حامل ومش مبسوطة

 !انا حامل

خبر سعيد وستات كتير بتتمناه وبتكون طايرة من الفرح لو أتحقق…. بس الحقيقة ان في ستات تانية برده كتير مش بتكون على نفس القدر من السعادة

ممكن يكون لأسباب نفسية، مادية او مش مستعدة….الخ

أسباب كتيره وكل حالة ليها أسبابها الخاصة، لكن المشكلة الأساسية ان الستات دي للأسف مش بتقدر تتكلم او تعبر عن المشاعر دي بسبب ضغط الناس اللي حواليها، إحساسها هي شخصيا بتأنيب الضمير انها ازاي مش مبسوطة وتبتدي رحلتها مع الاكتئاب

.انا كنت واحدة من الستات دي، وبعد سنين قررت اني أتكلم عنها واحكي تجربتي

من تقريبا أربع سنين عرفت أنى حامل، كانت صدمة بالنسبة لي لأني ما كنتش مرتبة اني اخلف في الوقت ده وكمان صادفت مجموعة ظروف سيئة حصلتلي زودت إحساسي بالتعاسة والحزن، زي وفاة واحدة من اعز أصدقائي، أسباب صحية بسبب الحمل اثرت على صحتي لدرجة أنى خسيت ٧ كيلو في أسبوع -طبعا انا دلوقتي نفسي في ربعهم

كل الظروف دي خلتني ادخل في حالة من الاكتئاب اللي بييجي في الأفلام ولأول مرة افهم او أحس يعني ايه حد يفكر ينتحر

انا كنت كل يوم بخطط الطريقة اللي هاموت بيها نفسي او على الأقل أخلص بيها من الحمل؛ مرة هانط من الشباك او هاوقع نفسي من على السلم وزي ما تيجي…. الخ

فضلت شهر عند والدتي في البيت تقريبا مش بتكلم، لما حد يكلمني او يوجه لي كلام مرة أرد وعشرة لا

لما كنت أقابل حد مش باقول أنى حامل لأني مش عايزة ومش قادرة أمثل أنى مبسوطة او اتعامل مع نظرات الانبهار والسعادة في عيون اللي حواليا، لأنهم كانوا من وجهة نظري مستفزين لأقصى درجة

المفاجأة بقي ان لحد دلوقتي، وبعد أربع سنين مفيش اي حد عرف اللي انا كنت بأمر بيه…ولا أمي ولا جوزي ولا اي حد، كل الناس كانت رابطة اللي انا فيه بحالتي الصحية عشان كدة مفيش حد شك في حاجة

الحقيقة ان جزء كبير أنى متكلمتش هو أنى كنت متوقعة الاجابات بتاعة

احمدي ربنا…كتير غيرك يتمنوا اللي انت فيه

ازاي؟ ده أحلي احساس في الكون أنك تكوني ام، وتنزلي تجيبي لبس البيبي……الخ

وانت لما مش عايزة تخلفي، مامنعتيش ليه؟ وكأنه جاب التايهة وناصح وعمره ما سمع ان في ناس بتحمل وهي مانعه

او الناس بقي اللي تفتكر أنك بتعملي كدة عشان الحسد

:انا قررت اكتب تجربتي عشان سببين

اولا، ان بداية من الشهر الرابع ابتديت افوق والدنيا تمشي وحسيت ان خلاص انا عديت التجربة دي وبقيت أحسن…ودي حقيقة بس انا كان لازم أتكلم مع متخصص… حد يفهمني المشاعر اللي بمر بيها ويخليني اتعامل معاها بشكل صحي

لان اللي حصل أنى حملت جسمي حمل وضغط كبير قوي ماستحملوش وابتدى يبان عليه بعدها، وللاسف بقالي أربع سنين كل شوية في مشاكل صحية سخيفة. اعتقد ان دي كانت طريقة جسمي انه يشتكي ويقول انه أتحمل اكتر من طاقته. وعشان كدة انا نفسي اي ست بتمر بحاجة مشابهة انها تتعامل معاها وماتسكتش

ثانيا، أحب اطمئن كل ست زيي واقولها ان كله هايعدي…وانا قاصدة أنى أحط صورتي مع بنتي عشان تعرفي أنك هتكوني ام طبيعية وها تحبي ابنك او بنتك… ومش شرط زي الأفلام أنك اول ما تشيليه ها تحبيه وكده…. لا خالص انا قعدت أسبوع مش عارفة هاسمي بنتي ايه

بس اهم حاجة اتعلمي مني وتعاملي مع مشاعرك دي وماتخافيش ان حد يحكم عليكي او يحسسك أنك ام وحشة، لان اول حاجة لازم تعمليها كأم مسئولة وبتحب ولادها أنك تحافظي على نفسك وتهتمي بيها

آخر حاجة للستات اللي بتدور على حد يساعدها ومش عارفة تبتدي منين، ده عدد من الدكاترة النفسيين اللي ممكن تتواصلي معاهم

ندى محفوظ

http://bit.ly/2thlIaW

نهى ميشيل

http://bit.ly/357gHir

مصطفى شهدي

http://bit.ly/2tfTYDI

ريم الفقي

http://bit.ly/2QC9Vfo