أسباب الالتهابات المتكررة بالمثانة البولية

يعتبر معدل الإصابة بعدوات المثانة البولية اعلي بكثير بين الستات من الرجالة، ودة لأسباب كتيرة منها:

 -قصر مجري البول لدي السيدات

– قرب فتحة مجري البول من فتحة المهبل وفتحة الشرج مما يسمح للبكتريا بسهولة إصابة الجهاز البولي بالعدوي.

بشكل عام تقريبا مفيش انثي – يعني بنت أو ست-  مش هيجيلها على الأقل عدوي واحدة بالمثانة البولية وده للأسباب اللي قلناها فوق.

لكن امتي نبتدئ ندور على سبب للعدوي دي؟

. لما تكون متكررة (يعني ٣  مرات في ستة شهور أواكثر)، هنا لازم نعرف السبب

يعني مثلا في كتير من الستات عندها شوية عادات غلط ، زي :

– تأجيل دخول الحمام لفترات طويلة من باب الكسل أو لعمل شغل البيت،وده بيدي فرصة للبكتريا تفضل في المثانة لفترات طويلة ممكن تعمل عدوي،

 -دة غير طريقة المسح بعد التبول، لانها لازم تكون من تحت مجري البول وفي اتجاه فتحة الشرج ولكن اللي بيحصل ان الاتجاه بيكون معاكس، ودة بيدي فرصة للبكتيريا بانها تطلع الي مجري البول وتعمل العدوي.

مهم نعرف ان ديما بتكون العدوي مصحوبة ب :

حرقان اثناء التبول،

 واحساس زائف باحتباس البول مع كثرة دخول الحمام وتبول كميات بسيطة،

 وأحيانا دم بالبول،

 الم أسفل البطن،

 والام بالجانبين

 التشخيص بيكون بسيط عن طريق عمل تحليل بول كامل وتحليل مزرعة بول في الحالات البسيطة الغير متكررة، مع إمكانية عمل اشعة تليفزيونية على البطن والحوض إذا كانت الاعراض والعدوات متكررة.

 العلاج  بيبقي متمثل في  المضاد الحيوي المناسب، اما إذا استمرت الاعراض، وقتها الدكتور لازم يعمل  تحاليل واشعات إضافية عشان يعرف السبب.

من ضمن أسباب تكرار عدوات المثانة البولية:

 التهابات المهبل والافرازات المتكررة،

 عدم تفريغ المثانة بالكامل عند التبول،

 قلة هرمون الاستروجن عند اقتراب انقطاع الدورة

وفي  حالات بتكون مصاحبة لحدوث العلاقة الحميمية، والانثي بتلاحظ الارتباط بين العلاقة وتكرار العدوات.

هنا بننصح السيدات دول بالتبول قبل وبعد العلاقة، وممكن اخذ جرعة مضاد حيوي قبل العلاقة الحميمة كحماية ليهم.

في معظم الأوقات، مش بنلاقي سبب واضح وبيكون الموضوع له علاقة بقابلية الأنثى ان يحصل لها الالتهابات المتكررة، ممكن تاخد ادوية لتقوية المناعة البولية او جرعات بسيطة يومية من بعض المضادات الحيوية لفترة تتراوح من ٣-٦ شهور.

عشان كدة ديما بنقول ماتتهاونيش عشان الاعراض ماتتفاقمش، وخليكي ديما مطمئنة ان في  حل لمشكلتك.