Tips to move on in 7 days!

 كحد بيتعلق بكل حاجة بسرعة، و مش بيستوعب انه اتساب، و بتفضل روحه لازقة في القصة، عمري ما كنت اتخيل ان أعدي موقف صعب بالطريقة دي.

في valentine سنة معينة، قررت اواجه حد حاطط علاقتنا في الGrey zone و طبعا خلع و اداني مبررات عبيطة و اذن اللي اللقاء ، سابني.

و طبعا الواحد لما بيعدي التجربة بنفسه بيتعلم منها شوية دروس ممكن  تفيده وتفيد غيره، ولذلك أنا قررت إني أشارك معاكم نصايح ازاي تعدي صدمة الانفصال أو إنك اتسابتي  في ٧ أيام: 

أول يوم: أحكي لحد قريب منك و بتثقي فيه

أول يوم حكيت  *لمامتي * اللي حصل و  انهرت تماما ، و سلمتها الموبايل بتاعي عشان تعمله block من كل حتة و عملت كده فعلا و ده ريحني جدا ،  دي كانت كان أهم حاجة بالنسبة لي وقتها، إني اسيب حد يسوق العربية و ارجع انا ورا ابص من الشباك،

كنت خايفة أوي اوي من دماغي بليل بس ماما نامت جنبي، و دي حاجة تانية مهمة انك تدور علي حد قريب اوي منك  تطمن بوجوده  زي *مامتك، أختك، صاحبتك * تخليها تعدي أول ليلة معاكي و جنبك.

تاني يوم : اشتكيته لربنا وأخدت إجازة من الشغل و كلمت ناس لسه منفصلين طازة

 قررت الجأ لأكتر حد عارف قلوب الناس ، دعيت كتير اوي،  و صليت و قعدت اعيط و دعيت انه يديني القوة اعدي المحنة دي و الوقت الصعب دة،

اخدت اجازة من الشغل و ده بشكل كبير لازم يتعمل، مش هتستفيدي حاجة لما تروحي تنهاري في الشغل علشان كدة كدة طبيعي تاخدي وقتك و تعيطي، واي حاجة حتي لو كانت صغيرة ممكن تخليكي تنهاري في ثانية،

بعدها كلمت حد من صحابي متساب قريب  برده، الفضفضة اللي بتحصل من الطرفين مريحة، وبتحسسك انك مش لوحدك ، و ان فيه فئة مش كويسة لازم تعدي علينا كلنا في علاقاتنا عشان نتعلم من تجربتنا معاهم.

تالت يوم بدأت افضي دماغي من أي حاجة مهمة :

قعدت اتفرج علي friends و اللعبة ،

ليه  friends  أو مسلسلات شبهه؟ 

علشان مهم اوي تتفرجي علي حاجة ليها مواسم كتير، و ابطالها بيمروا بعلاقات عاطفية بتخلص و بيرجعوا تاني يحبوا عادي و يعيشوا حياتهم ، دي  حاجة هتشجعك متوقفيش في مكانك، وتشوفي إن كله بيعدي، و علاقة بتخلص و هتيجي علاقة أنسب و أحسن بعدها، ده غير كمية الضحك و الفصلان اللي في المسلسل، 

وممكن أرشحلك كمان Modern family و Brooklyn nine nine.

طب وليه  مسلسل اللعبة ؟

علشان كدة كدة هتجبرك تفطسي من الضحك ، آوي، آوي ، آوووووي

الحاجة التانية اللي قررت اعملها في اليوم التالت هي اني أدخل اقرأ المشاكل اللي شبهي في أي جروب ، واكتب كومنت  أنصح اللي كاتبة المشكلة و كمان بأنصح نفسي، و كتر الترديد بيخليكي 

Fake it till you make it.

رابع يوم، ما أفسده الزمن تصلحه الأكلة الحلوة:

و هنا  يجي دور السعادة المتمثلة في الأكل، طلبت أكل بحبه، وقعدت آكله باستمتاع، ولو بتعرفي تطبخي أعملي الأكلة اللي بتحبيها و أستمتعي باكلها،

بس في نفس ذات اللحظة حاولي تتحكمي في كمية الأكل، علشان منبقاش مكتئبين و بنتخن نفسنا بنفسنا علشان حاجة متستاهلش و خلصت. 

خامس يوم ، خروجة حلوة مع ناس بتحبيهم:

اخرجي مع اكتر  ناس بتحبيهم من اصحابك أو عيلتك، و أشكري ربنا علي وجودهم  في حياتك، فكرة الشكر لوحدها هتحسسك انك واخدة حب كتير و حقيقي و شبعانة منه كمان،

طبعا في الوقت ده احتمالية إنك تقارني نفسك بالناس ساعتها و تحسي انك نحس، شيء وارد جدا،  بس افتكري ان كل واحد عنده ال package بتاعته ، و محدش عنده كل حاجة ، و كل حاجة بتيجي في وقتها، يعني نجاة ربنا لينا من ناس مؤذية أو من ناس كنا هنتعب معاهم دي أهم حاجة في الوقت ده، و هي خروجنا بالسلامة من علاقة مش حقيقية أو متعبة أو مؤذية.

سادس يوم، أتقدم…. أتقدم: 

اليوم دة بقي قررت إني أعمل بالأغنية الشهيرة ” أتقدم…. أتقدم….” قررت أرجع أقف علي رجلي تاني ، وقررت ساعتها ان مفيش حاجة هتوقفني اني ابقي مبسوطة ،  وإني مش هسمح لحد وجعني  إنه كمان يبوظ حياتي بعد ما سابني،

قررت أركز جدا في كل حاجة هتحسسني بالأنجاز، سواء كان دراسة، شغل، مذاكرة، قررت إني أبقي أحسن لنفسي أولا وده الأهم،

اخر يوم ، تحت عنوان باي باي حبيبي باي باي مش معانا في الجاي :

بدأت الأنجاز الفعلي، نزلت الشغل و بطلت عياط ، و خليت عندي تدريب يومي اني أشكر ربنا  علي وجود الناس اللي بتحبني فعلا، و علي وجود مزايا كتير و نعم كتير في حياتي تستاهل إني أخلي بالي علي نفسي أكتر و أحب و أقدر نفسي أكتر.

مهم كمان نقول ان تدخل طبيب نفسي لو استعدي الامر مفيد جدا، و ده هيساعد أكتر بكتيرفي مرحلة تخطي الوجع.

 في النهاية، مش مهم تاخدي وقت اد ايه انك تفوقي و تعدي الصعب، المهم فعلا تفوقي و تعرفي قيمة نفسك و متندميش بعد ما تفوقي انك قعدتي وقت كتير و أيام أكتر كان ممكن تعيشيها بشكل أحلي، وقضتيها وإنتي بتعيطي علي اللي حصل،

 و في يوم هتبقي فعلا فرحانة من قلبك،  يا علشان شغل، أو علشان صحاب جدعان، أو علشان عيلة بتحبك، أو علشان لاقيتي رجل فعلا بيقدرك و يحبك، و بالمناسبة هما كتير و موجودين و مش كلهم مصطفي أبو حجر، المهم إنك فعلا هترجعي تبقي سعيدة جدا من قلبك!