أهم حاجات تعرفيها لو هتعملي حقن مجهري

في حالات كتيرة دلوقتي محتاجة تلجأ للحقن المجهري، بس عشان ناخد القرار دة في شوية حاجات لازم نعرفها؛

أولا ، امتي أقرر اعمل حقن مجهري واقرر اجيب طفل انابيب ؟

فكرة التاخر في حد نفسها لازم تتحط في سياقها ، يعني ايه ؟ يعني عشان أقول ان في تأخر في الحمل أصلا لازم يبقي الزوج و الزوجة بقالهم مع بعض ١٢ شهر او اكتر و بيمارسوا العلاقة بشكل منتظم و من غير موانع حمل و لا امراض عند الطرفين و هي تبويضها و دورتها منتظمين  و مابيحصلش حمل 

هنا ممكن يبدأوا يروحوا يشوفوا اذا كان في مشكلة مأخرة الحمل ،

الحاجة المهمة هنا انه مايبقاش في تسرع او توتر من بدري لان دة هيضر اكتر منه هيفيد! وفى نفس الوقت السن فلو سن الزوج معدى 35 او 40 الافضل ماتتاخرش فى استشارة الطبيب

ثانيا، مفاهيم مغلوطة عن الحقن المجهري و أطفال الانابيب

١-هل أي ست هتعمل أطفال انابيب لازم تعمل منظار رحمي قبلها ؟

الحقيقة  انه لأ 

لو تجويف الرحم سليم بعد ما اتاكد بالسونار انه سليم ممكن ابدأ علطول 

٢-هل الست بعد برنامج  نقل الاجنة دة لازم تقعد أسبوعين في السرير و ماتتحركش ؟

لأ برده مافيش أي اثبات علي ان دي حاجة مهمة و لا بتزود نسبة الثبات ، بالعكس في بعض الحالات بتزود الاكتئاب و ممكن تعمل جلطات ، الاحسن انها تمارس حياتها بشكل طبيعي 

٣-هل لازم افحص كل الاجنة قبل ما انقلهم وراثيا؟

دة بيبقي في حالات معينة و بتوصية الطبيب المعالج  علشان ماقللش فرص الحمل ومازودش التكلفة 

٤-هل لازم اراقب الاجنة طول فترة تطورهم عن طريق الحضانة الذكية؟ 

الإجابة لأ مش لازم 

٥-هل لازم انقل الاجنة في اليوم الخامس ؟

الحقيقة مش لازم ، و زي مليه مزايا ممكن يبقي ليه عيوب  المعمل بيحدد ايه افضل ليكى على حسب المتاح 

طيب ايه اهم النصايح للستات اللي داخلة التجربة دي و ممكن تزود نسب نجاح حملها؟

١-اهم حاجة هي وزن السيدة، في دراسات بتاكد وجود علاقة عكسية بين وزن الست و نسبة نجاح الحمل

٢-التدخين، التخين للزوجين بياثر بشكل كبير في فرص نجاح الحمل 

٣-vitamin deficiencies  و دة من اهم الحاجات اللي لازم نطمن عليها و علي نسبته، و معظم الستات المصريات عندهم نقص فيتامين دال 

٤-الغدة الدرقية، من الحاجات المهمة اي سيدة بتقدم على حمل او بتحاول انها تحمل المفروض هرمون الTSH  يكون في حدود ٢ – ٢.٥ .. في بعض السيدات عندهم حاجة اسمها subclinical hypothyroidism  …. يعني تلاقي الTSH طبيعي لكن هي في شوية نقص مش واضح اوي من التحاليل في هرمونات الغدة الدرقية، دول بيتحسنوا جدا بقرص صغير كل يوم الطبيب بيوصفه لها، يضبط المستوى بتاع الTSH  قبل ما تبدأ البرنامج 

حاجة بقي أخيرة و منتشرة و مهمة ، حالات التكيس علي المبايض

احنا كشعب مصر و بننتمي للبحر المتوسط ، مشكلة التكيسات دي عندنا منتشرة جدا ووراثية،

طب اللي عندها تكيسات بتشتكي من ايه ؟

بتشتكي ان دورتها مش منتظمة وفي منهم بيشتكوا ان مفيش دورة خالص

السيدة عادة – مش كلهم – بيبقى عندهم زياده شوية في الوزن 

بيبقى عندهم استعداد للشعر الزياده في الاماكن اللي زي الدقن وحوالين الحلمة وفي البطن او ان هما محتاجين يزيلوا الشعر على فترات قصيرة 

بيبقى عندهم استعداد لمرض السكر ف عندهم مقاومة في الانسولين عندهم insulin resistance عالي

وعلى المدى البعيد السيدات دول عندهم استعداد اكتر لمشاكل في القلب ومشاكل الضغط وكده في المستقبل 

طبعا الستات اللي عندها تكيسات و بتشتكي من تأخر الحمل ممكن نديهم كام نصيحة:

اول حاجة بنبدا بيها  life style ؛ ان احنا نغير اسلوب حياتنا، لو في زيادة في الوزن ننزل، ودلوقتي بأه في بروجرامات للتخسيس بتعتمد على الطب الوظيفي والناس اللي عندهم خبرة في هذا الموضوع متوفرين عندنا في المركز يقابلوا العيانين ويشرحولهم ايه المطلوب في الاكل وتنظيم الاكل وتنظيم الحياة وأدوية معينة تقدر انها تعدل اللخبطة اللي موجودة من ناحية الزيادة في الوزن ومقاومة الانسولين اللي بتبقى عالية في العيانين دول

تاني حاجة ان احنا بنديهم منشطات بسيطة وبنبدأ بمنشطات عبارة عن اقراص زي اقراص ال clomid ونشوف هتنظم الدورة وهتعمل تبويض ولا لأ

الحاجة الاخيرة اللي عايزة اقولها اطمن بيها السيدات ان اطفال الانابيب وسيلة علاج فيها تقنية وتكنولوجيا عالية وفيها تقدم 

مهم اوي اننا نبقى عارفين ان فرص الحمل مرتبطة ارتباط مباشر بسن الزوجة، ف كل ما نبدأ بدري في الفحص وفي الكشف وفي اخد رأي اصحاب الخبرة، كل ما نتحط على الطريق الصح وهنوصل للنجاح اسرع وبنسب كويسة 

و في النهاية  لاي ست عايزة تعمل حقن مجهري ارشحلكم المركز المصري لاطفال الانابيب لخبرتهم الطويلة في المجال دة ! 

 

https://www.facebook.com/egyptianivfcenter