Why We call it Sweet November?

طبعا كتييير جدا مننا بيستنوا شهر نوفمبر و نبقي بنعد أيام شهر أكتوبر تخلص عشان نقول welcome sweet November  بس السؤال اللي بيطرح نفسه الأول بنقول  sweet November  ليه ؟

بيرجعوا المقولة بربطها بتلات حاجات مشهورين  و هما :

١-فيلم sweet November  اللي كان سنة ١٩٦٨ و كان فيلم رومانسي كوميدي

٢-فيلم  sweet November  و دة الأكثر شعبية و اللي كان سنة ٢٠٠١ لكيانو ريفيز و تشارلز ثيرون و هو فيلم رومانسي و درامي 

٣-اغنية  sweet  و اللي وصلت لقمة أغاني ال R&B. في أمريكا في ١٩٩٢

 اما عندنا احنا بقي كمصريين فالمقولة اتضربت في الخلاط عشان تقولنا ليه هو سويت نوفمبر :

-في اللي بيربطوه بعيد الحب المصري 

-في اللي بيستمتعوا بلغبطة الجو ما بين صيف و شتا … يعني الصبح لسه صيف و بليل شتا

-اللبس الميكس بين الصيفي و الشتوي .. يعني تنزل الصبح بصيفي و معاك جاكيت لبليل عشان الجو بيسقع

-الدراسة شغالة اه بس لسه بدري علي الامتحانات

-سفريات البلبطة خلصت و الساحل قفل بس سفريات الشتاء جت

-الشغل مكدرك بس لسه عندك اجازات ممكن تاخدها 

فتحس انه سويت نوفمبر دة كدة شوب الفخفخينا الجميل .. كل حاجة و عكسها . و اللذيذ بقي كمان لما تعرفي ان جريدة الديلي ميل كانت مطلعة تقرير علي المسميات المنتشرة و مفهومها بيلغبط الناس و منها كلمة “Sweet”  اللي قال التقرير ان معناها الاستمتاع بالصعوبات او المغامرة ، و لان نوفمبر خلاط زي ما قلنا فهو استمتاعك بصعوبات التناقضات اللي فيه !

انا من الناس اللي شهر نوفمبر بالنسبة لي و بداية دخول الشتا علي اد حلاوتها علي اد ما تحسي اول ما شوية الهوا الساقعين يلمسوا وشك ان في شريط ذكريات اتفتح، هووب تلاقي كل ذكرياتك قدام عنيكي … حبة  للذكريات الحلوة… و حبة للمؤلمة اللي وجعتك!

نوفمبر بالنسبة لناس كتير هو شهر الذكريات و الحنين ، 

حنين للماضي

حنين للذكريات

حنين لاشخاص مشيوا من حياتنا

حنين للدفا و الصحبة و الحضن اللي بجد

حنين لأيام ما كنا صغيرين و مافيش مشاكل شغلانا ، و كانت اقصي مشاكلنا هي مشاكل اللعب و المذاكرة و المدرسة

تحس كدة انه في ريحة الهوا الساقع لفجر و ليل نوفمبر ماسورة ذكريات بتفتح عليكي!

و زي ما هو شهر الحنين فهو كمان شهر البدايات الجديدة ،

 لناس كتير هو شهر البدايات .. شهر قفل صفحة و فتح صفحة جديدة، 

شهر ال reset  لحياتك و مشاعرك و قرارتك .. زيك زي ورق الشجر اللي بيقع في الشهر بيتخلص من القديم و البايظ عشان يبدأ من أول و جديد علي نضافة!