٥ مؤثرين غيروا حياتي وأضافوا ليها قيمة

كل حد فينا في حياته شوية Inlfuencers  بيحب يتابعهم بشكل يومي ويعرف أخبار عن حياتهم وحياة الناس إللي حواليهم أو الحياه بشكل عام. بالنسبالي الInfleuncers  دول الشخصيات إللى بتقدم محتوى بيضيف لحياتي قيمة بشكل أو بأخر مش بس فقرة في اليوم بضيع بيها وقتي وخلاص على شخصية ما عندها عدد لا متناهي من الFollowers .

على سبيل المثال لا الحصر، هنا مجموعة من الشخصيات المؤثرة إللى بعتبرها إضافة حقيقية للمجتمع بمحتواها المؤثر ومعلوماتها المتنوعة:

1- الدحيح

عارفة أفكار الليل وأخره إللي بتيجي للواحد وتقعدي تطرحي أسئلة وجوديه لها زي شباك الطياره ليه واخد شكل دائري مش مربع؟ برنامج الدحيح على اليوتيوب  من تقديم أحمد الغندور بيتكلم في كل حاجه من الفضاء للإقتصاد للسياسة والعلوم ومسابش ثغرة في كتب التاريخ إللى وإتكلم عنها بشكل سهل وبسيط جدًا. كل ما تتفرجي على البرنامج تكتشفي إن كل حاجه في الحياة ديها ليها تفسير.

 حقيقي برنامج بيوسع معارف الواحد ويشغل الدماغ ويخليكي متحمسة إتك تتعمقي في علوم الحياة.

2- أنس بوخش

برنامج ABtalks  وإللي بيقدمه الإعلامي الإماراتي، أنس بوخش هو واحد من البرامج القلية جدّا أونلاين إللى تحسسك إنك في جلسة علاج نفسي وبتخلصي الحقلة وإنتي مرتاحه وصافية.

 البرنامج بيستضيف جميع المشاهير من الشرق للغرب وبيدخل أنس مع كل واحد منهم في تفاصيل شخصيته وأعماقها ويبدأ يحلل صفاتهم وتصرفاتهم وكل ده في قاعدة دردشة ودية جدّا. 

المذيع الشاطر هو اللي يقدر يخلي الضيف مندمج وحابب يكمل اللقاء لأخر لحظة وأنس بوخش نجح في تحقيق المعادلة ديه.

3- ميار مصطفى

دكتورة أسنان ومدربة لياقة بدنية معتمدة! كلنا عايزين نخس وكلنا نفسنا نروج الجيم ونتمرن ويبقى عندنا لياقة بدنية عالية، اللذيذ في محتوى ميار مصطفى أنه واقعي وحقيقي مش مجرد محتوى عن بنت بتلعب تمارين رياضية وتشيل أوزان وعامله فورمة من الأخر.

 أغلب الفيديوهات تعليمية عن إزاي تعملي التمارين الرياضية والطريقة الصح لكل حركة، ميار بتتكلم مع متابعيها عن رحلتها الشخصية للياقة البدنية وإللى كان مشوارها طويل ومتعب ومليان بمعرقلات نفسية وبدنية. لما يكون حد مر بنفس التجربه بيكون قادر يعبر عنها بسهولة ومن غير تصنع وفوق كل ده بيتكلم من موقع خبرة شخصية وإللى هو أهم من أي خبرات أكاديمية وتعليمية.

4- سماح لطفي

إنك تمشي على نظام أكل صحي مش معناه أبدَا إنك تحرمي نفسك من واحده من متع الحياة! سماح لطفي مؤسسة صفحة Oziiegramبتقول لكل ست وأم وبنت إن صحتها الجسدية والنفسية بتبدأ من مطبخها.

 اللى عاجبني في محتوى سماح لطفي أنها مش بتعمل وصفات معقدة ولا بتقولك عشان تحافظي على صحتك لازم تاكلي أكل ملوش طعم، وصفاتها سهلة جدّا وحلوه جدَا وكمان هي بتقدم فيديوهات تعلم كل واحده إزاي تحضر وجبات الأسبوع كلها من فطار وغذا وعشا وإزاي تخزنهم، فا كده ملناش حجه نقول إننا كسلنا نعمل أكل أو إتشغلنا في البيت والعيال!

5- نور إمام

تعتبر صفحةThis is mother Being من أكثر الصفحات المثيرة للجدل بين السيدات، ببساطه شديدة نور إمام بتعلم السيدات قبل البنات كل ما يخص صحتهم الجنسية.

 قد يبدو المحتوى للكثير إنه صادم وجرئ ولكنه مفيد جدّا خاصة للمقبلات على الزواج وحتى المتزوجات. الثقافة الجنسية مهمة جدّا ومش موضوع المفروض نتكسف نتكلم فيه لأنه للأسف بيأثر على الحياة الزوجية بشكل كبير جدّا وبيكون هو السبب الأول والرئيسي في الجفاء بين الأزواج والخيانة الزوجية والإنفصال العاطفي وغيرها كتير من المشاكل الزوجية إللي تتحل بسهولة لو الست فهمت جسمها صح.

إن الواحد يبقى كلامه ورأيه بيغير في حياة الناس ديه مسئولية كبيره أوي ولما تقرري إنك تستثمري من وقتك وعقلك للناس يبقى لازم تتأكدي إنه إستثمار إيجابي هينفعك ويضيف لحياتك قيمة.