من هم اشباه الرجال؟

كلمة راجل اتضح انها حاجة كبيرة جدا و مهمة جدا و بقت نادرة جدا جدا، لسبب ما بقينا محاطين باشباه الرجال ، شكلهم رجالة بس تصرفاتهم ابعد ما يكون عن تصرفات او اخلاق الراجل الحقيقي و دة اللي بقي بيخض و بيخوف ، 

مين هما اشباه الرجال ؟

-اللي بيحسس اللي حواليه ديما بالقلق و الخوف و مابيعرفش يديهم الإحساس بالأمان خصوصا من افراد عيلته، و دول اللي بتلاقيهم ديما بيهددوا بانهيار البيت او انهم هيمشوا او بيكونوا مؤذيين لكل اللي حواليهم و خصوصا اقرب الناس ليهم !

-اللي بيتخلي عن مسئوليته ناحية ولاده، سواء كانت المسئولية دي مادية او معنوية، يعني كام حد حوالينا سواء كانوا متجوزين او منفصلين و تلاقيه مالوش علاقة باي حاجة تتعلق باولاده ، طبعا النسبة بتزيد عند المنفصلين او المطلقين، تلاقيه بمنتهي الاريحية مش بيصرف علي أولاده و لا مهتم يشوفهم و لا فارق معاه انه يبقي مشارك في حياتهم ، و الغريب ان كتير من النوع دة بيبقي عندهم حالة من الانكار و تلاقيه لما حد يتكلم قدامه علي واجبات الاب يقولك”  طبعا .. دي اقل حاجة..”، و هو أصلا و لا يعرف حاجة عن ولاده و لا بيصرف عليهم جنية و معتمد علي الزوجة او طليقته انها هي اللي تتحمل كل العبء المادي و المعنوي و النفسي ، و في الآخر عايز يتقال عليه انه راجل ، لأ و كمان أب؟؟ 

-اللي بيقلل من الستات اللي في محيطه خصوصا لو ناجحات ، و بيحسسهم ديما انهم محتاجين لمترجم عشان يتفهموا ، او انهم اقل منه درجة او ان نجاحهم مربوط بيه ،

ودول ممكن يبقوا من افراد العيلة او ممكن يبقي الشريك، و كمان كتير جدا منهم في أماكن الشغل ، دول بقي هتلاقيهم بيتعاملوا مع الستات كالاتي :

١-بيعيد شرح أي حاجة بتقوليها، يعني مثلا تبقي في الشغل و بتشرحي حاجة و تلاقيه داخل يقول نفس كلامك، علي اعتبار انك مش بتعرفي توصلي المعلومة صح ، او انك كائن اقل منه قدرة و ذكاء و بالتالي هو -من وجهة نظره- بيساعدك انه بيعيد شرح كلامك 

٢-اللي بيعاملك علي انك لازم تبقي  a good girl  و دة اللي طول الوقت من وجهة نظره بيقوّمك، فتلاقيه لما تعملي حاجة في الشغل و بدأتي تعلي او تلمعي ، ياخد منك موقف و يبدأ يعاقبك باي شكل غير مباشر ، علي اعتبار انها قرصة ودن ، عشان متخرجيش عن طوعه و تفضلي ديما  the good girl   اللي مش هتخرج من عبايته، و اللي نجاحها السبب الأول فيه هو! فتلاقيه في أي نجاح ليكي بينسبه لنفسه محدش فاهم ليه؟

٣-اللي بيقلل من افكارك او نجاحك او انجازاتك، و دة بقي اللي تلاقيه مثلا لو في الشغل و بتقولي اقتراح يتفّه جدا منه، و لو طلع اقتراحك ناجح تلاقي منه معاملة سيئة جدا بعدها ، طبعا مش طلعتي بتفهمي و بتقولي اقتراحات احسن منه يبقي لازم يهمشك او يقلل منك، 

وفي منهم اللي في محيط العيلة او الشريك اللي يهد طموحاتك و تلاقيه ديما بيقلل من أي فكرة او اقتراح او مشروع انتي عايزه تعمليه، و ياكد لك انك غير مؤهلة للي انتي عايزاه دة خالص ، و بالتالي يحبطك لحد ما تتخلي عن طموحاتك عشان تفضلي طول الوقت في محرابه، او يبقي هو الناجح الوحيد- اذا كان ناجح أصلا- في الصورة!

٤-اللي يبقي في شغلك و يتعمد يعلّي عليكي راجل تاني ، حتي لو كان ال  position  او الترقية من حقك و بمجهودك ، و دلوقتي الموضوع وصل لقدر من الاستحقاق انه يجي يقولك انتي هتعملي ايه بالترقية و لا الفلوس، كبيرك هتروحي بيها للكوافير ، لكن زميلك دة فاتح بيت ! قدر عالي جدا من الاستحقاق  و التدخل في شئونك، 

والحاجة اللي كتير بيعملوا مش واخدين بالهم منها ، ان كل حد عنده التزاماته سواء راجل او ست، و مش معني انها ست ان معندهاش التزامات و بالتالي يدي لنفسه الاحقية انه يحرمها من حقها اللي استحقته بشغلها لان من وجهة نظره هي معندهاش التزامات !

اشباه الرجال بقوا منتشرين جدا حوالينا و بقينا بنحارب في كل الاتجاهات، و الرجالة الحقيقين بقوا بجد عملة نادرة، وعشان كدة بنتمني ان أي أم عندها ولاد انها تربيهم يبقوا رجالة بجد، رجالة عندهم نخوة و شهامة و نُبل عشان علي الأقل بناتنا يلاقوا رجالة حقيقين في حياتهم، و لان الراجل الحقيقي هيبقي سند لامه و اخته و يبقي راجل عادل في المجتمع و زوج صالح ! ربوا ولادكم يبقوا رجالة، يمكن الآية ترجع تتعدل و الراجل يبقي راجل و الست تبقي ست !