الست بتحب ايه في الراجل؟

شهر فبراير معروف في العالم كله بشهر الحب ، و عشان كدة سآلت الفترة اللي فاتت ناس كتير حواليا، رجالة و ستات ، 

هي الست بتحب ايه في الراجل ؟ 

و لقيت أجابات مبهرة الحقيقة  نلخصها فالكام حاجة اللي جايين :

١-إنه يكون راجل

٢-فلوسه

٣-القوة الحانية

٤-الإحتواء

٥-الحنية

٦-مايتحبوش خالص

٧-الدعم

٨-الأمان

٩-اللي راكب مع عقدها 

١٠-كلهم مزايا و كل حاجة فيهم تتحب

طبعا إجابات كتير منهم بتضحك، بس إجابة زي “إنه يكون راجل”، شاملة جدا لحاجات كتير تانية أتقالت في الإجابات التانية؛ من حنية و احتواء و دعم و غيرها، و المفاجئ بالنسبة ليا إن الإجابة دي جت من رجالة و ستات علي حد سواء، مش ستات بس ، 

مؤخرا بقيت لما بتكلم مع كتير من إصدقائي الرجالة ، تلاقيهم بقوا هما نفسهم بيقولوا إن الواحدة عشان تلاقي راجل محترم دلوقتي و إد المسئولية و تحبه،  بقت عملة نادرة و مهمة قومية ،

 كتير منهم بقوا يشوفوا و ينتقدوا تصرفات رجالة تانية بتتصرف تصرفات غريبة جدا علي إنها حاجات عادية، زي أهمال الراجل لمراته و بيته وولاده ، عدم مشاركته مراته في أي حاجة مهمة ، دة غير الرجالة اللي بتهرب من أي مسئولية أين كانت هي إيه حتي لو كانت شغل ! عشان كدة رجالة كتير ردوا بإجابة إن الست بتحب في الراجل، إنه يكون راجل! ودي نظرة موضوعية!

 واللي قالوا فلوسه طبعا كلهم رجالة، بنظرة كدة سريعة علي اللي حوالينا و اللي بنسمع و بنقرأ مشاكلهم من الستات أو تبرير كتير من الرجالة لحاجات بيعملوها في حياتهم هي إن الست شايفاه  ATM، كتير منهم ربط علاقته بالست بفكرة الفلوس ، وحبها  ليه بفلوسه بس ، و دي نظرة طبعا نسبية،

الحقيقة  بقي  اللي عايزه اقولها لكم ، إن الست بتحب الراجل:

 اللي بتحس إنه شاريها ،

 مقدرها،

 بيحبها،

 بيحترمها ، 

بينهم تفاهم و كيميا،

 بتعرف تتكلم معاه،

 بتعرف تتفق معاه،

 بتعرف تختلف معاه، من غير ما يكون نتيجة الاختلاف قسوة و تكّبُر وعقاب،

 الست بتحب الراجل اللي بيقي قوي بيها و عشانها، و في نفس الوقت حنين عليها ،

 بتحب الراجل اللي بيكملها ،و بيفهم نقصها و يكمله، وبيديها مساحة تفهم نقصه و تكمله، من غير ما حد فيهم يوجع التاني أو يعايره بمشاكله، لإن كلنا مليانين مشاكل ، من الآخر اللي يعرف يدوب كلكوعته في كلكوعتها، عشان يتصالحوا مع العالم و هما مع بعض ، مش يزودوا كلاكيع بعض،

و أهم من كل دة ، و اللي بيكمل كل اللي فوق،  الست بتحب الراجل اللي بيبذل مجهود !

الراجل اللي بيبذل مجهود بحب حقيقي وبرغبة حقيقة في النجاح مع اللي بيحبها أو اللي عايزها تبقي شريكة عمره، من أكتر الحاجات الجذابة في الراجل، و اللي صعب أوي إي ست تقاومها، 

وهنا المقصود طبعا المجهود اللي مبذول بصدق من الراجل، مش المجهود المؤقت و المزيف، واللي كتير دلوقتي رجالة بتبذله في أول العلاقة بس ، أو لحد ما يوصلك بس ، لإن دة بقي موجود كتييييرجدا،

في رجالة بتبقي معجبة بفكرة البنت أو الست اللي قدامه، و شايفها حاجة كبيرة أوي نفسه يطولها ،

 مش حبا فيها ،لأ ، 

عشان يثبت بس لنفسه إنه جاامد ، فيفضل يبذل مجهود خرافي لحد ما يوصلها ، وأول ما توافق بيه ، يتغير عليها و يهملها ، و دة طبعا مش المجهود المقصود خالص ،

 لكن المجهود اللي جاي بحب، اللي فيه تفاهم ، و حنية و أحتواء و مشاركة و إحترام،  وكيميا، هو دة اللي مش ممكن يترفض.

الست إينّ كانت هي مين، محققة إيه؟ واصلة لإيه؟ معتمدة علي نفسها في حياتها اد إيه ؟ 

بتفضل ست،

وقلبها بيدق لما بتلاقي ، حب، وإحترام، واهتمام، ومجهود،

 لما بتلاقي، شريك، وحبيب، ووليف،

ولما الست بتحب راجل بجد، تقدر تخليه عايش طول عمره في الجنة، 

جنتها اللي بتخلقها في حياته معاها،

من الآخر، الست بتحب الراجل اللي بجد، 

مش ضله،

 ومش خيال مؤقت مرسوم علي الحيطة!