in ,

أكتشفي..إطمني..هتعدي

السرطان عموما من الأمراض اللي ليها أكتر من مسبب ممكن يخلينا عرضة للسرطان ، و سرطان الثدي خصوصا من الأمراض إللي كل الستات معرضه ليه بشكل أو بأخر لإن واحدة من كل ٨ ستات ممكن تُصاب بيه . بس أنا مش بقولكم كدة عشان اضلمها في وشكم و لا حاجة، نوووو ابسلوتلي ، بس عشان هنورلكم بارقة أمل و نور وهي إن نسبة الشفا من سرطان الثدي في الاكتشاف المبكر بتوصل ل ٩٩٪ و دي نسبة هايلة جدا . إللي عايزة أتكلم عنه هو ٣ حاجات مهمة لكل الستات و البنات في أكتوبر الزهري :

أولهم “أكتشفي” 

مهم أوي إننا ناخد بالنا من نفسنا و من جسمنا و في دلوقتي خطوات بسيطة جدا ممكن كل بنت و كل ست تعملها كل شهر بعد الدورة الشهرية “البيريود” عشان تطمن علي نفسها في البيت و لو شكت في حاجة تبدأ تروح تكشف من بدري، و أحلي حاجة حاصلة بقالها مدة هو إن في إتجاه عام للدولة للمحافظة علي صحة المرآة بشكل عام و نشر الوعي عن أكتر إلأمراض إللي ممكن تيجي للستات و بيتعمل كشف دوري ليها .

لو شكيتي في وجود ورم في الصدر يبقي لازم تعملي كشف الماموجرام علطول، أهم الأماكن لكشف الماموجرام بالمجان هي:

١- مستشفي بهية “أول شارع الهرم “

٢-حملة ١٠٠ مليون صحة “في كل المحافظات”

٣- المعهد القومي للأورام “شارع القصر العيني”

٤- مستشفي أيادي المستقبل لعلاج السرطان “الإسكندرية” 

٥- المؤسسة المصرية لمكافحة سرطان الثدي

تاني حاجة “أطمني “

لو عندك حد من عيلتك عنده سرطان الثدي أو جاله سرطان الثدي يبقي لازم تطمني إذا كان وراثي و لا لأ ، لإن النسبة إللي قلناها و هي إن من بين كل ٨ ستات ممكن واحدة تبقي مصابة بسرطان الثدي، النسبة دي بتعلي بنسبة ٨٥٪ لو في عامل وراثي ، طيب نعرف إزاي أو نعمل إيه؟ الإجابة بسيطة لو في حد في العيلة جاله سرطان الثدي ، في تحاليل وراثية بتتعمل لباقي افراد العيلة عشان نعرف إذا كان وراثي و لا لأ، طيب لو وراثي هنعمل إيه ؟ هناخد بالنا اكتر و نبدأ نعمل الماموجرام من بدري و مش هنستني للأربعينات و نأخد بالنا أكتر من نظام أكلنا و صحتنا في العموم، لإن لو الموضوع وراثي فنسبتي بتعلّي في ال  risk  بتاعي.

  مهم جدا إننا نطمن علي نفسنا و نحاول نقلل نسب الإصابة علي قد ما نقدر. طيب لو ماطلعش وراثي هل دة معناه إنه مش هيجيلي و أكبر دماغي بقي و ماتابعش؟ لأ طبعا لإن تاني هنقول دة مرض له عوامل كتير فلو مش وراثي ممكن يُكتسب عادي ، فكدة كدة الكشف الدوري مهم جدا ولا غني عنه.

في أماكن كتير في مصر بتعمل التحاليل الوراثية لسرطان الثدي ولو إنها بتكون مُكلفة شوية بس هي مهمة عشان نطمن علي نفسنا.

تالت حاجة بقي “هتعدي” 

لو إنتي بالفعل مصابة بسرطان الثدي فأحب أقولك إنها هتعدي و هتكوني أحسن، جزء مهم جدا من رحلة الشفاء هي الحالة النفسية والطاقة الإيجابية و التفاؤل، أنا شخصيا أعرف ستات مصابات بسرطان الثدي و ملهمات لأقصي درجة، و عندهم قدرة علي الحب و التفاؤل بيخلوهم يعدوا الوقت الصعب دة بروح متفائلة و ملهمة، و من أجمل الحاجات إللي عملتها السوشيال ميديا هي وجود جروبات كاملة بتدعم مرضي مرض معين، يعني في جروب جميل جدا اسمه

 Together We CANcer  الجروب دة بيضم مرضي ال cancer  و كمان دكاترة كتير ، و لإن الدعم مهم جدا في حياتنا عموما و في المرض خصوصا ، الجروب بيقدم الدعم لمرضي السرطان، و المرضي بيقدروا يدوا نصايح لبعض و يستفيدوا من خبرات بعض و كمان بيتقابلوا و بيهونوا رحلة المرض علي بعض و بيشاركوا فرحة الشفاء كمان مع بعض، قصص كتير ملهمة و تحولت لقصص سعيدة موجودة علي الجروب دة، و هنعرض منهم قصص في المقال إللي جاي .

من الأخر لو كنتي كويسة و معندكيش حد في عيلتك جاله سرطان ثدي ، أو كان حد في عيلتك جاله سرطان ثدي ، في الحالتين  مهم أوي أوي إننا نطمن علي نفسنا و علي صحتنا و جسمنا بالكشف علي نفسنا و المتابعة الدورية و عمل التحاليل اللازمة ، ديما كان في مقولة بتتقال إنه الحاجة الوحيدة المهمة هي الصحة، وربنا مدينا نعمة الصحة، فمطلوب بس إننا نعمل إللي علينا و نحافظ عليها و نكشف علي نفسنا و لو شكينا في حاجة مانأجلش إننا نروح لمتخصص.

ولو كنتي من مرضي سرطان الثدي ، فزي ما ربنا أدانا الصحة فكمان أدانا القدرة علي إننا نقاوم المرض ، أدانا طاقة ال fight to survive ، من أول ظهور البشرية وإحنا بنقاوم حاجات كتير صعبة و منها المرض  ، بنقاوم و بننجح.

التفاؤل هو المفتاح والإيمان بقدراتنا و إنها هتعدي هو الأمل.

صحتنا تستاهل إننا ناخد بالنا منها عشان كدة

 ” أكتشفي ، أطمني و هتعدي “

Nesma Medhat Writer/Marketer/ Vlogger /Storyteller and Author for published book “إاللي إسمه إيه”

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

!ماتشتريش… بدلي

دمي كله تريقة علي فساتين الجونة يا شيخ عتمان