in ,

اقرب طريق لقلب الراجل ايه؟

السؤال اللي حير أجيال ، و اللي اجابته الأشهر كانت “معدته”!! 

بس بجد بجد تفتكروا ايه اقرب طريق لقلب الراجل؟

لما سألنا الرجالة نفسهم لقيناهم بيقولوا اد ايه هما بسطاء ، و طلباتهم بسيطة جدا و مع ذلك الستات مش بتفهمهم ، طب ايه اللي الراجل بيحبه من الست من وجهة نظر الرجالة؟

-ضعفها،

رجالة كتير كانت اجابتهم انهم بيحبوا الست الضعيفة قدامهم، الست اللي تحسسه برجولته، الست اللي تحسسه ان هو بابا و ماما و أنور وجدي 

اللي تبقي عايزاه هو المتحكم الأول و الأخير 

-اللي تفهمني من غير ما أتكلم، 

و هنا بقي عايزين ستات بقدرات خارقة تقدر تفهم الراجل من غير ما يتكلم، يعني بمجرد ما يفكر في الحاجة تتعمل له علطول ، و حتي لو ما بيفكرش  في حاجة و بيبص للسقف هي تبقي فاهماه و تديله مساحته في انه يبص للسقف!

-روقة، 

تبقي له روقة ،و يلعب هو لعبة سي السيد، يعني همها الأول و الأخير هو و بس ! راحته.. سعادته.. مزاجه،

توافقه علي كل اللي بيقوله او يعمله و كانه هو المثل الاعلي في كل حاجة، و هو الراجل الأوحد بالنسبة لها !

-شخصيتها ، 

في من الرجالة اتكلموا عن شخصية الست ، و ان دة اقرب طريق لقلب الراجل ، شخصيتها في كونها شريك حياة ليه ، يعني يبقوا بيكملوا بعض ، متفاهمين ، هو و هي لبعض شركاء حياة بمعني الكلمة

-اكلها،

طبعا لسه في رجالة الطريق لقلبهم هو معدتهم، و صاحبة النفس الحلو في الاكل بالنسبة لهم احلي ست في العالم

-جمالها، 

في بقي رجالة همهم الأول و الأخير ” الشكل ” ، يعني تبقي حلوة ، حلوة شكلا مش جمال روح و لا حاجة ، المهم بالنسبة له انها تبقي جميلة عشان لما يعرّفها للناس يوريهم اد ايه هو متجوز واحدة حلوة شكلا، كانه شاري عروسة باربي و بيعرفها للناس !

-فلوسها ، 

وفقا للظروف الاقتصادية فجت إجابة كوميدية و في نفس الوقت حقيقية ، كنا زمان نسمع عن ان الراجل هو اللي بيجي يشيل عن الست و يستتها ، بس حاليا الاية اتعكست و بقي اقرب طريق لبعض الرجالة هي حسابه في البنك اللي هيزيد لما يحب او يتجوز واحدة غنية 

من الاخر كدة الطريق لقلب الراجل بقي احساسه برجولته علي معدته علي عينيه علي مزاجه علي حسابه في البنك … يعني تبقي سوبر وومن كدة  في نفسك ! 

تبقي انثي بحق و حقيقي و ضعيفة قدامه بس شخصيتك متزنة و قوية في نفس ذات اللحظة .. تبقي بتدلعيه وهو كل اهتماماتك بس تبقي جميلة طول الوقت و مخليا بالك من نفسك … تبقي طباخة شاطرة جداا و في نفس ذات اللحظة يلاقيكي مثقفة و تعرفي تناقشيه في اهتماماته بس طبعا و انتي بتأيدي رأيه لانك روقة… و أخيرا تبقي غنية و في نفس الوقت معتمدة عليه ! شفتوا مش قلت لكم اد ايه هما بسطا  و طلباتهم بسيطة!

بس الحقيقة ان الإجابة الاكثر كانت ان اقرب طريق لقلب الراجل انك تحسسيه بوجوده و أهميته في حياتك، تحسسيه بقيمته ورجولته، تحسسيه و تحسي معاه بأنوثتك ،

 و افتكر ان دة الاصح ان الطريق لقلب الراجل يبقي انه يلاقي شريكة حياته اللي بجد ، اللي تبقي له بيت و سكن في كل تفاصيلهم مع بعض ، مش اكل و فلوس و جمال ، لأ، الاصح ان الطريق لقلب الراجل يبقي الحب و الاحترام و التفاهم و الونس و التقدير و المودة و الرحمة !

باختصار، الأدق انه يبقي الطريق لقلب الراجل روحه اللي روحك بتكملها! 

بقلم نسمة مدحت Nesma Medhat

ُEntaleqi Chief Editor/Writer/Marketer/ Vlogger /Storyteller and Author for published books “إاللي إسمه إيه”& “أصل المثل

What do you think?

Written by Editor

Comments

Leave a Reply

Your email address will not be published. Required fields are marked *

Loading…

0

Comments

0 comments

٥ مؤثرين غيروا حياتي وأضافوا ليها قيمة

لو مش سعيده في جوازك اعرفي السبب