خروجات مختلفة تخرجوها لأولادكم في الاجازة

ديما لما الاجازة بتيجي بنقعد نفكر هنسفر الأولاد فين؟ أو هنخرجهم فين ؟ و معظم الوقت تفكيرنا بيروح لاماكن اللعب ، بس المرة دي ايه رايكم نفكر بشكل مختلف و نخرج الولاد في أماكن ليها معاني و تاريخ، منها يعرفوا تاريخ بلدهم و منها يتفرجوا علي فن حقيقي يرفع ذوقهم و يحسسهم بجمال بلدهم و تاريخها .

طبعا القاهرة و الجيزة مليانين أماكن مبهرة ممكن تخرجوا الأولاد فيهم زي :

١-اهرامات سقارة

هناك ممكن يعرفوا اكتر عن اهرامات و آثار سقارة و كمان يركبوا جمال أو خيل و حاجات تانية مختلفة و مسلية و في نفس الوقت هتزود ثقافتهم

٢-القلعة 

هناك فن معماري مختلف و مسجد محمد علي بجماله اللي مايتوصفش ، هناك ممكن يعرفوا عن تاريخ القلعة و مسجد محمد علي و كمان هيشتروا حاجات يدوية حلوة جدا من فخار و مشغولات يدوية

٣-قصر عائشة فهمي 

من احلي القصور اللي فيها فن راقي و لوحات  مختلفة سواء من الحرير او الكتان ، و دة من الأماكن اللي لو ولادك ميولهم فنية هيتبسطوا جدا فيه 

٤-بيت السناري بالسيدة زينب 

من البيوت الاثرية كمان اللي اتبني من ١٧٩٤ و وقت الحملة الفرنسية علي مصر كان أعضاء لجنة العلوم و الفنون  بيقيموا فيه ، هتاخدوا فيه صور حلوة جدا و الأولاد هينزلوا لشوارع السيدة زينب و يشوفوا واحد من اكتر الشوارع المصرية الحية 

٥-متحف الحضارات 

من الذ الأماكن مؤخرا و بيجمع حضارات بلدنا و بتقدر تفرجها لاولادك في مكان واحد و بعدها ممكن تطلعوا تتغدوا في أجواء ساحرة في الفسطاط

٦-سوق الفسطاط

لو مسافرتوش الفيوم و عايزين تشوفوا حاجات الفخار و تشتروا قطع فنية يدوية في مكان تاريخي ، خدوا ولادكم لسوق الفسطاط و مش هتندموا 

٧- شارع المعز 

بكل اثاره و اسواقه و جامع الحسين ، أجواء مختلفة من قعدات و حاجات قديمة و مباني آثرية طول الشارع 

٨- اهرامات الجيزة

ماينفعش ولادك مايبقوش راحوا شافوا اهرامات الجيزة علي الأقل مرة و ركبوا خيل هناك و دخلوا الاهرامات، و كمان لو حابين تفتطروا او تتغدوا و انتوا شايفين الاهرامات دلوقتي بقي في أماكن ممكن تستمتعوا فيها بأكلكم مع احلي فيو الناس بتسافر من كل حتة في العالم عشان تشوفه 

خلوا خروجات ولادكم تبقي مختلفة و مفيدة و طبعا علي حسب سنهم، بس الخروجات دي مهمة جدا لاولادكم عشان يحسوا بالانتماء و يعرفوا حلاوة و جمال و تاريخ بلدهم !