مش هتخف ب نص فرخة …..إزاي أعرف ان بنتي / أبني عنده اكتئاب ؟

الموضوع بدأ و أنا صغيرة  في اعدادي، وقتها اكتشفت إن واحدة صاحبتي قريبة جدا ليا عندها أعراض أكتئاب ،أو بتمر بحالات إحنا  ماكناش عارفين دي إيه؟

 لغاية ما في مرة كنا قاعدين مع صحاب لينا، ولقينا حد  فيهم بيتكلم إن عنده أعراض شبه اللي عندها ،و طبعا كأطفال عندهم 15 سنة كبّرنا دماغنا، و قولنا ممكن تبقي شوية ضغوط ، ولا تغيير هرمونات من اللي بنمسعه دايما بيتقال لنا كمراهقين،

المهم الوقت عدي، ومن فترة قريبة، أو لغاية دلوقتي تقريبا فيه memes كتيرة أوي  عن” إنه ازاي حسام *أسم مزيف* أبني أبو ١٥ سنة المفعوص ده، بيتكلم بمنتهي الجدية إن عنده اكتئاب؟”

إزاى يا بني عندك اكتئاب ؟ دة أحنا حتي بنأكلك  كل يوم بانيه و مكرونة ،

أو إزاي عندك أكتئاب ؟ وأنت معاك iphone وفي  مدرسة لغات و عندنا عربيتنا الوووواووو، و بنصيف سنويا في الساحل،

إزاي مكتئب وأنت عندك كل حاجة، واحنا موفرالك كل حاجة ؟

دة أنا و أنا ادك عشنا حياة أقل من حياتك بكتير أوي و أهو فلة، وكويسين، و لا عندنا أكتئاب و لا حاجة؟

الحقيقة إن في نظرية بتقول؛ إن ولادك بيعيشوا جزء كبير من اللي إنتي عيشتيه !

غالبا بتحصل من طريقة تربيتك ليهم، زي كتير مقارنات ممكن تبقي بتقوليها لهم و إنتي بتربيهم، يعني” دة أنا زمان..كنت بعمل كذا”، أو “وأنا صغيرة قدك كدة حصل لي زمان كذا”،

 ودة طبعا بيكون شخصيتهم جنب تجاربهم  الشخصية في الشارع والنادي والمدرسة ،

ف من الأخر مهما حاولتي تعيشي ولادك في مستوى أفضل ماديا، دة مالوش دعوة خالص بإنهم هيتأثروا بكل حاجة عشتيها في حياتك، أو بمعني أصح هيشيلوا معاكي الصدمات بتاعتك، وأي وجع عيشتيه في حياتك بطريقة ما، عشان كدة ديما بنقول لازم الأهل يتصالحوا مع طفولتهم و مشاكلهم قبل ما يخلفوا و يربوا ، لإنه لو ماتصالحوش مع نفسهم هينقلوا عقدهم لأولادهم ، و عشان كدة ممكن جدا من سن صغير أوي ، أولادهم يصابوا بأكتئاب ، لأنك أديتهم تجارب و ألم ووجع مش بتوعهم ! 

طيب إيه العلامات اللي لو بتحصل مع أولادي أبدأ أركز أكتر، و في حالات معينة أبدأ أقلق و أستعين بمتخصص؟

• دايما قافل علي نفسه اوضته 
• بينام كتير أوي، و فيه خمول رهيب أو العكس تماما، مش بينام خالص ! 
• بياكل كتير أو مش بياكل خالص! 
• مش قادر يروح التمرين. 
• المدرسة بتشتكي من إنه دايما سرحان .
• درجاته مش كويسة .
• مش عايز ينزل من البيت. 
• بيovershare علي الsocial media سواء مشاعره أو بوستات. 
• نشاطه عالي علي السوشيال ميديا  و تحسي إن شخصيته بتبان علي الsocial media أكتر، مع إنه هادي جدا جدا في الحقيقة .
• مش بيطلع مشاعره خالص ،مش بتلاقيه بيعيط خالص خالص ،و لو بنتك  بالذات كدة ،اعرفي ان فيه حاجة غلط .
• مش قابل أي نقد و بيتفاجئ بأي نقد بناء. 
• دايما بيشكي بصداع ،أو وجع بطن ملازم باحساس بالغثيان .
• عدائي دايما أو بيفضل العنف .
• بيعتذر علي أي حاجة و كل حاجة. 
• فيه تلعثم في كلامه. 
• مش واثق في نفسه اطلاقا دايما بيقول : أنا مش هاقدر أعمل ده / أنا مش عارف / أكيد مش هاوصل / أجي إيه جنبهم؟

و دي علامات لولا قدر الله بيأذي نفسه: 

• لو في أي خناقة، لطم علي وشه كتير جدا، و قعد يشد في شعره، أو يخبط رأسه في الحيط .
• حروق  في جسمه منتشرة.
• أي علامة قطع في المعصم أو الذراع بشكل منتظم.
• فراغات في فروة الرأس.
• قص الشعر بشكل عشوائي 
• أي تصرف متعارف عليه مش سليم: كثرة العلاقات، شرب السجائرأو اي سلوك ادماني * ممكن يكون الأكل الكتير أوي بالمناسبة* 

فاكرين صاحبتي اللي حكيت لكم عنها في الأول، كان عندها كتير من الأعراض دي، و طول الوقت دة اهلها كانوا شايفين كل الأعراض دي ولا حاجة، و إنها ممكن تكون دلع وخلاص،

  لغاية ما في يوم صحيت مش عارفة أوصلها  خالص، وفضلت فترة مش عارفة أوصلها، لحد ما عرفت انها مدخلتش امتحانات التيرم ، و إنها أنهارت بشكل تام،  وبدأت بتهديدات صريحة بالانتحار،

 و أخيرا أهلها أستوعبوا إنها محتاجة مساعدة، وراحت لدكتور نفسي، وبدأت العلاج! 

وبعد كل دة ، وبعد طول الوقت دة،  أهلها أدركوا ان كل الأعراض اللي كانت عندها كانت معافرة و استغاثة من وحش اسمه الإكتئاب. 

  مهم أوي نركز مع نفسنا قبل ما نجيب ولاد عشان نتصالح مع نفسنا و مشاكلنا و الجانب المضلم جوانا، عشان لما يبقي عندنا ولاد مشاكلنا ماتأثرش عليهم، و تدخلهم في حتة ضلمة صعبة ، مع إنها ماتخصهمش،

مهم أوي لو لقيت أي عرض من اللي فوق عند ولادي أبدأ أركز معاهم آكتر ، أديهم مساحة أمان يتكلموا معايا و يعبروا عن مشاكلهم، أو إيه اللي حاسينه، مايأسش بسرعة، ماستسلمش بسرعة،وماتكسفش أطلب مساعدة من مختص، أحنا مش بنجيب ولاد عشان نعذبهم بمشاكلنا و عقدنا ، فلازم نخلي بالنا منهم و من صحتهم النفسية.  

و في النهاية  لازم تعرفوا إن الاكتئاب مرض شائع جدا جدا بين المراهقين والشباب، لأسباب كتيرة، أهمها تأثير الأهالي علي ولادهم،  و تأثير تربية الأهالي دول من الأهالي اللي قبلهم، ودة كله بيجي جنب صدمة الولاد من بشاعة المجتمع و صعوبة الحياة، 

 و مش وصمة عار خالص اللجوء لطبيب نفسي، حاولوا تكتشفوا و تحللوا كل تصرف خوفا عليهم مش  خوفا منهم ،علشان ميجيش يوم و تندموا انكوا معملتوش ده و تخسروهم فعلا.

ربنا يحميهم ويحميكم. 

اما عن حكاية صاحبتي، فالحمدلله خفت بقالها فترة، و قدرت تتقبل و تحتوي نفسها، وتسامح اللي آذوها، و فعلا عايشة حياة تُستحق أنها تتعاش ❤️

references: https://www.valleybehavioral.com/disorders/self-harm/signs-symptoms-causes/