أنواع العرسان في جوازات الصالونات، قابلتي مين فيهم ؟

علي الرغم من ان معظم الجوازات دلوقتي بقت عن حب أو حتي معرفة ، الا إن جواز الصالونات لسه موجود ، ومافتكرش في واحدة معدتش بقعدة علي الأقل من القعدات العظيمة دي، طبعا في جوازات كتير من جوازات الصالونات نجحت و كملت ، الا ان في رحلة انك تلاقي حد مناسب في جواز الصالونات ممكن تقابلي أنواع غريبة مختلفة من العرسان زي :

الموظف

و دة مش بالمعني الحرفي للكلمة طبعا، وانما الأداء بتاعه بيبقي شبه الكلمة ، يعني  تلاقيه جاي في مهمة محددة ، تحسي ان الجواز دة عنده تاسك و لازم تتعمل، شر و لابد منه، فتلاقيه في زيارة صالون بيتكم أو في المكان اللي هتتقابلوا فيه ، لابس فورمال بزيادة، طريقته و اسئلته واضحة و محددة كأنك في انترفيو ، مش بعيد يقولك شايفة نفسك فين بعد خمس سنين من جوازنا ؟ أو يبقي بقي مسافر أصلا و يبعت ماما تخطب له ، فتبقي القعدة بتاعة الانترفيو مع الام  و طبعا العريس  يبقي “مشغولون اليومين دولون” فماما اللي هتخطب له عشان ينزل يلبس الدبل علطول، مش بقولكم تاسك !

البخيل

دة بقي سمعت عن نوعيتهم قصص و حواديت تموت من الضحك، يعني اللي تلاقيه رايح يتقدم وواخد معاه ازازتين بيبسي ، طبعا بيسترخص ، افرض الجوازة ماتمتش يبقي دفع فلوس تورتة لا سمح الله؟ 

واللي تلاقيه بيقولك ممكن تفتحي التورتة اللي جايباها ، اصلي بحبها اوي و عايز اكل منها ، 

واللي تلاقيه داخل من أولها بيسال عن مرتب العروسة قبل مايشوفها حتي ، دة بقي رايح يكون نفسه، مش رايح يتجوز !

ابن ماما

كتكوت ماما بيبقي باين ، تلاقيه بين كل كلمة و التانية بيقولك اصل ماما قالت لي، اصل ماما شايفة ، او من بابه بقي احنا لازم نقعد مع ماما بعد الجواز، واللي يروح بخياله لبعيد و يقولك احلي حاجة فيكي انك شبه ماما ،

ولو طوّلتي شوية و ماكنش باين من الأول، تلاقيه  لما بيتفق معاكي علي حاجة مثلا و بعد ما يروح علطول يغيرها ، وقتها هتعرفي ان ماما عندها رأي تاني !

اللي جاي يربيها علي ايده

دول بقي اللي تلاقي فرق السن كبير حبتين – مع احترامي و تقديري لان السن مالوش علاقة تماما لو الاتنين متفاهمين- ، بس اللي اقصده هنا هو اللي تلاقيه بيدور علي كتكوتة صغيرة يربيها علي ايده، يعني تلاقيه جاي يتاكد انك قطة مغمضة و هو اللي هيشكلك زي العجينة ، واوعي اوعي لاقدر الله يطلع عندك رأي و لا شخصية تبقي بالنسبة له صعب السيطرة عليكي و بالتالي هيخاف و يطلع يجري !

ال “بارتي انيميل” بس عايز واحدة هادية في البيت 

دة بقي نوع عند فصام ، يعني تلاقيه كوول و لذيذ و لف و دار و عمل كل حاجة، و لما فكر يتجوز راح يتجوز صالونات ، واحدة مايعرفش عنها حاجة ، بس متخيل انها عايشة في اوم اوم ، بيبقي هدفه من الجوازه واحدة يسيبها في البيت تجيب عيال و تربيهم و هو يعيش حياته بره زي ما هوعايز ، اللي بيضحك بقي ان في كتير من النوعية دي بيقعوا في بنات ممكن يكون ليها علاقات سابقة يمكن اكتر منه ، بس محدش يعرف ، و هنا بقي الكرمة بتلعب دورها لان الاتنين يستاهلوا بعض !

طبعا دول شوية من النماذج الغريبة لعرسان الصالونات ، بس في نماذج طبيعية و سوية و عشان كدة جوازاتهم ناجحة جدا و كمان تلاقي بينهم الحب و الاحترام اللي مهمين جدا لاي جواز عشان يكمل.

جواز الصالونات لسه ليه دور مهم جدا خصوصا للبنات اللي دايرتهم ضيقة ، وزي ما هتلاقي تحف و عاهات من البني ادمين في رحلة عرسان الصالونات ، هتلاقي ناس فعلا كويسين جدا و احتمالية انك تلاقي شريك حياة مناسب من عرسان الصالونات نسبة مش قليلة خالص ، المهم إنك تتقبلي فكرة إنك هتقابلي الوحش و هتقابلي الحلو ، و الأهم انك تعرفي تقراي الناس قبل ما تربطي حياتك بحد فيهم.