم يبقي مجهود من الطرفين ، و الأتنين متفقين إنهم عايزين يعملوا كدة ، و دة اللي بيحصل بعد مرحلة الحوار ، أه ممكن الست هي اللي تاخد أول خطوة في بعض العلاقات ، و ممكن الراجل يأخد أول خطوة في علاقات تانية ، بس عشان توصلوا لنتيجة لازم أنتوا الأتنين تكونوا عايزين ترجعوا تشوفوا بعض بره الحياة الزوجية الروتينية ، 

هو يرجع يشوفك ست سيكسي مش ربة المنزل بس،

وهي ترجع تشوفك جان، مش محمد الكهربائي.

أقول قولي هذا ، و أتمني لكم حياة زوجية طويلة سعيدة متجددة و مليانة شغف.