هي الرجالة بتخاف من الوضوح؟

الحقيقة انه علي عكس ما بيقولوا رجالة كتير انهم واضحين و بيحبوا الوضوح الا انه من الملاحظ بشكل كبير انه في رجالة كتير جدا بتخاف من الست الواضحة ،

يعني لو انتي ست واضحة و عارفة بالظبط انتي عايزة و بتحبي ايه و مابتحبيش ايه و بتقولي دة بصراحة، دة بيبقي شيء مرعب لرجالة كتير ،

طيب ليه في رجالة بتخاف من الوضوح ؟

-شخصيته ضعيفة 

ممكن جدا يبقي شخصيته ضعيفة و الصراحة و الوضوح بيرعبوه لانه بيقولوا انك ست قوية و انه مش هيعرف يتعامل معاكي 

-التربية

لو متربي علي انه ديما في ما بين السطور، و متربي علي ان الصراحة ديما بتودي في داهية مثلا ، او الكدب و انك تخبي دي حاجة عادية في عيلتهم، فلما بيلاقي حاجة عكس اللي متعود يشوفه بيخاف

-كذاب

لو هو شخصيا كذاب و ديما عنده اكتر من حقيقة و اكتر من وش فبتبقي الست الواضحة بالنسبة له كائن غريب و مرعبة و القرب منها مخيف

-متدلع بزيادة

الراجل لو كان متدلع بزيادة و متعود علي ان اللي بيعوزه بيتعمله بشكل او باخر ، فلما هتيجي واحدة تقوله لأ و تبقي حقيقية و بتقوله الحقيقة في وشه من غير تجميل، دي بالنسبة له هتبقي صدمة حضارية مرعبة

-عايش دور سي السيد

النوع اللي متربي انه سي السيد او شايف نفسه سي السيد بيبقي صعب اوي يتعامل مع ست صريحة وواضحة ، بتبقي بالنسبة له زي اللوغرتمات اللي مش مفهومة ، يعني واحدة يبقي عندها شخصية ورأي ، لا و كمان واضحة ، دة شيء عجيب!

و عشان الأسباب دي و غيرها بنلاقي ان رجالة كتير بيروحوا للستات المتلاعبة، الكدابة، ، اللي سهل جدا تستغله و تتلاعب بيه ، بس في نفس الوقت بتحسسه ان هو اللي بيعمل كل حاجة و هو اللي بياخد كل القرارات مع انه في الحقيقية هي اللي بتحركه للي هي عايزاه بسهولة عظيمة،

 من الآخر بتريحه بشكل او بآخر ، وعلي حسب مفتاح كل راجل  بقي، 

يعني الكداب عايز اللي يفهمه انه مصدق كدبه و مآمن بيه ووقتها الست المتلاعبة تعرف هي كمان تكدب عليه و تريحه و تخليه يعملها اللي هي عايزاه 

و ضعيف الشخصية بيبقي سهل جدا التلاعب بيه لو الست حسسته بقيمته و بنفسه حتي لو كدب عشان تحقق اللي هي عايزاه، 

وكل راجل بقي ومفتاحه و دخلته اللي بتبقي شاطرة فيها جدا الستات المستغلة و المتلاعبة، و هنا بيبقي صعب جدا علي الست الواضحة انها تتواجد ، مش بس كدة دي بتبقي مرعبة بالنسبة للرجالة!

عشان كدة بقي في خوف من الستات اللي عندهم شخصية و الستات الواضحة، تلاقيهم بيقولوا عليها صعبة و التعامل معاها هيبقي صعب، ومع ذلك في رجالة بياخدها الغرور و تقرر تقرب من الستات الواضحة دي بس مش عشان تبقي شريكة حياته ، لأ، عشان يحاول يروضها، يحاول يحجمها و يكسرها و يشككها في نفسها عشان تبقي ضعيفة ومتساقة منه، فيرضي غروره!

طيب الحل ايه؟

الحل بسيط جدا ، الراجل اللي بيخاف من وضوحك و شخصيتك مش المفروض تخليه في محيطك أصلا، خليه للي يستاهله، خليه يروح للستات الكدابة المتلاعبة و المستغلة، 

ببساطة شديدة الراجل اللي بجد مش بيخاف من وضوح الست ، الراجل اللي بجد بيدعمك و بيقف جنبك، الراجل اللي بجد بيحترم شخصيتك ووضوحك و صراحتك، و هو دة اللي يستاهل تقربي منه و تدي له فرصة يبقي شريك حياتك، اما اشباه الرجالة هما اللي بيخافوا من وضوحك ودول يستاهلوا اشباه الستات لانهم بيرتاحوا مع بعض اكتر ،

 احترمي شخصيتك و صراحتك و متديهمش غير لراجل حقيقي يقدرهم مش يخاف منهم!