!ماتبقيش مخدة

إنتي بنوتة جميلة أوي و صاحبة جدعة جدا ، بتخلي بالك من كل اللي حواليكي… بس مين بيخلي باله منك ؟

في كتير جدا بنات مزنوقين طول الوقت في دور المخدة ، يعني أي حد عنده مشكلة يجي يترمي عليها و يحكيلها ؛

– اللي عايزين يرتبطوا من أصحابها الولاد بيجوا يقولوا لها علي البنات اللي بيحبوهم،  لو ينفع تساعد فطبعا بتساعد.

– أصحابها و عيلتها و اللي حواليها،  كله بيجي يفرغ طاقته السلبية عندها و يمشي .

 – كله بيجي يحكي و يفضفض ، و ياخد منها دعم و طبطبة و يمشي .

“من الاخر كدة هي مخدة كل اللي حواليها “

 اللي حواليها ميعرفوش إنه علي أد ما بتكون مبسوطة إنها بتساعدهم،  علي أد ما هي كمان محتاجة اللي يسمعها ، محتاجة اللي يحبها ..هي ..مش صاحبتها ! محتاجة اللي يشوفها !

لو إنتي بنت من نوع المخدة المريحة ، أحب أنصحك شوية نصايح :

١-اسمعي و دعمي اللي حواليكي بس بحساب .

٢-مش لازم تكوني متاحة طول الوقت، خصوصا لوعندك صديق ولد و إنتي معجبة بيه ، لإنه ببساطة طول ما أنتي متاحة طول الوقت ، هتنوري الفريند زون .

٣-بلاش تخبي و تكتمي و تيجي علي نفسك ، يعني لو تعبانة و مش قادرة تسمعي حكاوي حد ،اعتذري بشياكة إنك مش قادرة تسمعي دلوقتي، ماتهربيش  بإنك مترديش ، وواجهيهم إنك ليكي مساحتك، و مش قادرة دلوقتي، عشان يحترموا المساحة دي بعدين .

٤-ماتبقيش اسفنجة للطاقة السلبية ، يعني مش لازم كله يجي يرمي مشاكله و بلاويه عندك ، فهما يرتاحوا و إنتي تتعبي ، المعروف إنك لو محاطة بحواديت سلبية ،دة هيخليكي إنتي أصلا في مود مش حلو، و يدخلك في اكتئاب لأسباب معظمها مش بتاعتك ، فمتبقيش اسفنجة لطاقة اللي حواليكي السلبية ،وودان كبيرة لمشاكلهم طول الوقت ، دة مش معناه إنك ماتسانديش و ماتسمعيش ،بس معناه إنك ماتعمليش دة طوووووول الوقت، و ماتقدميش الدعم غير و إنتي قادرة تعمليه من غير ما يكئبك إنتي .

٥-لازم اللي حواليكي يفهموا إن في وقت لنفسك ، و في وقت هما كمان لازم يقدموه ليكي ، حتي لو معندكيش مواضيع كتير مهمة ، بس هما كمان لازم يشاركوكي اهتماماتك ، و يسمعوكي،  حتي لو هيسمعوا رأيك في المسلسل اللي بتحبيه ، لازم تتعلمي تأخدي زي ما بتدي.

٦-تاني و تالت و عاشر ماتحشريش نفسك في الفريند زون مع الولد اللي انتي معجبة بيه ، عشان لو فضلتي كدة بنسبة كبيرة هتلاقيه جاي يحكيلك عن اللي عاجباه ، و يطلب دعمك و نصايحك،  و إحنا مش ناقصين ضغط و سكر والله يا عسل .

إنك تبقي صاحبة جدعة و حنينة و داعمة، دي حاجة جميلة، بس اللي مش جميل إنك تتحولي من صاحبة و صديقة وأخت لمخدة و أسفنجة، كله بيجي يرميلها و يجري و محدش شايفك و لا حاسس بيكي.

محدش هيعملك قيمة غير نفسك ، و محدش هيقدرك غير لما تقدري نفسك ، و أتعودي إن الحياة هات و خد ، حتي في دي بداوأ بهات مش خد .