لأنك ست… فانتي مستباحة

بقالي فترة بسمع و بشوف اخبار تخض علي كل الأصعدة و كلها ليها علاقة بالستات ..يعني في نفس الوقت اللي المفروض الستات بتتقدر و بتبدأ تاخد جزء من حقوقها، هو نفس الوقت اللي بتتاكد فيه فكرة ان الست مستباحة!

مهما الست نجحت و حققت نفسها ، مهما حاولت و عافرت و كافحت، مهما بادرت و اديت، الا انها بتفضل هي و بس المستباحة لو خالفت آراء و معتقدات و ميول اللي حواليها…

مستباحة علي جميع الأصعدة؛

مستباحة عقليا:

منتشر بشكل كبير فكرة ان الست مش بتفكر صح او مش بتاخد قرار صح او مش بتفهم كفاية، كام مرة تلاقي و انتي  بتتكلمي او بتشرحي حاجة مهما كان منصبك تلاقي في حد داخل بيوضح كلامك او بيشرحه، علي اعتبار انك مش موصلة الفكرة صح او يمكن مش عارفة تفهّمي صح ، فتلاقي حد متبرع انه يبقي المترجم ليكي ..

دة غير فكرة ان أي أفكار لست برة الاطار المعروف و المتعارف عليه مستباح الحجر عليها و نتهمها بقي باي تهم من “البلاهة و عدم رجاحة العقل و كمان ممكن توصل لاتهامات أخلاقية”.

مستباحة عاطفيا:

مافيش ست من حقها تحب و تختار اللي هي عايزاه ، لازم اللي حواليها هما اللي يعرفوا مصلحتها اكتر و يستبيحوا لنفسهم الحجر حتي علي مشاعرها، مش من حق الست انها تحب او تتجوز شخص مؤذي -بغض النظر علي انها حاجة بتضرها- بس هنا انا بتكلم علي نفس الفكرة لو حصلت لراجل و حب او اتجوز ست مؤذية، هل ممكن نستبيح حقوقه؟ هل ممكن نحجر عليه؟ هل ممكن نضربه او نهينه او نحبسه عشان يسيبها ؟ 

الإجابة لأ

لكن لو ست فمش من حقها حتي انها تغلط و تاخد تجربتها كاملة لحد ما تقدر تتعلم من غلطها و تطلع منه بمحض ارادتها … لازم نستبيح حقها حتي في انها تحس او تحب او تغلط!

مستباحة ماديا : 

كام واحدة اللي حواليها استباحوا انهم يتدخلوا و يتحكموا في حياتها عشان يحافظوا علي فلوسها… اللي من وجهة نظرهم انها بتضيعها او انها مش عارفة تاخد قرارت صح، او انها عبيطة و بيتضحك عليها! مع العلم ان فلوسها دي حقها الكامل و في اغلب الأحيان بتكون هي اللي عملت فلوسها دي بنفسها و من مجهودها و شغلها… فجأة هووووب تبقي مش من حقها و نحبسها و نضربها و نحجر عليها كمان عشان متضيعش مجهودها اللي هي عملته و عشان اللي متعبوش فيه يستفيدوا منه… ودة عادة بيبقي من اقرب الناس ليها !

مستباحة جسديا :

كام حادثة تحرش و اغتصاب و قتل و غيرهم تم الاستباحة فيهم للجاني و خلق اعذار لجريمته منه و من المجتمع لمجرد انه مستبيح لنفسه انه هو صاحب القرار في جسد الست ، و ان المجتمع هو اللي بيفرض عليها الاطار اللي هو شايفه ، و هي كست مالهاش أي حقوق في انها تختار اللي يناسبها! و الا تبقي تستاهل اللي حصلها و مباح للجناة يعملوا اللي هما عايزنه فيها لمجرد انها ست !

كام حادثة الفترة اللي فاتت سمعنا فيها عن استباحة الست و استباحة ضربها و حبسها و قتلها لمجرد انها ست !

مهسا اميني

شيرين عبد الوهاب

نيرة اشرف

و غيرهم كتير كل يوم بنسمع عنهم … 

اللي قتلها اللي كانت مرتبطة بيه لمجرد انها رفضت تكمل معاه و بعدها طعن في شرفها

اللي اتضربت و اتشهر بيها و اتحبست و احتمال يتم الحجر عليها لانهم شايفين لها الاحسن و اتهمت بالادمان و الخلل العقلي

اللي اتقتلت لانها مش لابسة اللي المجتمع فارضة عليها و كان مبررهم أخلاقي و ديني

و الأسوأ من الاستباحة لكل الستات دي هو انهم لما بيحاولوا يدافعوا عن نفسهم بيتم التشهير بيهم و بسمعتهم … اعمالا بمبدأ اكسرلها ضلع يطلع لها أربعة و عشرين … نوع قاتل من الترهيب لكل الستات و البنات .. رسالة مخفية بتقول انك لو فكرتي تبقي صاحبة قرارك فالفضيحة و الضرب و التشهير و القتل مصيرك!

هل لو نفس الاحداث دي حصلت من راجل هيحصل فيه اللي بيحصل في الستات؟

كل ست عايزة تصرخ و تقول : “كلنا بني آدمين .. من حقنا نعيش و نختار و نجرب و نغلط بنفسنا .. اللي عايز يكمل في الغلط دة اختياره مالناش الا اننا نحاول نساعده بالنصيحة و بس وممكن ندعي له… و اللي يقرر يتعلم من غلطه فده برده اختياره و لازم ندعمه.. انما كل حد يبقي وصي علي الستات اللي حواليه و يستبيح لنفسه انه يعمل فيهم ما بداله لاحساسه الواهي انه صح و هي غلط مش مقبول !”

ربنا بيحاسب كل حد علي افعاله … سيبوا الستات تعيش و تجرب و تغلط و ترجع و تبني من اول و جديد .. زي ما الراجل له حقوق .. الست لها حقوق…

 احنا بني آدمين حقنا نعيش و مش مستباحين لمجرد اننا ستات !