#its_never_too_late

المقولة اللي بنقولها كلنا لنفسنا طول الوقت ، سواء عشان نقنع نفسنا ان الحاجات اللي نفسنا نعملها و مش عارفين نعملها دلوقتي هيجي لها وقت ، او بنقولها لما بنبدأ فعلا في اننا نعمل حاجات بنحبها بعد وقت طويل ماعملنهاش فيه!

فكرة انه الوقت و الفرصة ديما متاحة لنا اننا نعمل اللي بنحبه فكرة سعيدة جدا و مبهجة، كتير في زحمة الحياة و كتر مسئوليئتها ممكن ننسي نعمل اللي بنحبه، او نحس انه مافيش وقت لحاجة اكتر من اللي بنقدر نعمله من باب المسئولية، بس حلم انه هيجي وقت و تعملي فيه اللي بجد بتحبيه في أي وقت بيدينا إحساس بالأمان خصوصا للشخصيات المتفائلة و المؤمنة بقدراتها و بحبها للحياة!

جملة “اكيد هيجي يوم و اعملها” ، جملة “السن مجرد رقم” كلها جمل محمسة و مشجعة، 

كام حد فينا سمع عن نماذج نجحت و كسرت الدنيا في سن كبير؟

كام مرة سمعنا عن نشاطات و مواهب بتظهر و بتلمع عند سن كبير ؟

كام مرة شفنا ناس حوالينا سنهم مش صغير و تلاقيهم بمنتهي الشغف بيدوروا علي موهبتهم و يحاولوا يحققوها؟

ومع الناس دي جملة” احنا هناخد زمانا و زمن غيرنا “مابقتش موجودة!

من اشهر المجتمعات علي السوشيال ميديا اللي نجحت تجمع  عدد كبير من كبار السن و تشجعهم يحققوا امنياتهم و تشجعهم يشاركوا خبراتهم و تجاربهم و كمان يلاقوا المساعدة من بعض هو جروب  “Golden years community”  ، جروب فعلا بيساهم في نشر فكرة 

“ان السن مجرد رقم ” بيساعد كبار السن او ال seniors  زي ما بنحب نقول عنهم انهم يلاقوا المساعدة و الدعم ،و كمان بيعملوا أنشطة تجمعهم مع بعض و تشجع الموهوبين و تحمس الكل انه يلاقي راحته و يبقي نموذج مؤثر لغيره! مساعدات في نقل الخبرات، و تشجيع لتحقيق الامنيات، و نشاطات ثقافية و رياضية مختلفة في الجروب دة، دة غير انه بيجمع كتييير من النماذج المشرفة و الملهمة.

من اشهر النماذج اللي حققت نفسها بشكل كبير وحققت نجاحات نحب عن نسمع زيها كتير الفترة اللي جاية هما :

الكابتن نجوي غراب وكانت نجوي بطولة الجمهورية في السباحة و هي عندها ١٨ سنة ، و بعد ما طلعت معاش رجع لها شغفها القديم و قررت تدخل فريق الرواد بنادي هليوبولس و دخلت مسابقات دولية كتيرة جدا و اخدت ميداليات علي مستوي العالم في سباحة الرواد فوق ال ٦٠ سنة  و لسه لحد دلوقتي بتشارك في سباقات سباحة الرواد و هي فوق السبعين 

الأستاذة زينب شفيق اللي قررت تكتب اول كتاب ليها و هي فوق ال ٧٠ سنة و ماقالتش انا كبرت او ازاي اعمل كدة دلوقتي 

النماذج دي و غيرها اللي نحب نبقي زيهم و نحب نسمع عن كتير بيحققوا نفسهم و بيحققوا شغفهم في أي سن و في أي وقت لانه الحقيقة انه فعلا :

“السن مجرد رقم!”