هنحارب … هنحارب

أول ما بسمع الكلمتين دول بفتكر علطول محسنة توفيق في فيلم “العصفور”، بس المرة دي و أنا بقول” هنحارب..هنحارب”،  بتكلم علي ناس بتحارب عدو مختلف ، بتحارب المرض، هتحارب و بتحارب السرطان.

أول ما بدأت أكتب المقالة دي إتكلمت مع مجموعة من محاربات و ناجيات السرطان، و فعلا بدأت أكتب حواديتهم مع السرطان ولحظة الاكتشاف ورحلة العلاج، بس بعدها و بعد ما أخدت رأي صديقتين ليا، قررت أجرب أكتب الموضوع بشكل مختلف.

لما اتكلمت مع المحاربات و الناجيات طلعت بمجموعة من الحاجات المشتركة اللي كلهم أكدوا عليها و إتكلموا عنها ، كل واحدة بطريقتها ، زي :

١-إن الدعم النفسي مهم جدا من اللي حواليهم

٢-الرضا بقضاء ربنا والتسليم سر مهم جدا عشان يعرفوا يكملوا الرحلة ويفضلوا بيقاوموا

٣-إن الاكتشاف من بدري بيفرق في رحلة العلاج والنكران مش هيوصل لحاجة 

٤-السرطان مرض زي أي مرض بس بياخد وقت أطول حبة ، وبشوية أمل ورضا ومحاربة هيعدي 

٥-إن رحلة المرض و العلاج و الشفاء خليتهم يبصوا لكل حاجة بشكل تاني خالص ، يقدروا نعّم كتير يمكن ماكانوش حاسين بيها زيهم زي كتير مننا 

٦-إن القوة بتيجي من جوانا ، ربنا بيحطها فينا بشكل او باخر، حتي لما وصلوا لليأس ، ربنا اداهم قوة التسليم و لما سلموا كل حاجة أتغيرت والطرق المقفلة إتفتحت 

نتيجة مهمة جدا  وصلت لها من كلامي معاهم وهي إن من أهم مسببات السرطان وعلاجه بشكل أو باخر هي الحالة النفسية، سواء كانت حلوة أو وحشة ، الوحشة ممكن تبقي سبب للسرطان و الحلوة بتساعد علي العلاج منه.

في واحدة منهم حكت لي إن السرطان جالها في الغدة الدمعية ،و لما فَكّرت شوية رجعّت الموضوع للي حصل بعد  وفاة والدتها، و لإنها في الوقت دة  من الصدمة و الحزن كتمت جواها ورفضت تعيط لشهور كتيرة،  بعدها بفترة اكتشفت بالصدفة إنه جالها سرطان في الغدة الدمعية ، تفتكروا بقي صدفة إن جسمها يعبر عن الكبت من الحزن بالطريقة دي؟

 جسمنا بيطلع اللي جوانا !  يعني كام مرة اتعصبتي فقولونك انتفخ و تعبك جدا؟ جسمنا  بيعبر عن اللي روحنا بتكتمه و نفسنا بتتآذي منه ،  في نوع  تاني أسوا من الزعل و الكتمان للغضب و الحزن، ممكن يخلي جسمنا مش بس قولونه ينتفخ لأ، ممكن كمان يحوش الزعل دة و يطلع لنا بمرض قوي و بشكل شرس و مفاجئ.

 إحنا كستات بنحارب حاجات كتيرة آوي، و علي جبهات أكتر، طول الوقت، بنشيل أوقات جوانا حزن و خيبات أمل و غضب  ، و كتير مننا بيكتموا ومابيعبروش عن اللي جواهم  .

الملهم بالنسبة لي أنا شخصيا من حواري مع محاربات السرطان، واللي أتمني إنه يوصّلكم نفس الرسالة هو :

– إننا كستات و كبني آدمين عموما عبارة عن روح و نفس و جسد و التلاتة مرتبطين ببعض 

-إننا لما بنضغط علي نفسنا زيادة و بنكمم روحنا و نآذي نفسنا، جسمنا بيرد الكبت بمرض ممكن يكون شرس

-الحياة مليانة ضغوط ووجع و حزن ،زي ما مليانة أمل و طاقة و نعّم ،و انها باكدج لازم هناخدها علي بعضها 

-لو تعبتي او زعلتي او غضبتي لازم تطلعي و تعبري بالطريقة المريحة ليكي، و لو محتاجة مساعدة اطلبيها ، لحد ما تعرفي توصلي لسلامك الداخلي ،و تتصالحي و تسامحي و تعدي الآلم و الأذي و الوجع .

طبطبي علي نفسك ،و خلي بالك منها ، و ساعديها تطلع الحزن و الآلم عشان جسمك مايطلعوش بشكل تاني ، و تحية لكل بنت و ست فهمت و قدرت إن السرطان مرض زي أي مرض، بس المختلف إنه بياخدك في رحلة بتطلعي منها أنسان جديد مقدّر كل حاجة جواه و حواليه ، رحلة بتعلمك تحاربي اللي بيأذيكي ،و تقدري و تحبي نفسك و تاخدي بالك منها.

ملهمات المقالة :

جيلان ٢٠ سنة ” محاربة لوكيميا”

إنجي ٣٤ سنة “محاربة سرطان الغدة الدمعية”

دعاء ٤٢ سنة “محاربة سرطان الثدي”

أسماء ٤٥ سنة ” ناجية سرطان الثدي”

شكرا جدا لكل الملهمات