إزاي تقدري تستقلي مادياً؟

طبعا طول ما إنتي معتمده على نفسك مادياً سواء إنتي متزوجة أو لأ، أُم أو معندكيش ولاد، ده ييديكي قوة وإستقلال وحرية في التصرف في حياتك وإتخاذ القرارات الخاصة بك. حتى لو شريك حياتك مش مخليكي محتاجة حاجة، مش لازم تكوني معتمدة عليه كلياً. أنا مش هتكلم هنا عن أهمية إلاستقلال المادي للمرأة باستفاضة، انا هقولك إزاي تكوني مستقلة؟ كملي قراية!

خلينا نتفق إن لو إنتِ فعلا عايزة هذا إلاستقلال هتعملي أى حاجة توصّلك. وأحب آكدلك أنك هتلاقي مقاومات كتيرة حواليكي وخصوصاَ لو دي أول مرة تحاولي الموضوع دة، وإحتمال كبير من أقرب الناس إليكي. أهم شيئ خليكي قوية وتمسكي بحلمك بكل قوتك، كل حاجة بتبدأ من جواكي عشان كدة لازم تكوني مقتنعة ومتمسكة بأفكارك وتوصّلي  لكل إللي حواليكي إن دي حياتك وده وقتك المخصوص لتطوير نفسك وإثبات ذاتك.

أول وأهم وأكبر سؤال: إنتي ليه عايزة تستقلي مادياً؟

إعملي كوباية قهوة وإقعدي في مكان لوحدك وفكري بهدوء وخدي وقتك وجاوبي على الأسئلة دي: 

ليه عايزة تستقلي مادياً؟ 

ايه الدوافع القوية بداخلك؟ 

هتعملي إيه لو عندك كل الإمكانيات ومافيش حاجة تمنعك من إنك تعملي إللي إنتي عايزاه؟ 

الأجابات على الأسئلة دي هتكون الدافع إللي بيشجعك كل يوم وبيخليكي تقومي تشتغلي على أحلامك، حطي عنوان واحد لهدفك إللي عايزة توصليله وإكتبيه على ورقة كبيرة وأقريها كل يوم علشان تفتكريه ، ماتعتمديش على ذاكرتك لأن الحياه والمشاغل بتنسينا.

تاني نقطة: فكري أكثر

ابدأي إكتبي أحلامك كبيرة وصغيرة وكان نفسك تعملي إيه وماعرفتيش في أي مرحلة من حياتك، سواء سفر، دراسة، شغل أو أي حلم. إكتبي إيه اللي إنتي متخيلاه بكل التفاصيل،لابسه إيه، بتتكلمي إزاي وبتقولي إيه، قاعدة فين، يومك ماشي إزاي، حاسة بإيه، كل تفصيلة كبيرة وصغيرة إكتبيها، ده هيساعدك إنك لما تحطي خطة هتكوني عارفة الناتج بتاعها، وبعد كل ده طلعي صور تجسد كل أحلامك وإطبعيها وعلقيها على نفس الورقة الكبيرة إللي عليها هدفك.

تالت نقطة: إزاي توصلي للصورة إللي إنتي عايزاها؟

أبدأي وقيمي وضعك الحالي وقرري إيه:

الكورسات إللي محتجاها

المعلومات إللي محتاجة تعرفيها وهتجبيها إزاي

الكتب إللي محتاجة تقرأيها

دائرة المعارف الجديدة إللي محتجاها في حياتك الفترة دي

إيه القرارات إللي محتاجة تأخذيها؟

لو ليكي مثل أعلى أو حد متفوق في المجال إللي إنتي عايزاه شوفي ممكن تتعلمي منه إيه؟ بيشتغل إزاي وبيتعامل مع الناس إزاي؟ لو له كتب ممكن تقرأيها أو صفحة على شبكات التواصل الإجتماعي.

لو مكان معين أو شغل معين عايزة تقدمي فيه، شوفي إيه مطالبهم؟

رابع نقطة: مين هيكون معاكي؟

دائرة الناس إللي حواليكي لازم يكونوا فاهمين إنتي بتعملي إيه وطبيعة حياتك الجديدة وإختياراتك عاملة إزاي ويساعدوكي على اتخاذها أو على الأقل مايكونش في مقاومة، حاولي تختاري دائرتك صح، بمعنى لو إنتي محتاجة وقت لنفسك تخلصي شغلك محدش يضيع وقتك، ويتفهموا لما ترفضي دعوة أو تخرجي معاهم.

أخر نقطة: حطي خطة

بعد ما تجمعي كل المعلومات إللي إنتي محتجاها، تخيلي الهدف الكبير و إبدأي قسميه في خطوات صغيرة تساعدك على الوصول  للهدف خلال وقت محدد.

شوية نصائح زيادة

حددي بتصرفي في إيه؟ إيه محتاجاه وإيه لا؟

إعملي ميزانية

خدي بالك من صحتك

نامي كويس

رتبي يومك 

نمي مهاراتك

راقبي عاداتك وواظبي على إللي هيساعدك 

فكري بإيجابية

قولي لنفسك كلام إيجابي وشجعي نفسك

متفقديش الأمل وخليكي مرنة لو مانجحتيش من أول مرة

الوصول للأحلام مش سهل، هو محتاج تشجيع يومي وحماس من جواكي ومن اللي حواليكي، أهم حاجة تفتكري الدافع بتاعك كل يوم.