٧ كتب عن الجواز والعلاقات هتفرق في علاقتك كتير

الكتب اللي بتتكلم عن العلاقات العاطفية عموما مش مجرد كتب والسلام لأ دي حقيقي بتساعد أي إتنين مرتبطين إنهم ينفتحوا على أراء ووجهات نظر تانيه. جمعنالكو هنا مجموعه من الكتب بالعربي والإنجليزي واللي أكيد بعد ما تقروها هتفرق كتير في علاقتكوا.

أولا كتب باللغة الإنجليزية:

1-The Seven Principles for Making Marriage Work by John Gottman

اللذيذ في الكتاب ده إن الكاتب أخد من وقته سنين بيراقب ويذاكر كل حاجة ليها علاقة بالطلاق والإستقرار الزوجي وأخد من العلاقات اللي حواليه مرجع لكتابه. وعن طريق ملاحظاته دي نجح جوتمان انه يتوقع اللي هيحصل من خلال مراقبته لطرق التواصل بين المتجوزين

 واحده من أهم ملاحاظاته دي هي إن الخناق الكتير بين المتجوزين مش معناه إن العلاقة ديه فاشله لكن معناه إن الإتنين طريقتهم في حل المشكله مختلف وده إللى محتاجين يوصلوا لإتفاق فيه.

الظريف في الكتاب دة انه  بيقولنا إللي احنا عارفينه أصلا بس بشكل منظم اكتر، يمكن جدا ماكوناش واخدين بالنا منه في وسط زحمة الحياة، و أحلي حاجة إن الكتاب ماكنش بيقول كلام نظري و خلاص دة كان بيقوله بأمثلة حقيقية موجودة حواليه.

2-Mindful Relationship Habits: 25 Practices for Couples to Enhance Intimacy, Nurture Closeness, and Grow a Deeper Connection by Barrie Davenport and S. J. Scott

أد إيه الكتاب ده حقيقي في وصفه لمشاكل العلاقات الزوجية سواء روتين الحياة الزوجية أوالأعباء المادية والمسؤوليات والأطفال وغيره من الحاجات اللي بتنسي الزوجين هما حبوا بعض ليه أصلا؟ الكاتب هنا قرر يساعد في المشكله دي بشكل  جديد وهو أنه ينصح المتجوزين إنهم يخلقوا عادات جديده وده لأن العادات على الرغم من صعوبة اننا نعملها الا انها بتدوم بمجرد النجاح في اننا نوصل لها.

الحلو هنا إن الكاتب بيفكرنا إن سهل أوي الزوجين ينسوا نفسهم وسط الزحمه ديه كلها ويكتسبوا عادات مش شبههم  سلبية سواء كانت تجاهل أو خناق مستمر أو كذب وغيره. أيوه العلاقات ومشاعرنا معقده جدا لكن الكاتب بيساعد المتزوجين بطرق ومناهج علمية عشان يحسنوا العلاقة الزوجية.

3-Couples Therapy Workbook: 30 Guided Conversations to Re-Connect Relationships by Kathleen Mates-Youngman

 في الكتاب دة الكاتب قال ان أيوه كتر الخناق بيعمل مسافه كبيره أوي بين أي إتنين متجوزين وعشان كده قرر بكل ذكاء منه قرر يقول للمتجوزين إنهم يتكلموا أكتر ما يتخانقوا.

في الكتاب بيقول  إن حل الخناق  هو الأسئلة الكتير بس مش أي أسئله، الأسئلة العميقة اللي بيكون هدفها الأول والأخير فتح نقاشات عميقة بين الأزواج عشان يعرفوا بعض بشكل أعمق زي أسئلة عن طفولتهم وعلاقتهم بأهلهم.

4-The Four Laws of Love: Guaranteed Success for Every Married Couple by Jimmy Evans

دايما الكتب اللي بتحكي عن تجربة واقعيه بتقدر تلمس القارئ وتعمل فرق حقيقي في حياته. المختلف في الكتاب ده إن الكاتب كان واخد قرار الطلاق من زوجته بس كمحاولة أخيرة منه لنجاح العلاقة قرر يجرب تجربة عملية ونجحت فعلا.

عمل إلى يعتبر بديهي لأي حد بس بيكتشفه بالصدفه،  وهو إنه حط جوازه أولويه، قرر إن الجواز شركة وعقد بين طرفين في كل التفاصيل، قال إن الجواز زي الجسم محتاج يكون صحي عشان يعيش في سلام، وأكد إن الجواز زي الروح لازم يكون نقي وصافي وشفاف عشان يكمل.

ثانيا كتب باللغة العربية:

اما لو إنتي بتحبي تقري بالعربي، بنقدملك هنا برده  كوليكسن جميل مثلا هتلاقي مجموعة كتب إنجليزية مترجمة للعربية، و كمان مجموعة تانية عربية أصيلة لكتاب من الزمن الجميل وكتاب عصريين كمان.

١-لماذا يكذب الرجل وتبكي المرأة، تأليف الزوجين آلان وباربرا بيزوهو

أتبسطت أوي لما لقيت  إن الكتاب تأليف مشترك بين إتنين متجوزين يعني هتلاقي فيه خلاصة الحياه الزوجية بكل حلوها ومرها. وطبعا الكتاب في وجهتين نظر عن العلاقة واحدة أنثوية والتانية ذكورية وده اللي مخلي الكتاب بجد ممتع. من اول إن الست إستقبالها للأحداث بيكون تراجيدي أكتر من الراجل، لحد إن الرجل بيكذب على الست عشان يوصل لهدف في دماغه أو يريح دماغه، هتلاقي في الكتاب ده تفاصيل كتيرة أوي بتحصل في العلاقة الزوجية وأراء مختلفة من الكُتّاب وجدل ممتع يخليكي مستمتعه بكل سطر.

٢-زوجة أحمد “تأليف إحسان عبد القدوس”

تخيل كتاب فيه خلاصة النصايح الزوجية وإللى من منظور كاتب وروائي كبير زي إحسان عبد القدوس هيبقى عامل إزاي؟ بإسلوب روائي محكم قدر إحسان عبد القدوس إنه يوصّل للقارئ بعض أراءه عن دور المرأة داخل الأسرة وبعض المشاكل إللي بتواجه الحياة الزوجية وإزاي يتغلب الزوجين عليها؟

٣-الرجال من بولاق والنساء من أول فيصل ” تأليف إيهاب معوض”

من أول الخطوبة ومشاكلها لحد خناقة إسم المولود وولد ولا بنت، الكتاب قريب أوي لكل بيت مصري ومشاكله. الكاتب إيهاب معوض تناول العلاقة الزوجية والمشاكل الزوجية بشكل ساخر لإنه عرض المشكلات بشكل بسيط وبلغه عامية سهله سهلت على القارئ إنه يندمج ويرتبط مع الكتاب.

و دي كانت مجموعة من الكتب إللي لو حابة نصيحة او فكرة ببلاش و انتي قاعدة في البيت علي سريرك بتقرأي و كمان بأمثلة موجودة و حصلت فعلا هتلاقيها في الكتب دي .  

و مننا كلنا في انطلقي بنتمني لك علاقة سعيدة و صحية و سوية.